રામાયણ · અધ્યાય 6.108

પ્રતિપ્રયાતે કાકુત્સ્થે મહેન્દ્રઃ પાકશાસનઃ
અબ્રવીત્ પરમપ્રીતો રાઘવં પ્રાઞ્જલિં સ્થિતમ્

અમોઘં દર્શનં રામ તવાસ્માકં પરંતપ
પ્રીતિયુક્તો ઽસ્મિ તેન ત્વં બ્રૂહિ યન્ મનસેચ્છસિ

એવમ્ ઉક્તસ્ તુ કાકુત્સ્થઃ પ્રત્યુવાચ કૃતાઞ્જલિઃ
લક્ષ્મણેન સહ ભ્રાત્રા સીતયા ચાપિ ભાર્યયા

યદિ પ્રીતિઃ સમુત્પન્ના મયિ સર્વસુરેશ્વર
વક્ષ્યામિ કુરુ મે સત્યં વચનં વદતાં વર

મમ હેતોઃ પરાક્રાન્તા યે ગતા યમસાદનમ્
તે સર્વે જીવિતં પ્રાપ્ય સમુત્તિષ્ઠન્તુ વાનરાઃ

મત્પ્રિયેષ્વ્ અભિરક્તાશ્ ચ ન મૃત્યું ગણયન્તિ ચ
ત્વત્પ્રસાદાત્ સમેયુસ્ તે વરમ્ એતદ્ અહં વૃણે

નીરુજાન્ નિર્વ્રણાંશ્ ચૈવ સંપન્નબલપૌરુષાન્
ગોલાઙ્ગૂલાંસ્ તથૈવર્ક્ષાન્ દ્રષ્ટુમ્ ઇચ્છામિ માનદ

અકાલે ચાપિ મુખ્યાનિ મૂલાનિ ચ ફલાનિ ચ
નદ્યશ્ ચ વિમલાસ્ તત્ર તિષ્ઠેયુર્ યત્ર વાનરાઃ

શ્રુત્વા તુ વચનં તસ્ય રાઘવસ્ય મહાત્મનઃ
મહેન્દ્રઃ પ્રત્યુવાચેદં વચનં પ્રીતિલક્ષણમ્

મહાન્ અયં વરસ્ તાત ત્વયોક્તો રઘુનન્દન
સમુત્થાસ્યન્તિ હરયઃ સુપ્તા નિદ્રાક્ષયે યથા

સુહૃદ્ભિર્ બાન્ધવૈશ્ ચૈવ જ્ઞાતિભિઃ સ્વજનેન ચ
સર્વ એવ સમેષ્યન્તિ સંયુક્તાઃ પરયા મુદા

અકાલે પુષ્પશબલાઃ ફલવન્તશ્ ચ પાદપાઃ
ભવિષ્યન્તિ મહેષ્વાસ નદ્યશ્ ચ સલિલાયુતાઃ

સવ્રણૈઃ પ્રથમં ગાત્રૈઃ સંવૃતૈર્ નિવ્રણૈઃ પુનઃ
બભૂવુર્ વાનરાઃ સર્વે કિમ્ એતદ્ ઇતિ વિસ્મિતઃ

કાકુત્સ્થં પરિપૂર્ણાર્થં દૃષ્ટ્વા સર્વે સુરોત્તમાઃ
ઊચુસ્ તે પ્રથમં સ્તુત્વા સ્તવાર્હં સહલક્ષ્મણમ્

ગચ્છાયોધ્યામ્ ઇતો વીર વિસર્જય ચ વાનરાન્
મૈથિલીં સાન્ત્વયસ્વૈનામ્ અનુરક્તાં તપસ્વિનીમ્

ભ્રાતરં પશ્ય ભરતં ત્વચ્છોકાદ્ વ્રતચારિણમ્
અભિષેચય ચાત્માનં પૌરાન્ ગત્વા પ્રહર્ષય

એવમ્ ઉક્ત્વા તમ્ આમન્ત્ર્ય રામં સૌમિત્રિણા સહ
વિમાનૈઃ સૂર્યસંકાશૈર્ હૃષ્ટા જગ્મુઃ સુરા દિવમ્

અભિવાદ્ય ચ કાકુત્સ્થઃ સર્વાંસ્ તાંસ્ ત્રિદશોત્તમાન્
લક્ષ્મણેન સહ ભ્રાત્રા વાસમ્ આજ્ઞાપયત્ તદા

તતસ્ તુ સા લક્ષ્મણરામપાલિતા મહાચમૂર્ હૃષ્ટજના યશસ્વિની
શ્રિયા જ્વલન્તી વિરરાજ સર્વતો નિશાપ્રણીતેવ હિ શીતરશ્મિના