રામાયણ · અધ્યાય 6.065

નિકુમ્ભં ચ હતં શ્રુત્વા કુમ્ભં ચ વિનિપાતિતમ્
રાવણઃ પરમામર્ષી પ્રજજ્વાલાનલો યથા

નૈરૃતઃ ક્રોધશોકાભ્યાં દ્વાભ્યાં તુ પરિમૂર્છિતઃ
ખરપુત્રં વિશાલાક્ષં મકરાક્ષમ્ અચોદયત્

ગચ્છ પુત્ર મયાજ્ઞપ્તો બલેનાભિસમન્વિતઃ
રાઘવં લક્ષ્મણં ચૈવ જહિ તૌ સવનૌકસૌ

રાવણસ્ય વચઃ શ્રુત્વા શૂરો માની ખરાત્મજઃ
બાઢમ્ ઇત્ય્ અબ્રવીદ્ ધૃષ્ટો મકરાક્ષો નિશાચરઃ

સો ઽભિવાદ્ય દશગ્રીવં કૃત્વા ચાપિ પ્રદક્ષિણમ્
નિર્જગામ ગૃહાચ્ છુભ્રાદ્ રાવણસ્યાજ્ઞયા બલી

સમીપસ્થં બલાધ્યક્ષં ખરપુત્રો ઽબ્રવીદ્ ઇદમ્
રથમ્ આનીયતાં શીઘ્રં સૈન્યં ચાનીયતાં ત્વરાત્

તસ્ય તદ્ વચનં શ્રુત્વા બલાધ્યક્ષો નિશાચરઃ
સ્યન્દનં ચ બલં ચૈવ સમીપં પ્રત્યપાદયત્

પ્રદક્ષિણં રથં કૃત્વા આરુરોહ નિશાચરઃ
સૂતં સંચોદયામ્ આસ શીઘ્રં મે રથમ્ આવહ

અથ તાન્ રાક્ષસાન્ સર્વાન્ મકરાક્ષો ઽબ્રવીદ્ ઇદમ્
યૂયં સર્વે પ્રયુધ્યધ્વં પુરસ્તાન્ મમ રાક્ષસાઃ

અહં રાક્ષસરાજેન રાવણેન મહાત્મના
આજ્ઞપ્તઃ સમરે હન્તું તાવ્ ઉભૌ રામલક્ષ્મણૌ

અદ્ય રામં વધિષ્યામિ લક્ષ્મણં ચ નિશાચરાઃ
શાખામૃગં ચ સુગ્રીવં વાનરાંશ્ ચ શરોત્તમૈઃ

અદ્ય શૂલનિપાતૈશ્ ચ વાનરાણાં મહાચમૂમ્
પ્રદહિષ્યામિ સંપ્રાપ્તાં શુષ્કેન્ધનમ્ ઇવાનલઃ

મકરાક્ષસ્ય તચ્ છ્રુત્વા વચનં તે નિશાચરાઃ
સર્વે નાનાયુધોપેતા બલવન્તઃ સમાહિતાઃ

તે કામરૂપિણઃ શૂરા દંષ્ટ્રિણઃ પિઙ્ગલેક્ષણાઃ
માતંગા ઇવ નર્દન્તો ધ્વસ્તકેશા ભયાનકાઃ

પરિવાર્ય મહાકાયા મહાકાયં ખરાત્મજમ્
અભિજગ્મુસ્ તદા હૃષ્ટાશ્ ચાલયન્તો વસુંધરામ્

શઙ્ખભેરીસહસ્રાણામ્ આહતાનાં સમન્તતઃ
ક્ષ્વેડિતાસ્ફોટિતાનાં ચ તતઃ શબ્દો મહાન્ અભૂત્

પ્રભ્રષ્ટો ઽથ કરાત્ તસ્ય પ્રતોદઃ સારથેસ્ તદા
પપાત સહસા ચૈવ ધ્વજસ્ તસ્ય ચ રક્ષસઃ

તસ્ય તે રથસંયુક્તા હયા વિક્રમવર્જિતાઃ
ચરણૈર્ આકુલૈર્ ગત્વા દીનાઃ સાસ્રમુખા યયુઃ

પ્રવાતિ પવનસ્ તસ્ય સપાંસુઃ ખરદારુણઃ
નિર્યાણે તસ્ય રૌદ્રસ્ય મકરાક્ષસ્ય દુર્મતેઃ

તાનિ દૃષ્ટ્વા નિમિત્તાનિ રાક્ષસા વીર્યવત્તમાઃ
અચિન્ત્યનિર્ગતાઃ સર્વે યત્ર તૌ રામલક્ષ્મણૌ

ઘનગજમહિષાઙ્ગતુલ્યવર્ણાઃ સમરમુખેષ્વ્ અસકૃદ્ ગદાસિભિન્નાઃ
અહમ્ અહમ્ ઇતિ યુદ્ધકૌશલાસ્ તે રજનિચરાઃ પરિબભ્રમુર્ નદન્તઃ