રામાયણ · અધ્યાય 6.035

સ તસ્ય ગતિમ્ અન્વિચ્છન્ રાજપુત્રઃ પ્રતાપવાન્
દિદેશાતિબલો રામો દશવાનરયૂથપાન્

દ્વૌ સુષેણસ્ય દાયાદૌ નીલં ચ પ્લવગર્ષભમ્
અઙ્ગદં વાલિપુત્રં ચ શરભં ચ તરસ્વિનમ્

વિનતં જામ્બવન્તં ચ સાનુપ્રસ્થં મહાબલમ્
ઋષભં ચર્ષભસ્કન્ધમ્ આદિદેશ પરંતપઃ

તે સંપ્રહૃષ્ટા હરયો ભીમાન્ ઉદ્યમ્ય પાદપાન્
આકાશં વિવિશુઃ સર્વે માર્ગામાણા દિશો દશ

તેષાં વેગવતાં વેગમ્ ઇષુભિર્ વેગવત્તરૈઃ
અસ્ત્રવિત્ પરમાસ્ત્રેણ વારયામ્ આસ રાવણિઃ

તં ભીમવેગા હરયો નારાચૈઃ ક્ષતવિક્ષતાઃ
અન્ધકારે ન દદૃશુર્ મેઘૈઃ સૂર્યમ્ ઇવાવૃતમ્

રામલક્ષ્મણયોર્ એવ સર્વમર્મભિદઃ શરાન્
ભૃશમ્ આવેશયામ્ આસ રાવણિઃ સમિતિંજયઃ

નિરન્તરશરીરૌ તુ ભ્રાતરૌ રામલક્ષ્મણૌ
ક્રુદ્ધેનેન્દ્રજિતા વીરૌ પન્નગૈઃ શરતાં ગતૈઃ

તયોઃ ક્ષતજમાર્ગેણ સુસ્રાવ રુધિરં બહુ
તાવ્ ઉભૌ ચ પ્રકાશેતે પુષ્પિતાવ્ ઇવ કિંશુકૌ

તતઃ પર્યન્તરક્તાક્ષો ભિન્નાઞ્જનચયોપમઃ
રાવણિર્ ભ્રાતરૌ વાક્યમ્ અન્તર્ધાનગતો ઽબ્રવીત્

યુધ્યમાનમ્ અનાલક્ષ્યં શક્રો ઽપિ ત્રિદશેશ્વરઃ
દ્રષ્ટુમ્ આસાદિતું વાપિ ન શક્તઃ કિં પુનર્ યુવામ્

પ્રાવૃતાવ્ ઇષુજાલેન રાઘવૌ કઙ્કપત્રિણા
એષ રોષપરીતાત્મા નયામિ યમસાદનમ્

એવમ્ ઉક્ત્વા તુ ધર્મજ્ઞૌ ભ્રાતરૌ રામલક્ષ્મણૌ
નિર્બિભેદ શિતૈર્ બાણૈઃ પ્રજહર્ષ નનાદ ચ

ભિન્નાઞ્જનચયશ્યામો વિસ્ફાર્ય વિપુલં ધનુઃ
ભૂયો ભૂયઃ શરાન્ ઘોરાન્ વિસસર્જ મહામૃધે

તતો મર્મસુ મર્મજ્ઞો મજ્જયન્ નિશિતાઞ્ શરાન્
રામલક્ષ્મણયોર્ વીરો નનાદ ચ મુહુર્ મુહુઃ

બદ્ધૌ તુ શરબન્ધેન તાવ્ ઉભૌ રણમૂર્ધનિ
નિમેષાન્તરમાત્રેણ ન શેકતુર્ ઉદીક્ષિતુમ્

તતો વિભિન્નસર્વાઙ્ગૌ શરશલ્યાચિતાવ્ ઉભૌ
ધ્વજાવ્ ઇવ મહેન્દ્રસ્ય રજ્જુમુક્તૌ પ્રકમ્પિતૌ

તૌ સંપ્રચલિતૌ વીરૌ મર્મભેદેન કર્શિતૌ
નિપેતતુર્ મહેષ્વાસૌ જગત્યાં જગતીપતી

તૌ વીરશયને વીરૌ શયાનૌ રુધિરોક્ષિતૌ
શરવેષ્ટિતસર્વાઙ્ગાવ્ આર્તૌ પરમપીડિતૌ

ન હ્ય્ અવિદ્ધં તયોર્ ગાત્રં બભૂવાઙ્ગુલમ્ અન્તરમ્
નાનિર્ભિન્નં ન ચાસ્તબ્ધમ્ આ કરાગ્રાદ્ અજિહ્મગૈઃ

તૌ તુ ક્રૂરેણ નિહતૌ રક્ષસા કામરૂપિણા
અસૃક્સુસ્રુવતુસ્ તીવ્રં જલં પ્રસ્રવણાવ્ ઇવ

પપાત પ્રથમં રામો વિદ્ધો મર્મસુ માર્ગણૈઃ
ક્રોધાદ્ ઇન્દ્રજિતા યેન પુરા શક્રો વિનિર્જિતઃ

નારચૈર્ અર્ધનારાચૈર્ ભલ્લૈર્ અઞ્જલિકૈર્ અપિ
વિવ્યાધ વત્સદન્તૈશ્ ચ સિંહદંષ્ટ્રૈઃ ક્ષુરૈસ્ તથા

સ વીરશયને શિશ્યે વિજ્યમ્ આદાય કાર્મુકમ્
ભિન્નમુષ્ટિપરીણાહં ત્રિણતં રુક્મભૂષિતમ્

બાણપાતાન્તરે રામં પતિતં પુરુષર્ષભમ્
સ તત્ર લક્ષ્મણો દૃષ્ટ્વા નિરાશો જીવિતે ઽભવત્

બદ્ધૌ તુ વીરૌ પતિતૌ શયાનૌ તૌ વાનરાઃ સંપરિવાર્ય તસ્થુઃ
સમાગતા વાયુસુતપ્રમુખ્યા વિષદમ્ આર્તાઃ પરમં ચ જગ્મુઃ