રામાયણ · અધ્યાય 6.032

તતસ્ તે રાક્ષસાસ્ તત્ર ગત્વા રાવણમન્દિરમ્
ન્યવેદયન્ પુરીં રુદ્ધાં રામેણ સહ વાનરૈઃ

રુદ્ધાં તુ નગરીં શ્રુત્વા જાતક્રોધો નિશાચરઃ
વિધાનં દ્વિગુણં શ્રુત્વા પ્રાસાદં સો ઽધ્યરોહત

સ દદર્શાવૃતાં લઙ્કાં સશૈલવનકાનનામ્
અસંખ્યેયૈર્ હરિગણૈઃ સર્વતો યુદ્ધકાઙ્ક્ષિભિઃ

સ દૃષ્ટ્વા વાનરૈઃ સર્વાં વસુધાં કવલીકૃતામ્
કથં ક્ષપયિતવ્યાઃ સ્યુર્ ઇતિ ચિન્તાપરો ઽભવત્

સ ચિન્તયિત્વા સુચિરં ધૈર્યમ્ આલમ્બ્ય રાવણઃ
રાઘવં હરિયૂથાંશ્ ચ દદર્શાયતલોચનઃ

પ્રેક્ષતો રાક્ષસેન્દ્રસ્ય તાન્ય્ અનીકાનિ ભાગશઃ
રાઘવપ્રિયકામાર્થં લઙ્કામ્ આરુરુહુસ્ તદા

તે તામ્રવક્ત્રા હેમાભા રામાર્થે ત્યક્તજીવિતાઃ
લઙ્કામ્ એવાહ્યવર્તન્ત સાલતાલશિલાયુધાઃ

તે દ્રુમૈઃ પર્વતાગ્રૈશ્ ચ મુષ્ટિભિશ્ ચ પ્લવંગમાઃ
પ્રાસાદાગ્રાણિ ચોચ્ચાનિ મમન્તુસ્ તોરણાનિ ચ

પારિખાઃ પૂરયન્તિ સ્મ પ્રસન્નસલિલાયુતાઃ
પાંસુભિઃ પર્વતાગ્રૈશ્ ચ તૃણૈઃ કાષ્ઠૈશ્ ચ વાનરાઃ

તતઃ સહસ્રયૂથાશ્ ચ કોટિયૂથાશ્ ચ યૂથપાઃ
કોટીશતયુતાશ્ ચાન્યે લઙ્કામ્ આરુરુહુસ્ તદા

કાઞ્ચનાનિ પ્રમૃદ્નન્તસ્ તોરણાનિ પ્લવંગમાઃ
કૈલાસશિખરાભાનિ ગોપુરાણિ પ્રમથ્ય ચ

આપ્લવન્તઃ પ્લવન્તશ્ ચ ગર્જન્તશ્ ચ પ્લવંગમાઃ
લઙ્કાં તામ્ અભ્યવર્તન્ત મહાવારણસંનિભાઃ

જયત્ય્ અતિબલો રામો લક્ષ્મણશ્ ચ મહાબલઃ
રાજા જયતિ સુગ્રીવો રાઘવેણાભિપાલિતઃ

ઇત્ય્ એવં ઘોષયન્તશ્ ચ ગર્જન્તશ્ ચ પ્લવંગમાઃ
અભ્યધાવન્ત લઙ્કાયાઃ પ્રાકારં કામરૂપિણઃ

વીરબાહુઃ સુબાહુશ્ ચ નલશ્ ચ વનગોચરઃ
નિપીડ્યોપનિવિષ્ટાસ્ તે પ્રાકારં હરિયૂથપાઃ

એતસ્મિન્ન્ અન્તરે ચક્રુઃ સ્કન્ધાવારનિવેશનમ્

પૂર્વદ્વારં તુ કુમુદઃ કોટિભિર્ દશભિર્ વૃતઃ
આવૃત્ય બલવાંસ્ તસ્થૌ હરિભિર્ જિતકાશિભિઃ

દક્ષિણદ્વારમ્ આગમ્ય વીરઃ શતબલિઃ કપિઃ
આવૃત્ય બલવાંસ્ તસ્થૌ વિંશત્યા કોટિભિર્ વૃતઃ

સુષેણઃ પશ્ચિમદ્વારં ગતસ્ તારા પિતા હરિઃ
આવૃત્ય બલવાંસ્ તસ્થૌ ષષ્ટિ કોટિભિર્ આવૃતઃ

ઉત્તરદ્વારમ્ આસાદ્ય રામઃ સૌમિત્રિણા સહ
આવૃત્ય બલવાંસ્ તસ્થૌ સુગ્રીવશ્ ચ હરીશ્વરઃ

ગોલાઙ્ગૂલો મહાકાયો ગવાક્ષો ભીમદર્શનઃ
વૃતઃ કોટ્યા મહાવીર્યસ્ તસ્થૌ રામસ્ય પાર્વતઃ

ઋષ્કાણાં ભીમવેગાનાં ધૂમ્રઃ શત્રુનિબર્હણઃ
વૃતઃ કોટ્યા મહાવીર્યસ્ તસ્થૌ રામસ્ય પાર્શ્વતઃ

સંનદ્ધસ્ તુ મહાવીર્યો ગદાપાણિર્ વિભીષણઃ
વૃતો યસ્ તૈસ્ તુ સચિવૈસ્ તસ્થૌ તત્ર મહાબલઃ

ગજો ગવાક્ષો ગવયઃ શરભો ગન્ધમાદનઃ
સમન્તાત્ પરિઘાવન્તો રરક્ષુર્ હરિવાહિનીમ્

તતઃ કોપપરીતાત્મા રાવણો રાક્ષસેશ્વરઃ
નિર્યાણં સર્વસૈન્યાનાં દ્રુતમ્ આજ્ઞાપયત્ તદા

નિષ્પતન્તિ તતઃ સૈન્યા હૃષ્ટા રાવણચોદિતાઃ
સમયે પૂર્યમાણસ્ય વેગા ઇવ મહોદધેઃ

એતસ્મિન્ન્ અન્તરે ઘોરઃ સંગ્રામઃ સમપદ્યત
રક્ષસાં વાનરાણાં ચ યથા દેવાસુરે પુરા

તે ગદાભિઃ પ્રદીપ્તાભિઃ શક્તિશૂલપરશ્વધૈઃ
નિજઘ્નુર્ વાનરાન્ ઘોરાઃ કથયન્તઃ સ્વવિક્રમાન્

તથા વૃક્ષૈર્ મહાકાયાઃ પર્વતાગ્રૈશ્ ચ વાનરાઃ
રાક્ષસાસ્ તાનિ રક્ષાંસિ નખૈર્ દન્તૈશ્ ચ વેગિતાઃ

રાક્ષસાસ્ ત્વ્ અપરે ભીમાઃ પ્રાકારસ્થા મહીગતાન્
ભિણ્ડિપાલૈશ્ ચ ખડ્ગૈશ્ ચ શૂલૈશ્ ચૈવ વ્યદારયન્

વાનરાશ્ ચાપિ સંક્રુદ્ધાઃ પ્રાકારસ્થાન્ મહીગતાઃ
રાક્ષસાન્ પાતયામ્ આસુઃ સમાપ્લુત્ય પ્લવંગમાઃ

સ સંપ્રહારસ્ તુમુલો માંસશોણિતકર્દમઃ
રક્ષસાં વાનરાણાં ચ સંબભૂવાદ્ભુતોપમાઃ