રામાયણ · અધ્યાય 6.112

પૂર્ણે ચતુર્દશે વર્ષે પઞ્ચભ્યાં લક્ષ્મણાગ્રજઃ
ભરદ્વાજાશ્રમં પ્રાપ્ય વવન્દે નિયતો મુનિમ્

સો ઽપૃચ્છદ્ અભિવાદ્યૈનં ભરદ્વાજં તપોધનમ્
શૃણોષિ ક ચિદ્ ભગવન્ સુભિક્ષાનામયં પુરે
કચ્ચિચ્ ચ યુક્તો ભરતો જીવન્ત્ય્ અપિ ચ માતરઃ

એવમ્ ઉક્તસ્ તુ રામેણ ભરદ્વાજો મહામુનિઃ
પ્રત્યુવાચ રઘુશ્રેષ્ઠં સ્મિતપૂર્વં પ્રહૃષ્ટવત્

પઙ્કદિગ્ધસ્ તુ ભરતો જટિલસ્ ત્વાં પ્રતીક્ષતે
પાદુકે તે પુરસ્કૃત્ય સર્વં ચ કુશલં ગૃહે

ત્વાં પુરા ચીરવસનં પ્રવિશન્તં મહાવનમ્
સ્ત્રીતૃતીયં ચ્યુતં રાજ્યાદ્ ધર્મકામં ચ કેવલમ્

પદાતિં ત્યક્તસર્વસ્વં પિતુર્ વચનકારિણમ્
સ્વર્ગભોગૈઃ પરિત્યક્તં સ્વર્ગચ્યુતમ્ ઇવામરમ્

દૃષ્ટ્વા તુ કરુણા પૂર્વં મમાસીત્ સમિતિંજય
કૈકેયીવચને યુક્તં વન્યમૂલફલાશનમ્

સામ્પ્રતં સુસમૃદ્ધાર્થં સમિત્રગણબાન્ધવમ્
સમીક્ષ્ય વિજિતારિં ત્વાં મમ પ્રીતિર્ અનુત્તમા

સર્વં ચ સુખદુઃખં તે વિદિતં મમ રાઘવ
યત્ ત્વયા વિપુલં પ્રાપ્તં જનસ્થાનવધાદિકમ્

બ્રાહ્મણાર્થે નિયુક્તસ્ય રક્ષતઃ સર્વતાપસાન્
મારીચદર્શનં ચૈવ સીતોન્મથનમ્ એવ ચ

કબન્ધદર્શનં ચૈવ પમ્પાભિગમનં તથા
સુગ્રીવેણ ચ તે સખ્યં યચ્ ચ વાલી હતસ્ ત્વયા

માર્ગણં ચૈવ વૈદેહ્યાઃ કર્મ વાતાત્મજસ્ય ચ
વિદિતાયાં ચ વૈદેહ્યાં નલસેતુર્ યથા કૃતઃ
યથા ચ દીપિતા લઙ્કા પ્રહૃષ્ટૈર્ હરિયૂથપૈઃ

સપુત્રબાન્ધવામાત્યઃ સબલઃ સહ વાહનઃ
યથા ચ નિહતઃ સંખ્યે રાવણો દેવકણ્ટકઃ

સમાગમશ્ ચ ત્રિદશૈર્ યથાદત્તશ્ ચ તે વરઃ
સર્વં મમૈતદ્ વિદિતં તપસા ધર્મવત્સલ

અહમ્ અપ્ય્ અત્ર તે દદ્મિ વરં શસ્ત્રભૃતાં વર
અર્ઘ્યં પ્રતિગૃહાણેદમ્ અયોધ્યાં શ્વો ગમિષ્યસિ

તસ્ય તચ્ છિરસા વાક્યં પ્રતિગૃહ્ય નૃપાત્મજઃ
બાઢમ્ ઇત્ય્ એવ સંહૃષ્ટઃ શ્રીમાન્ વરમ્ અયાચત

અકાલફલિનો વૃક્ષાઃ સર્વે ચાપિ મધુસ્રવાઃ
ભવન્તુ માર્ગે ભગવન્ન્ અયોધ્યાં પ્રતિ ગચ્છતઃ

નિષ્ફલાઃ ફલિનશ્ ચાસન્ વિપુષ્પાઃ પુષ્પશાલિનઃ
શુષ્કાઃ સમગ્રપત્રાસ્ તે નગાશ્ ચૈવ મધુસ્રવાઃ