રામાયણ · અધ્યાય 6.079

રુધિરક્લિન્નગાત્રસ્ તુ લક્ષ્મણઃ શુભલક્ષણઃ
બભૂવ હૃષ્ટસ્ તં હત્વા શક્રજેતારમ્ આહવે

તતઃ સ જામ્બવન્તં ચ હનૂમન્તં ચ વીર્યવાન્
સંનિવર્ત્ય મહાતેજાસ્ તાંશ્ ચ સર્વાન્ વનૌકસઃ

આજગામ તતઃ શીઘ્રં યત્ર સુગ્રીવરાઘવૌ
વિભીષણમ્ અવષ્ટભ્ય હનૂમન્તં ચ લક્ષ્મણઃ

તતો રામમ્ અભિક્રમ્ય સૌમિત્રિર્ અભિવાદ્ય ચ
તસ્થૌ ભ્રાતૃસમીપસ્થઃ શક્રસ્યેન્દ્રાનુજો યથા
આચચક્ષે તદા વીરો ઘોરમ્ ઇન્દ્રજિતો વધમ્

રાવણસ્ તુ શિરશ્ છિન્નં લક્ષ્મણેન મહાત્મના
ન્યવેદયત રામાય તદા હૃષ્ટો વિભીષણઃ

ઉપવેશ્ય તમ્ ઉત્સઙ્ગે પરિષ્વજ્યાવપીડિતમ્
મૂર્ધ્નિ ચૈનમ્ ઉપાઘ્રાય ભૂયઃ સંસ્પૃશ્ય ચ ત્વરન્
ઉવાચ લક્ષ્મણં વાક્યમ્ આશ્વાસ્ય પુરુષર્ષભઃ

કૃતં પરમકલ્યાણં કર્મ દુષ્કરકારિણા
નિરમિત્રઃ કૃતો ઽસ્મ્ય્ અદ્ય નિર્યાસ્યતિ હિ રાવણઃ
બલવ્યૂહેન મહતા શ્રુત્વા પુત્રં નિપાતિતમ્

તં પુત્રવધસંતપ્તં નિર્યાન્તં રાક્ષસાધિપમ્
બલેનાવૃત્ય મહતા નિહનિષ્યામિ દુર્જયમ્

ત્વયા લક્ષ્મણ નાથેન સીતા ચ પૃથિવી ચ મે
ન દુષ્પ્રાપા હતે ત્વ્ અદ્ય શક્રજેતરિ ચાહવે

સ તં ભ્રાતરમ્ આશ્વાસ્ય પારિષ્વજ્ય ચ રાઘવઃ
રામઃ સુષેણં મુદિતઃ સમાભાષ્યેદમ્ અબ્રવીત્

સશલ્યો ઽયં મહાપ્રાજ્ઞઃ સૌમિત્રિર્ મિત્રવત્સલઃ
યથા ભવતિ સુસ્વસ્થસ્ તથા ત્વં સમુપાચર
વિશલ્યઃ ક્રિયતાં ક્ષિપ્રં સૌમિત્રિઃ સવિભીષણઃ

કૃષ વાનરસૈન્યાનાં શૂરાણાં દ્રુમયોધિનામ્
યે ચાન્યે ઽત્ર ચ યુધ્યન્તઃ સશલ્યા વ્રણિનસ્ તથા
તે ઽપિ સર્વે પ્રયત્નેન ક્રિયન્તાં સુખિનસ્ ત્વયા

એવમ્ ઉક્તઃ સ રામેણ મહાત્મા હરિયૂથપઃ
લક્ષ્મણાય દદૌ નસ્તઃ સુષેણઃ પરમૌષધમ્

સ તસ્ય ગન્ધમ્ આઘ્રાય વિશલ્યઃ સમપદ્યત
તદા નિર્વેદનશ્ ચૈવ સંરૂઢવ્રણ એવ ચ

વિભીષણ મુખાનાં ચ સુહૃદાં રાઘવાજ્ઞયા
સર્વવાનરમુખ્યાનાં ચિકિત્સાં સ તદાકરોત્

તતઃ પ્રકૃતિમ્ આપન્નો હૃતશલ્યો ગતવ્યથઃ
સૌમિત્રિર્ મુદિતસ્ તત્ર ક્ષણેન વિગતજ્વરઃ

તથૈવ રામઃ પ્લવગાધિપસ્ તદા વિભીષણશ્ ચર્ક્ષપતિશ્ ચ જામ્બવાન્
અવેક્ષ્ય સૌમિત્રિમ્ અરોગમ્ ઉત્થિતં મુદા સસૈન્યઃ સુચિરં જહર્ષિરે

અપૂજયત્ કર્મ સ લક્ષ્મણસ્ય સુદુષ્કરં દાશરથિર્ મહાત્મા
હૃષ્ટા બભૂવુર્ યુધિ યૂથપેન્દ્રા નિશમ્ય તં શક્રજિતં નિપાતિતમ્