રામાયણ · અધ્યાય 6.030

તાં રાત્રિમ્ ઉષિતાસ્ તત્ર સુવેલે હરિપુંગવાઃ
લઙ્કાયાં દદૃશુર્ વીરા વનાન્ય્ ઉપવનાનિ ચ

સમસૌમ્યાનિ રમ્યાણિ વિશાલાન્ય્ આયતાનિ ચ
દૃષ્ટિરમ્યાણિ તે દૃષ્ટ્વા બભૂવુર્ જાતવિસ્મયાઃ

ચમ્પકાશોકપુંનાગસાલતાલસમાકુલા
તમાલવનસંછન્ના નાગમાલાસમાવૃતા

હિન્તાલૈર્ અર્જુનૈર્ નીપૈઃ સપ્તપર્ણૈશ્ ચ પુષ્પિતૈઃ
તિલકૈઃ કર્ણિકારૈશ્ ચ પટાલૈશ્ ચ સમન્તતઃ

શુશુભે પુષ્પિતાગ્રૈશ્ ચ લતાપરિગતૈર્ દ્રુમૈઃ
લઙ્કા બહુવિધૈર્ દિવ્યૈર્ યથેન્દ્રસ્યામરાવતી

વિચિત્રકુસુમોપેતૈ રક્તકોમલપલ્લવૈઃ
શાદ્વલૈશ્ ચ તથા નીલૈશ્ ચિત્રાભિર્ વનરાજિભિઃ

ગન્ધાઢ્યાન્ય્ અભિરમ્યાણિ પુષ્પાણિ ચ ફલાનિ ચ
ધારયન્ત્ય્ અગમાસ્ તત્ર ભૂષણાનીવ માનવાઃ

તચ્ ચૈત્રરથસંકાશં મનોજ્ઞં નન્દનોપમમ્
વનં સર્વર્તુકં રમ્યં શુશુભે ષટ્પદાયુતમ્

નત્યૂહકોયષ્ટિભકૈર્ નૃત્યમાનૈશ્ ચ બર્હિભિઃ
રુતં પરભૃતાનાં ચ શુશ્રુવે વનનિર્ઝરે

નિત્યમત્તવિહંગાનિ ભ્રમરાચરિતાનિ ચ
કોકિલાકુલષણ્ડાનિ વિહગાભિરુતાનિ ચ

ભૃઙ્ગરાજાભિગીતાનિ ભ્રમરૈઃ સેવિતાનિ ચ
કોણાલકવિઘુષ્ટાનિ સારસાભિરુતાનિ ચ

વિવિશુસ્ તે તતસ્ તાનિ વનાન્ય્ ઉપવનાનિ ચ
હૃષ્ટાઃ પ્રમુદિતા વીરા હરયઃ કામરૂપિણઃ

તેષાં પ્રવિશતાં તત્ર વાનરાણાં મહૌજસામ્
પુષ્પસંસર્ગસુરભિર્ વવૌ ઘ્રાણસુખો ઽનિલઃ

અન્યે તુ હરિવીરાણાં યૂથાન્ નિષ્ક્રમ્ય યૂથપાઃ
સુગ્રીવેણાભ્યનુજ્ઞાતા લઙ્કાં જગ્મુઃ પતાકિનીમ્

વિત્રાસયન્તો વિહગાંસ્ ત્રાસયન્તો મૃગદ્વિપાન્
કમ્પયન્તશ્ ચ તાં લઙ્કાં નાદૈઃ સ્વૈર્ નદતાં વરાઃ

કુર્વન્તસ્ તે મહાવેગા મહીં ચારણપીડિતામ્
રજશ્ ચ સહસૈવોર્ધ્વં જગામ ચરણોદ્ધતમ્

ઋક્ષાઃ સિંહા વરાહાશ્ ચ મહિષા વારણા મૃગાઃ
તેન શબ્દેન વિત્રસ્તા જગ્મુર્ ભીતા દિશો દશ

શિખરં તુ ત્રિકૂટસ્ય પ્રાંશુ ચૈકં દિવિસ્પૃશમ્
સમન્તાત્ પુષ્પસંછન્નં મહારજતસંનિભમ્

શતયોજનવિસ્તીર્ણં વિમલં ચારુદર્શનમ્
શ્લક્ષ્ણં શ્રીમન્ મહચ્ ચૈવ દુષ્પ્રાપં શકુનૈર્ અપિ

મનસાપિ દુરારોહં કિં પુનઃ કર્મણા જનૈઃ
નિવિષ્ટા તત્ર શિખરે લઙ્કા રાવણપાલિતા

સા પુરી ગોપુરૈર્ ઉચ્ચૈઃ પાણ્ડુરામ્બુદસંનિભૈઃ
કાઞ્ચનેન ચ સાલેન રાજતેન ચ શોભિતા

પ્રાસાદૈશ્ ચ વિમાનૈશ્ ચ લઙ્કા પરમભૂષિતા
ઘનૈર્ ઇવાતપાપાયે મધ્યમં વૈષ્ણવં પદમ્

યસ્યાં સ્તમ્ભસહસ્રેણ પ્રાસાદઃ સમલંકૃતઃ
કૈલાસશિખરાકારો દૃશ્યતે ખમ્ ઇવોલ્લિખન્

ચૈત્યઃ સ રાક્ષસેન્દ્રસ્ય બભૂવ પુરભૂષણમ્
શતેન રક્ષસાં નિત્યં યઃ સમગ્રેણ રક્ષ્યતે

તાં સમૃદ્ધાં સમૃદ્ધાર્થો લક્ષ્મીવાંલ્ લક્ષ્મણાગ્રજઃ
રાવણસ્ય પુરીં રામો દદર્શ સહ વાનરૈઃ

તાં રત્નપૂર્ણાં બહુસંવિધાનાં પ્રાસાદમાલાભિર્ અલંકૃતાં ચ
પુરીં મહાયન્ત્રકવાટમુખ્યાં દદર્શ રામો મહતા બલેન