રામાયણ · અધ્યાય 6.109

તાં રાત્રિમ્ ઉષિતં રામં સુખોત્થિતમ્ અરિંદમમ્
અબ્રવીત્ પ્રાઞ્જલિર્ વાક્યં જયં પૃષ્ટ્વા વિભીષણઃ

સ્નાનાનિ ચાઙ્ગરાગાણિ વસ્ત્રાણ્ય્ આભરણાનિ ચ
ચન્દનાનિ ચ દિવ્યાનિ માલ્યાનિ વિવિધાનિ ચ

અલંકારવિદશ્ ચેમા નાર્યઃ પદ્મનિભેક્ષણાઃ
ઉપસ્થિતાસ્ ત્વાં વિધિવત્ સ્નાપયિષ્યન્તિ રાઘવ

એવમ્ ઉક્તસ્ તુ કાકુત્સ્થઃ પ્રત્યુવાચ વિભીષણમ્
હરીન્ સુગ્રીવમુખ્યાંસ્ ત્વં સ્નાનેનોપનિમન્ત્રય

સ તુ તામ્યતિ ધર્માત્મા મમહેતોઃ સુખોચિતઃ
સુકુમારો મહાબાહુઃ કુમારઃ સત્યસંશ્રવઃ

તં વિના કૈકેયીપુત્રં ભરતં ધર્મચારિણમ્
ન મે સ્નાનં બહુમતં વસ્ત્રાણ્ય્ આભરણાનિ ચ

ઇત એવ પથા ક્ષિપ્રં પ્રતિગચ્છામ તાં પુરીમ્
અયોધ્યામ્ આયતો હ્ય્ એષ પન્થાઃ પરમદુર્ગમઃ

એવમ્ ઉક્તસ્ તુ કાકુત્સ્થં પ્રત્યુવાચ વિભીષણઃ
અહ્ના ત્વાં પ્રાપયિષ્યામિ તાં પુરીં પાર્થિવાત્મજ

પુષ્પકં નામ ભદ્રં તે વિમાનં સૂર્યસંનિભમ્
મમ ભ્રાતુઃ કુબેરસ્ય રાવણેનાહૃતં બલાત્

તદ્ ઇદં મેઘસંકાશં વિમાનમ્ ઇહ તિષ્ઠતિ
તેન યાસ્યસિ યાનેન ત્વમ્ અયોધ્યાં ગજજ્વરઃ

અહં તે યદ્ય્ અનુગ્રાહ્યો યદિ સ્મરસિ મે ગુણાન્
વસ તાવદ્ ઇહ પ્રાજ્ઞ યદ્ય્ અસ્તિ મયિ સૌહૃદમ્

લક્ષ્મણેન સહ ભ્રાત્રા વૈદેહ્યા ચાપિ ભાર્યયા
અર્ચિતઃ સર્વકામૈસ્ ત્વં તતો રામ ગમિષ્યસિ

પ્રીતિયુક્તસ્ તુ મે રામ સસૈન્યઃ સસુહૃદ્ગણઃ
સત્ક્રિયાં વિહિતાં તાવદ્ ગૃહાણ ત્વં મયોદ્યતામ્

પ્રણયાદ્ બહુમાનાચ્ ચ સૌહૃદેન ચ રાઘવ
પ્રસાદયામિ પ્રેષ્યો ઽહં ન ખલ્વ્ આજ્ઞાપયામિ તે

એવમ્ ઉક્તસ્ તતો રામઃ પ્રત્યુવાચ વિભીષણમ્
રક્ષસાં વાનરાણાં ચ સર્વેષાં ચોપશૃણ્વતામ્

પૂજિતો ઽહં ત્વયા વીર સાચિવ્યેન પરંતપ
સર્વાત્મના ચ ચેષ્ટિભિઃ સૌહૃદેનોત્તમેન ચ

ન ખલ્વ્ એતન્ ન કુર્યાં તે વચનં રાક્ષસેશ્વર
તં તુ મે ભ્રાતરં દ્રષ્ટું ભરતં ત્વરતે મનઃ

માં નિવર્તયિતું યો ઽસૌ ચિત્રકૂટમ્ ઉપાગતઃ
શિરસા યાચતો યસ્ય વચનં ન કૃતં મયા

કૌસલ્યાં ચ સુમિત્રાં ચ કૈકેયીં ચ યશસ્વિનીમ્
ગુરૂંશ્ ચ સુહૃદશ્ ચૈવ પૌરાંશ્ ચ તનયૈઃ સહ

ઉપસ્થાપય મે ક્ષિપ્રં વિમાનં રાક્ષસેશ્વર
કૃતકાર્યસ્ય મે વાસઃ કથં ચિદ્ ઇહ સંમતઃ

અનુજાનીહિ માં સૌમ્ય પૂજિતો ઽસ્મિ વિભીષણ
મન્યુર્ ન ખલુ કર્તવ્યસ્ ત્વરિતસ્ ત્વાનુમાનયે

તતઃ કાઞ્ચનચિત્રાઙ્ગં વૈદૂર્યમણિવેદિકમ્
કૂટાગારૈઃ પરિક્ષિપ્તં સર્વતો રજતપ્રભમ્

પાણ્ડુરાભિઃ પતાકાભિર્ ધ્વજૈશ્ ચ સમલંકૃતમ્
શોભિતં કાઞ્ચનૈર્ હર્મ્યૈર્ હેમપદ્મવિભૂષિતમ્

પ્રકીર્ણં કિઙ્કિણીજાલૈર્ મુક્તામણિગવાક્ષિતમ્
ઘણ્ટાજાલૈઃ પરિક્ષિપ્તં સર્વતો મધુરસ્વનમ્

તન્ મેરુશિખરાકારં નિર્મિતં વિશ્વકર્મણા
બહુભિર્ ભૂષિતં હર્મ્યૈર્ મુક્તારજતસંનિભૌ

તલૈઃ સ્ફટિકચિત્રાઙ્ગૈર્ વૈદૂર્યૈશ્ ચ વરાસનૈઃ
મહાર્હાસ્તરણોપેતૈર્ ઉપપન્નં મહાધનૈઃ

ઉપસ્થિતમ્ અનાધૃષ્યં તદ્ વિમાનં મનોજવમ્
નિવેદયિત્વા રામાય તસ્થૌ તત્ર વિભીષણઃ