રામાયણ · અધ્યાય 6.050

સ તુ રાક્ષસશાર્દૂલો નિદ્રામદસમાકુલઃ
રાજમાર્ગં શ્રિયા જુષ્ટં યયૌ વિપુલવિક્રમઃ

રાક્ષસાનાં સહસ્રૈશ્ ચ વૃતઃ પરમદુર્જયઃ
ગૃહેભ્યઃ પુષ્પવર્ષેણ કાર્યમાણસ્ તદા યયૌ

સ હેમજાલવિતતં ભાનુભાસ્વરદર્શનમ્
દદર્શ વિપુલં રમ્યં રાક્ષસેન્દ્રનિવેશનમ્

સ તત્ તદા સૂર્ય ઇવાભ્રજાલં પ્રવિશ્ય રક્ષોઽધિપતેર્ નિવેશનમ્
દદર્શ દૂરે ઽગ્રજમ્ આસનસ્થં સ્વયમ્ભુવં શક્ર ઇવાસનસ્થમ્

સો ઽભિગમ્ય ગૃહં ભ્રાતુઃ કક્ષ્યામ્ અભિવિગાહ્ય ચ
દદર્શોદ્વિગ્નમ્ આસીનં વિમાને પુષ્પકે ગુરુમ્

અથ દૃષ્ટ્વા દશગ્રીવઃ કુમ્ભકર્ણમ્ ઉપસ્થિતમ્
તૂર્ણમ્ ઉત્થાય સંહૃષ્ટઃ સંનિકર્ષમ્ ઉપાનયત્

અથાસીનસ્ય પર્યઙ્કે કુમ્ભકર્ણો મહાબલઃ
ભ્રાતુર્ વવન્દે ચરણાં કિં કૃત્યમ્ ઇતિ ચાબ્રવીત્
ઉત્પત્ય ચૈનં મુદિતો રાવણઃ પરિષસ્વજે

સ ભ્રાત્રા સંપરિષ્વક્તો યથાવચ્ ચાભિનન્દિતઃ
કુમ્ભકર્ણઃ શુભં દિવ્યં પ્રતિપેદે વરાસનમ્

સ તદાસનમ્ આશ્રિત્ય કુમ્ભકર્ણો મહાબલઃ
સંરક્તનયનઃ કોપાદ્ રાવણં વાક્યમ્ અબ્રવીત્

કિમર્થમ્ અહમ્ આદૃત્ય ત્વયા રાજન્ પ્રબોધિતઃ
શંસ કસ્માદ્ ભયં તે ઽસ્તિ કો ઽદ્ય પ્રેતો ભવિષ્યતિ

ભ્રાતરં રાવણઃ ક્રુદ્ધં કુમ્ભકર્ણમ્ અવસ્થિતમ્
ઈષત્ તુ પરિવૃત્તાભ્યાં નેત્રાભ્યાં વાક્યમ્ અબ્રવીત્

અદ્ય તે સુમહાન્ કાલઃ શયાનસ્ય મહાબલ
સુખિતસ્ ત્વં ન જાનીષે મમ રામકૃતં ભયમ્

એષ દાશરથી રામઃ સુગ્રીવસહિતો બલી
સમુદ્રં સબલસ્ તીર્ત્વા મૂલં નઃ પરિકૃન્તતિ

હન્ત પશ્યસ્વ લઙ્કાયા વનાન્ય્ ઉપવનાનિ ચ
સેતુના સુખમ્ આગમ્ય વાનરૈકાર્ણવં કૃતમ્

યે રાક્ષસા મુખ્યતમા હતાસ્ તે વાનરૈર્ યુધિ
વાનરાણાં ક્ષયં યુદ્ધે ન પશ્યામિ કદા ચન

સર્વક્ષપિતકોશં ચ સ ત્વમ્ અભ્યવપદ્ય મામ્
ત્રાયસ્વેમાં પુરીં લઙ્કાં બાલવૃદ્ધાવશેષિતામ્

ભ્રાતુર્ અર્થે મહાબાહો કુરુ કર્મ સુદુષ્કરમ્
મયૈવં નોક્તપૂર્વો હિ કશ્ ચિદ્ ભ્રાતઃ પરંતપ
ત્વય્ય્ અસ્તિ મમ ચ સ્નેહઃ પરા સંભાવના ચ મે

દેવાસુરવિમર્દેષુ બહુશો રાક્ષસર્ષભ
ત્વયા દેવાઃ પ્રતિવ્યૂહ્ય નિર્જિતાશ્ ચાસુરા યુધિ
ન હિ તે સર્વભૂતેષુ દૃશ્યતે સદૃશો બલી

કુરુષ્વ મે પ્રિયહિતમ્ એતદ્ ઉત્તમં યથાપ્રિયં પ્રિયરણબાન્ધવપ્રિય
સ્વતેજસા વિધમ સપત્નવાહિનીં શરદ્ઘનં પવન ઇવોદ્યતો મહાન્