રામાયણ · અધ્યાય 6.100

તે રાવણવધં દૃષ્ટ્વા દેવગન્ધર્વદાનવાઃ
જગ્મુસ્ તૈસ્ તૈર્ વિમાનૈઃ સ્વૈઃ કથયન્તઃ શુભાઃ કથાઃ

રાવણસ્ય વધં ઘોરં રાઘવસ્ય પરાક્રમમ્
સુયુદ્ધં વાનરાણાં ચ સુગ્રીવસ્ય ચ મન્ત્રિતમ્

અનુરાગં ચ વીર્યં ચ સૌમિત્રેર્ લક્ષ્મણસ્ય ચ
કથયન્તો મહાભાગા જગ્મુર્ હૃષ્ટા યથાગતમ્

રાઘવસ્ તુ રથં દિવ્યમ્ ઇન્દ્રદત્તં શિખિપ્રભમ્
અનુજ્ઞાય મહાભાગો માતલિં પ્રત્યપૂજયત્

રાઘવેણાભ્યનુજ્ઞાતો માતલિઃ શક્રસારથિઃ
દિવ્યં તં રથમ્ આસ્થાય દિવમ્ એવારુરોહ સઃ

તસ્મિંસ્ તુ દિવમ્ આરૂઢે સુરસારથિસત્તમે
રાઘવઃ પરમપ્રીતઃ સુગ્રીવં પરિષસ્વજે

પરિષ્વજ્ય ચ સુગ્રીવં લક્ષ્મણેનાભિવાદિતઃ
પૂજ્યમાનો હરિશ્રેષ્ઠૈર્ આજગામ બલાલયમ્

અબ્રવીચ્ ચ તદા રામઃ સમીપપરિવર્તિનમ્
સૌમિત્રિં સત્ત્વસંપન્નં લક્ષ્મણં દીપ્તતેજસં

વિભીષણમ્ ઇમં સૌમ્ય લઙ્કાયામ્ અભિષેચય
અનુરક્તં ચ ભક્તં ચ મમ ચૈવોપકારિણમ્

એષ મે પરમઃ કામો યદ્ ઇમં રાવણાનુજમ્
લઙ્કાયાં સૌમ્ય પશ્યેયમ્ અભિષિક્તં વિભીષણમ્

એવમ્ ઉક્તસ્ તુ સૌમિત્રી રાઘવેણ મહાત્મના
તથેત્ય્ ઉક્ત્વા તુ સંહૃષ્ટઃ સૌવર્ણં ઘટમ્ આદદે

ઘટેન તેન સૌમિત્રિર્ અભ્યષિઞ્ચદ્ વિભીષણમ્
લઙ્કાયાં રક્ષસાં મધ્યે રાજાનં રામશાસનાત્

અભ્યષિઞ્ચત્ સ ધર્માત્મા શુદ્ધાત્માનં વિભીષણમ્
તસ્યામાત્યા જહૃષિરે ભક્તા યે ચાસ્ય રાક્ષસાઃ

દૃષ્ટ્વાભિષિક્તં લઙ્કાયાં રાક્ષસેન્દ્રં વિભીષણમ્
રાઘવઃ પરમાં પ્રીતિં જગામ સહલક્ષ્મણઃ

સ તદ્ રાજ્યં મહત્ પ્રાપ્ય રામદત્તં વિભીષણઃ
પ્રકૃતીઃ સાન્ત્વયિત્વા ચ તતો રામમ્ ઉપાગમત્

અક્ષતાન્ મોદકાંલ્ લાજાન્ દિવ્યાઃ સુમનસસ્ તથા
આજહ્રુર્ અથ સંહૃષ્ટાઃ પૌરાસ્ તસ્મૈ નિશાચરાઃ

સ તાન્ ગૃહીત્વા દુર્ધર્ષો રાઘવાય ન્યવેદયત્
મઙ્ગલ્યં મઙ્ગલં સર્વં લક્ષ્મણાય ચ વીર્યવાન્

કૃતકાર્યં સમૃદ્ધાર્થં દૃષ્ટ્વા રામો વિભીષણમ્
પ્રતિજગ્રાહ તત્ સર્વં તસ્યૈવ પ્રિયકામ્યયા

તતઃ શૈલોપમં વીરં પ્રાઞ્જલિં પાર્શ્વતઃ સ્થિતમ્
અબ્રવીદ્ રાઘવો વાક્યં હનૂમન્તં પ્લવંગમમ્

અનુમાન્ય મહારાજમ્ ઇમં સૌમ્ય વિભીષણમ્
પ્રવિશ્ય રાવણગૃહં વિનયેનોપસૃત્ય ચ

વૈદેહ્યા માં કુશલિનં સસુગ્રીવં સલક્ષ્મણમ્
આચક્ષ્વ જયતાં શ્રેષ્ઠ રાવણં ચ મયા હતમ્

પ્રિયમ્ એતદ્ ઉદાહૃત્ય મૈથિલ્યાસ્ ત્વં હરીશ્વર
પ્રતિગૃહ્ય ચ સંદેશમ્ ઉપાવર્તિતુમ્ અર્હસિ