રામાયણ · અધ્યાય 6.086

મહોદરે તુ નિહતે મહાપાર્શ્વો મહાબલઃ
અઙ્ગદસ્ય ચમૂં ભીમાં ક્ષોભયામ્ આસ સાયકૈઃ

સ વાનરાણાં મુખ્યાનામ્ ઉત્તમાઙ્ગાનિ સર્વશઃ
પાતયામ્ આસ કાયેભ્યઃ ફલં વૃન્તાદ્ ઇવાનિલઃ

કેષાં ચિદ્ ઇષુભિર્ બાહૂન્ સ્કન્ધાંશ્ ચિછેદ રાક્ષસઃ
વાનરાણાં સુસંક્રુદ્ધઃ પાર્શ્વં કેષાં વ્યદારયત્

તે ઽર્દિતા બાણવર્ષેણ મહાપાર્શ્વેન વાનરાઃ
વિષાદવિમુખાઃ સર્વે બભૂવુર્ ગતચેતસઃ

નિરીક્ષ્ય બલમ્ ઉદ્વિગ્નમ્ અઙ્ગદો રાક્ષસાર્દિતમ્
વેગં ચક્રે મહાબાહુઃ સમુદ્ર ઇવ પર્વણિ

આયસં પરિઘં ગૃહ્ય સૂર્યરશ્મિસમપ્રભમ્
સમરે વાનરશ્રેષ્ઠો મહાપાર્શ્વે ન્યપાતયત્

સ તુ તેન પ્રહારેણ મહાપાર્શ્વો વિચેતનઃ
સસૂતઃ સ્યન્દનાત્ તસ્માદ્ વિસંજ્ઞઃ પ્રાપતદ્ ભુવિ

સર્ક્ષરાજસ્ તુ તેજસ્વી નીલાઞ્જનચયોપમઃ
નિષ્પત્ય સુમહાવીર્યઃ સ્વાદ્ યૂથાન્ મેઘસંનિભાત્

પ્રગૃહ્ય ગિરિશૃઙ્ગાભાં ક્રુદ્ધઃ સ વિપુલાં શિલામ્
અશ્વાઞ્ જઘાન તરસા સ્યન્દનં ચ બભઞ્જ તમ્

મુહૂર્તાલ્ લબ્ધસંજ્ઞસ્ તુ મહાપાર્શ્વો મહાબલઃ
અઙ્ગદં બહુભિર્ બાણૈર્ ભૂયસ્ તં પ્રત્યવિધ્યત

જામ્બવન્તં ત્રિભિર્ બાણૈર્ આજઘાન સ્તનાન્તરે
ઋક્ષરાજં ગવાક્ષં ચ જઘાન બહુભિઃ શરૈઃ

ગવાક્ષં જામ્બવન્તં ચ સ દૃષ્ટ્વા શરપીડિતૌ
જગ્રાહ પરિઘં ઘોરમ્ અઙ્ગદઃ ક્રોધમૂર્છિતઃ

તસ્યાઙ્ગદઃ પ્રકુપિતો રાક્ષસસ્ય તમ્ આયસં
દૂરસ્થિતસ્ય પરિઘં રવિરશ્મિસમપ્રભમ્

દ્વાભ્યાં ભુજાભ્યાં સંગૃહ્ય ભ્રામયિત્વા ચ વેગવાન્
મહાપાર્શ્વાય ચિક્ષેપ વધાર્થં વાલિનઃ સુતઃ

સ તુ ક્ષિપ્તો બલવતા પરિઘસ્ તસ્ય રક્ષસઃ
ધનુશ્ ચ સશરં હસ્તાચ્ છિરસ્ત્રં ચાપ્ય્ અપાતયત્

તં સમાસાદ્ય વેગેન વાલિપુત્રઃ પ્રતાપવાન્
તલેનાભ્યહનત્ ક્રુદ્ધઃ કર્ણમૂલે સકુણ્ડલે

સ તુ ક્રુદ્ધો મહાવેગો મહાપાર્શ્વો મહાદ્યુતિઃ
કરેણૈકેન જગ્રાહ સુમહાન્તં પરશ્વધમ્

તં તૈલધૌતં વિમલં શૈલસારમયં દૃઢમ્
રાક્ષસઃ પરમક્રુદ્ધો વાલિપુત્રે ન્યપાતયત્

તેન વામાંસફલકે ભૃશં પ્રત્યવપાતિતમ્
અઙ્ગદો મોક્ષયામ્ આસ સરોષઃ સ પરશ્વધમ્

સ વીરો વજ્રસંકાશમ્ અઙ્ગદો મુષ્ટિમ્ આત્મનઃ
સંવર્તયન્ સુસંક્રુદ્ધઃ પિતુસ્ તુલ્યપરાક્રમઃ

રાક્ષસસ્ય સ્તનાભ્યાશે મર્મજ્ઞો હૃદયં પ્રતિ
ઇન્દ્રાશનિસમસ્પર્શં સ મુષ્ટિં વિન્યપાતયત્

તેન તસ્ય નિપાતેન રાક્ષસસ્ય મહામૃધે
પફાલ હૃદયં ચાશુ સ પપાત હતો ભુવિ

તસ્મિન્ નિપતિતે ભૂમૌ તત્ સૈન્યં સંપ્રચુક્ષુભે
અભવચ્ ચ મહાન્ ક્રોધઃ સમરે રાવણસ્ય તુ