રામાયણ · અધ્યાય 6.097

અથ સંસ્મારયામ્ આસ રાઘવં માતલિસ્ તદા
અજાનન્ન્ ઇવ કિં વીર ત્વમ્ એનમ્ અનુવર્તસે

વિસૃજાસ્મૈ વધાય ત્વમ્ અસ્ત્રં પૈતામહં પ્રભો
વિનાશકાલઃ કથિતો યઃ સુરૈઃ સો ઽદ્ય વર્તતે

તતઃ સંસ્મારિતો રામસ્ તેન વાક્યેન માતલેઃ
જગ્રાહ સ શરં દીપ્તં નિશ્વસન્તમ્ ઇવોરગમ્

યમ્ અસ્મૈ પ્રથમં પ્રાદાદ્ અગસ્ત્યો ભગવાન્ ઋષિઃ
બ્રહ્મદત્તં મહદ્ બાણમ્ અમોઘં યુધિ વીર્યવાન્

બ્રહ્મણા નિર્મિતં પૂર્વમ્ ઇન્દ્રાર્થમ્ અમિતૌજસા
દત્તં સુરપતેઃ પૂર્વં ત્રિલોકજયકાઙ્ક્ષિણઃ

યસ્ય વાજેષુ પવનઃ ફલે પાવકભાસ્કરૌ
શરીરમ્ આકાશમયં ગૌરવે મેરુમન્દરૌ

જાજ્વલ્યમાનં વપુષા સુપુઙ્ખં હેમભૂષિતમ્
તેજસા સર્વભૂતાનાં કૃતં ભાસ્કરવર્ચસં

સધૂમમ્ ઇવ કાલાગ્નિં દીપ્તમ્ આશીવિષં યથા
રથનાગાશ્વવૃન્દાનાં ભેદનં ક્ષિપ્રકારિણમ્

દ્વારાણાં પરિઘાણાં ચ ગિરીણામ્ અપિ ભેદનમ્
નાનારુધિરસિક્તાઙ્ગં મેદોદિગ્ધં સુદારુણમ્

વજ્રસારં મહાનાદં નાનાસમિતિદારુણમ્
સર્વવિત્રાસનં ભીમં શ્વસન્તમ્ ઇવ પન્નગમ્

કઙ્કગૃધ્રબલાનાં ચ ગોમાયુગણરક્ષસામ્
નિત્યં ભક્ષપ્રદં યુદ્ધે યમરૂપં ભયાવહમ્

નન્દનં વાનરેન્દ્રાણાં રક્ષસામ્ અવસાદનમ્
વાજિતં વિવિધૈર્ વાજૈશ્ ચારુચિત્રૈર્ ગરુત્મતઃ

તમ્ ઉત્તમેષું લોકાનામ્ ઇક્ષ્વાકુભયનાશનમ્
દ્વિષતાં કીર્તિહરણં પ્રહર્ષકરમ્ આત્મનઃ

અભિમન્ત્ર્ય તતો રામસ્ તં મહેષું મહાબલઃ
વેદપ્રોક્તેન વિધિના સંદધે કાર્મુકે બલી

સ રાવણાય સંક્રુદ્ધો ભૃશમ્ આયમ્ય કાર્મુકમ્
ચિક્ષેપ પરમ્ આયત્તસ્ તં શરં મર્મઘાતિનમ્

સ વજ્ર ઇવ દુર્ધર્ષો વજ્રબાહુવિસર્જિતઃ
કૃતાન્ત ઇવ ચાવાર્યો ન્યપતદ્ રાવણોરસિ

સ વિસૃષ્ટો મહાવેગઃ શરીરાન્તકરઃ શરઃ
બિભેદ હૃદયં તસ્ય રાવણસ્ય દુરાત્મનઃ

રુધિરાક્તઃ સ વેગેન જીવિતાન્તકરઃ શરઃ
રાવણસ્ય હરન્ પ્રાણાન્ વિવેશ ધરણીતલમ્

સ શરો રાવણં હત્વા રુધિરાર્દ્રકૃતચ્છવિઃ
કૃતકર્મા નિભૃતવત્ સ્વતૂણીં પુનર્ આવિશત્

તસ્ય હસ્તાદ્ ધતસ્યાશુ કાર્મુકં તત્ સસાયકમ્
નિપપાત સહ પ્રાણૈર્ ભ્રશ્યમાનસ્ય જીવિતાત્

ગતાસુર્ ભીમવેગસ્ તુ નૈરૃતેન્દ્રો મહાદ્યુતિઃ
પપાત સ્યન્દનાદ્ ભૂમૌ વૃત્રો વજ્રહતો યથા

તં દૃષ્ટ્વા પતિતં ભૂમૌ હતશેષા નિશાચરાઃ
હતનાથા ભયત્રસ્તાઃ સર્વતઃ સંપ્રદુદ્રુવુઃ

નર્દન્તશ્ ચાભિપેતુસ્ તાન્ વાનરા દ્રુમયોધિનઃ
દશગ્રીવવધં દૃષ્ટ્વા વિજયં રાઘવસ્ય ચ

અર્દિતા વાનરૈર્ હૃષ્ટૈર્ લઙ્કામ્ અભ્યપતન્ ભયાત્
હતાશ્રયત્વાત્ કરુણૈર્ બાષ્પપ્રસ્રવણૈર્ મુખૈઃ

તતો વિનેદુઃ સંહૃષ્ટા વાનરા જિતકાશિનઃ
વદન્તો રાઘવજયં રાવણસ્ય ચ તં વધમ્

અથાન્તરિક્ષે વ્યનદત્ સૌમ્યસ્ ત્રિદશદુન્દુભિઃ
દિવ્યગન્ધવહસ્ તત્ર મારુતઃ સુસુખો વવૌ

નિપપાતાન્તરિક્ષાચ્ ચ પુષ્પવૃષ્ટિસ્ તદા ભુવિ
કિરન્તી રાઘવરથં દુરવાપા મનોહરાઃ

રાઘવસ્તવસંયુક્તા ગગને ચ વિશુશ્રુવે
સાધુ સાધ્વ્ ઇતિ વાગ્ અગ્ર્યા દેવતાનાં મહાત્મનામ્

આવિવેશ મહાન્ હર્ષો દેવાનાં ચારણૈઃ સહ
રાવણે નિહતે રૌદ્રે સર્વલોકભયંકરે

તતઃ સકામં સુગ્રીવમ્ અઙ્ગદં ચ મહાબલમ્
ચકાર રાઘવઃ પ્રીતો હત્વા રાક્ષસપુંગવમ્

તતઃ પ્રજગ્મુઃ પ્રશમં મરુદ્ગણા દિશઃ પ્રસેદુર્ વિમલં નભો ઽભવત્
મહી ચકમ્પે ન ચ મારુતા વવુઃ સ્થિરપ્રભશ્ ચાપ્ય્ અભવદ્ દિવાકરઃ

તતસ્ તુ સુગ્રીવવિભીષણાદયઃ સુહૃદ્વિશેષાઃ સહલક્ષ્મણાસ્ તદા
સમેત્ય હૃષ્ટા વિજયેન રાઘવં રણે ઽભિરામં વિધિનાભ્યપૂજયન્

સ તુ નિહતરિપુઃ સ્થિરપ્રતિજ્ઞઃ સ્વજનબલાભિવૃતો રણે રરાજ
રઘુકુલનૃપનન્દનો મહૌજાસ્ ત્રિદશગણૈર્ અભિસંવૃતો યથેન્દ્રઃ