રામાયણ · અધ્યાય 6.037

પ્રતિપ્રવિષ્ટે લઙ્કાં તુ કૃતાર્થે રાવણાત્મજે
રાઘવં પરિવાર્યાર્તા રરક્ષુર્ વાનરર્ષભાઃ

હનૂમાન્ અઙ્ગદો નીલઃ સુષેણઃ કુમુદો નલઃ
ગજો ગવાક્ષો ગવયઃ શરભો ગન્ધમાદનઃ

જામ્બવાન્ ઋષભઃ સુન્દો રમ્ભઃ શતબલિઃ પૃથુઃ
વ્યૂઢાનીકાશ્ ચ યત્તાશ્ ચ દ્રુમાન્ આદાય સર્વતઃ

વીક્ષમાણા દિશઃ સર્વાસ્ તિર્યગ્ ઊર્ધ્વં ચ વાનરાઃ
તૃણેષ્વ્ અપિ ચ ચેષ્ટત્સુ રાક્ષસા ઇતિ મેનિરે

રાવણશ્ ચાપિ સંહૃષ્ટો વિસૃજ્યેન્દ્રજિતં સુતમ્
આજુહાવ તતઃ સીતા રક્ષણી રાક્ષસીસ્ તદા

રાક્ષસ્યસ્ ત્રિજટા ચાપિ શાસનાત્ તમ્ ઉપસ્થિતાઃ
તા ઉવાચ તતો હૃષ્ટો રાક્ષસી રાક્ષસેશ્વરઃ

હતાવ્ ઇન્દ્રજિતાખ્યાત વૈદેહ્યા રામલક્ષ્મણૌ
પુષ્પકં ચ સમારોપ્ય દર્શયધ્વં હતૌ રણે

યદ્ આશ્રયાદ્ અવષ્ટબ્ધો નેયં મામ્ ઉપતિષ્ઠતિ
સો ઽસ્યા ભર્તા સહ ભ્રાત્રા નિરસ્તો રણમૂર્ધનિ

નિર્વિશઙ્કા નિરુદ્વિગ્ના નિરપેક્ષા ચ મૈથિલી
મામ્ ઉપસ્થાસ્યતે સીતા સર્વાભરણભૂષિતા

અદ્ય કાલવશં પ્રાપ્તં રણે રામં સલક્ષ્મણમ્
અવેક્ષ્ય વિનિવૃત્તાશા નાન્યાં ગતિમ્ અપશ્યતી

તસ્ય તદ્ વચનં શ્રુત્વા રાવણસ્ય દુરાત્મનઃ
રાક્ષસ્યસ્ તાસ્ તથેત્ય્ ઉક્ત્વા પ્રજગ્મુર્ યત્ર પુષ્પકમ્

તતઃ પુષ્પકમ્ આદય રાક્ષસ્યો રાવણાજ્ઞયા
અશોકવનિકાસ્થાં તાં મૈથિલીં સમુપાનયન્

તામ્ આદાય તુ રાક્ષસ્યો ભર્તૃશોકપરાયણામ્
સીતામ્ આરોપયામ્ આસુર્ વિમાનં પુષ્પકં તદા

તતઃ પુષ્પકમ્ આરોપ્ય સીતાં ત્રિજટયા સહ
રાવણો ઽકારયલ્ લઙ્કાં પતાકાધ્વજમાલિનીમ્

પ્રાઘોષયત હૃષ્ટશ્ ચ લઙ્કાયાં રાક્ષસેશ્વરઃ
રાઘવો લક્ષ્મણશ્ ચૈવ હતાવ્ ઇન્દ્રજિતા રણે

વિમાનેનાપિ સીતા તુ ગત્વા ત્રિજટયા સહ
દદર્શ વાનરાણાં તુ સર્વં સિન્યં નિપાતિતમ્

પ્રહૃષ્ટમનસશ્ ચાપિ દદર્શ પિશિતાશનાન્
વાનરાંશ્ ચાપિ દુઃખાર્તાન્ રામલક્ષ્મણપાર્શ્વતઃ

તતઃ સીતા દદર્શોભૌ શયાનૌ શતતલ્પયોઃ
લક્ષ્મણં ચૈવ રામં ચ વિસંજ્ઞૌ શરપીડિતૌ

વિધ્વસ્તકવચૌ વીરૌ વિપ્રવિદ્ધશરાસનૌ
સાયકૈશ્ છિન્નસર્વાઙ્ગૌ શરસ્તમ્ભમયૌ ક્ષિતૌ

તૌ દૃષ્ટ્વા ભ્રાતરૌ તત્ર વીરૌ સા પુરુષર્ષભૌ
દુઃખાર્તા સુભૃશં સીતા કરુણં વિલલાપ હ

સા બાષ્પશોકાભિહતા સમીક્ષ્ય તૌ ભ્રાતરૌ દેવસમપ્રભાવૌ
વિતર્કયન્તી નિધનં તયોઃ સા દુઃખાન્વિતા વાક્યમ્ ઇદં જગાદ