રામાયણ · અધ્યાય 6.110

ઉપસ્થિતં તુ તં દૃષ્ટ્વા પુષ્પકં પુષ્પભૂષિતમ્
અવિદૂરે સ્થિતં રામં પ્રત્યુવાચ વિભીષણઃ

સ તુ બદ્ધાઞ્જલિઃ પ્રહ્વો વિનીતો રાક્ષસેશ્વરઃ
અબ્રવીત્ ત્વરયોપેતઃ કિં કરોમીતિ રાઘવમ્

તમ્ અબ્રવીન્ મહાતેજા લક્ષ્મણસ્યોપશૃણ્વતઃ
વિમૃશ્ય રાઘવો વાક્યમ્ ઇદં સ્નેહપુરસ્કૃતમ્

કૃતપ્રયત્નકર્માણો વિભીષણ વનૌકસઃ
રત્નૈર્ અર્થૈશ્ ચ વિવિભૈર્ ભૂષણૈશ્ ચાભિપૂજય

સહૈભિર્ અર્દિતા લઙ્કા નિર્જિતા રાક્ષસેશ્વર
હૃષ્ટૈઃ પ્રાણભયં ત્યક્ત્વા સંગ્રામેષ્વ્ અનિવર્તિભિઃ

એવં સંમાનિતાશ્ ચેમે માનાર્હા માનદ ત્વયા
ભવિષ્યન્તિ કૃતજ્ઞેન નિર્વૃતા હરિયૂથપાઃ

ત્યાગિનં સંગ્રહીતારં સાનુક્રોશં યશસ્વિનમ્
યતસ્ ત્વામ્ અવગચ્છન્તિ તતઃ સંબોધયામિ તે

એવમ્ ઉક્તસ્ તુ રામેણ વાનરાંસ્ તાન્ વિભીષણઃ
રત્નાર્થૈઃ સંવિભાગેન સર્વાન્ એવાન્વપૂજયત્

તતસ્ તાન્ પૂજિતાન્ દૃષ્ટ્વા રત્નૈર્ અર્થૈશ્ ચ યૂથપાન્
આરુરોહ તતો રામસ્ તદ્ વિમાનમ્ અનુત્તમમ્

અઙ્કેનાદાય વૈદેહીં લજ્જમાનાં યશસ્વિનીમ્
લક્ષ્મણેન સહ ભ્રાત્રા વિક્રાન્તેન ધનુષ્મતા

અબ્રવીચ્ ચ વિમાનસ્થઃ કાકુત્સ્થઃ સર્વવાનરાન્
સુગ્રીવં ચ મહાવીર્યં રાક્ષસં ચ વિભીષણમ્

મિત્રકાર્યં કૃતમ્ ઇદં ભવદ્ભિર્ વાનરોત્તમાઃ
અનુજ્ઞાતા મયા સર્વે યથેષ્ટં પ્રતિગચ્છત

યત્ તુ કાર્યં વયસ્યેન સુહૃદા વા પરંતપ
કૃતં સુગ્રીવ તત્ સર્વં ભવતા ધર્મભીરુણા
કિષ્કિન્ધાં પ્રતિયાહ્ય્ આશુ સ્વસૈન્યેનાભિસંવૃતઃ

સ્વરાજ્યે વસ લઙ્કાયાં મયા દત્તે વિભીષણ
ન ત્વાં ધર્ષયિતું શક્તાઃ સેન્દ્રા અપિ દિવૌકસઃ

અયોધ્યાં પ્રતિયાસ્યામિ રાજધાનીં પિતુર્ મમ
અભ્યનુજ્ઞાતુમ્ ઇચ્છામિ સર્વાન્ આમન્ત્રયામિ વઃ

એવમ્ ઉક્તાસ્ તુ રામેણ વાનરાસ્ તે મહાબલાઃ
ઊચુઃ પ્રાઞ્જલયો રામં રાક્ષસશ્ ચ વિભીષણઃ
અયોધ્યાં ગન્તુમ્ ઇચ્છામઃ સર્વાન્ નયતુ નો ભવાન્

દૃષ્ટ્વા ત્વામ્ અભિષેકાર્દ્રં કૌસલ્યામ્ અભિવાદ્ય ચ
અચિરેણાગમિષ્યામઃ સ્વાન્ ગૃહાન્ નૃપતેઃ સુત

એવમ્ ઉક્તસ્ તુ ધર્માત્મા વાનરૈઃ સવિભીષણૈઃ
અબ્રવીદ્ રાઘવઃ શ્રીમાન્ સસુગ્રીવવિભીષણાન્

પ્રિયાત્ પ્રિયતરં લબ્ધં યદ્ અહં સસુહૃજ્જનઃ
સર્વૈર્ ભવદ્ભિઃ સહિતઃ પ્રીતિં લપ્સ્યે પુરીં ગતઃ

ક્ષિપ્રમ્ આરોહ સુગ્રીવ વિમાનં વાનરૈઃ સહ
ત્વમ્ અધ્યારોહ સામાત્યો રાક્ષસેન્દ્રવિભીષણ

તતસ્ તત્ પુષ્પકં દિવ્યં સુગ્રીવઃ સહ સેનયા
અધ્યારોહત્ ત્વરઞ્ શીઘ્રં સામાત્યશ્ ચ વિભીષણઃ

તેષ્વ્ આરૂઢેષુ સર્વેષુ કૌબેરં પરમાસનમ્
રાઘવેણાભ્યનુજ્ઞાતમ્ ઉત્પપાત વિહાયસં

યયૌ તેન વિમાનેન હંસયુક્તેન ભાસ્વતા
પ્રહૃષ્ટશ્ ચ પ્રતીતશ્ ચ બભૌ રામઃ કુબેરવત્