રામાયણ · અધ્યાય 6.105

તતો વૈશ્રવણો રાજા યમશ્ ચામિત્રકર્શનઃ
સહસ્રાક્ષો મહેન્દ્રશ્ ચ વરુણશ્ ચ પરંતપઃ

ષડર્ધનયનઃ શ્રીમાન્ મહાદેવો વૃષધ્વજઃ
કર્તા સર્વસ્ય લોકસ્ય બ્રહ્મા બ્રહ્મવિદાં વરઃ

એતે સર્વે સમાગમ્ય વિમાનૈઃ સૂર્યસંનિભૈઃ
આગમ્ય નગરીં લઙ્કામ્ અભિજગ્મુશ્ ચ રાઘવમ્

તતઃ સહસ્તાભરણાન્ પ્રગૃહ્ય વિપુલાન્ ભુજાન્
અબ્રુવંસ્ ત્રિદશશ્રેષ્ઠાઃ પ્રાઞ્જલિં રાઘવં સ્થિતમ્

કર્તા સર્વસ્ય લોકસ્ય શ્રેષ્ઠો જ્ઞાનવતાં વરઃ
ઉપેક્ષસે કથં સીતાં પતન્તીં હવ્યવાહને
કથં દેવગણશ્રેષ્ઠમ્ આત્માનં નાવબુધ્યસે

ઋતધામા વસુઃ પૂર્વં વસૂનાં ચ પ્રજાપતિઃ
ત્વં ત્રયાણાં હિ લોકાનામ્ આદિકર્તા સ્વયંપ્રભુઃ

રુદ્રાણામ્ અષ્ટમો રુદ્રઃ સાધ્યાનામ્ અપિ પઞ્ચમઃ
અશ્વિનૌ ચાપિ તે કર્ણૌ ચન્દ્રસૂર્યૌ ચ ચક્ષુષી

અન્તે ચાદૌ ચ લોકાનાં દૃશ્યસે ત્વં પરંતપ
ઉપેક્ષસે ચ વૈદેહીં માનુષઃ પ્રાકૃતો યથા

ઇત્ય્ ઉક્તો લોકપાલૈસ્ તૈઃ સ્વામી લોકસ્ય રાઘવઃ
અબ્રવીત્ ત્રિદશશ્રેષ્ઠાન્ રામો ધર્મભૃતાં વરઃ

આત્માનં માનુષં મન્યે રામં દશરથાત્મજમ્
યો ઽહં યસ્ય યતશ્ ચાહં ભગવાંસ્ તદ્ બ્રવીતુ મે

ઇતિ બ્રુવાણં કાકુત્સ્થં બ્રહ્મા બ્રહ્મવિદાં વરઃ
અબ્રવીચ્ છૃણુ મે રામ સત્યં સત્યપરાક્રમ

ભવાન્ નારાયણો દેવઃ શ્રીમાંશ્ ચક્રાયુધો વિભુઃ
એકશૃઙ્ગો વરાહસ્ ત્વં ભૂતભવ્યસપત્નજિત્

અક્ષરં બ્રહ્મસત્યં ચ મધ્યે ચાન્તે ચ રાઘવ
લોકાનાં ત્વં પરો ધર્મો વિષ્વક્સેનશ્ ચતુર્ભુજઃ

શાર્ઙ્ગધન્વા હૃષીકેશઃ પુરુષઃ પુરુષોત્તમઃ
અજિતઃ ખડ્ગધૃગ્ વિષ્ણુઃ કૃષ્ણશ્ ચૈવ બૃહદ્બલઃ

સેનાનીર્ ગ્રામણીશ્ ચ ત્વં બુદ્ધિઃ સત્ત્વં ક્ષમા દમઃ
પ્રભવશ્ ચાપ્યયશ્ ચ ત્વમ્ ઉપેન્દ્રો મધુસૂદનઃ

ઇન્દ્રકર્મા મહેન્દ્રસ્ ત્વં પદ્મનાભો રણાન્તકૃત્
શરણ્યં શરણં ચ ત્વામ્ આહુર્ દિવ્યા મહર્ષયઃ

સહસ્રશૃઙ્ગો વેદાત્મા શતજિહ્વો મહર્ષભઃ
ત્વં યજ્ઞસ્ ત્વં વષટ્કારસ્ ત્વમ્ ઓંકારઃ પરંતપ

પ્રભવં નિધનં વા તે ન વિદુઃ કો ભવાન્ ઇતિ
દૃશ્યસે સર્વભૂતેષુ બ્રાહ્મણેષુ ચ ગોષુ ચ

દિક્ષુ સર્વાસુ ગગને પર્વતેષુ વનેષુ ચ
સહસ્રચરણઃ શ્રીમાઞ્ શતશીર્ષઃ સહસ્રધૃક્

ત્વં ધારયસિ ભૂતાનિ વસુધાં ચ સપર્વતામ્
અન્તે પૃથિવ્યાઃ સલિલે દૃશ્યસે ત્વં મહોરગઃ

ત્રીંલ્ લોકાન્ ધારયન્ રામ દેવગન્ધર્વદાનવાન્
અહં તે હૃદયં રામ જિહ્વા દેવી સરસ્વતી

દેવા ગાત્રેષુ લોમાનિ નિર્મિતા બ્રહ્મણા પ્રભો
નિમેષસ્ તે ઽભવદ્ રાત્રિર્ ઉન્મેષસ્ તે ઽભવદ્ દિવા

સંસ્કારાસ્ તે ઽભવન્ વેદા ન તદ્ અસ્તિ ત્વયા વિના
જગત્ સર્વં શરીરં તે સ્થૈર્યં તે વસુધાતલમ્

અગ્નિઃ કોપઃ પ્રસાદસ્ તે સોમઃ શ્રીવત્સલક્ષણ
ત્વયા લોકાસ્ ત્રયઃ ક્રાન્તાઃ પુરાણે વિક્રમૈસ્ ત્રિભિઃ

મહેન્દ્રશ્ ચ કૃતો રાજા બલિં બદ્ધ્વા મહાસુરમ્
સીતા લક્ષ્મીર્ ભવાન્ વિષ્ણુર્ દેવઃ કૃષ્ણઃ પ્રજાપતિઃ

વધાર્થં રાવણસ્યેહ પ્રવિષ્ટો માનુષીં તનુમ્
તદ્ ઇદં નઃ કૃતં કાર્યં ત્વયા ધર્મભૃતાં વર

નિહતો રાવણો રામ પ્રહૃષ્ટો દિવમ્ આક્રમ
અમોઘં બલવીર્યં તે અમોઘસ્ તે પરાક્રમઃ

અમોઘાસ્ તે ભવિષ્યન્તિ ભક્તિમન્તશ્ ચ યે નરાઃ
યે ત્વાં દેવં ધ્રુવં ભક્તાઃ પુરાણં પુરુષોત્તમમ્

યે નરાઃ કીર્તયિષ્યન્તિ નાસ્તિ તેષાં પરાભવઃ