રામાયણ · અધ્યાય 6.029

સ તુ કૃત્વા સુવેલસ્ય મતિમ્ આરોહણં પ્રતિ
લક્ષ્મણાનુગતો રામઃ સુગ્રીવમ્ ઇદમ્ અબ્રવીત્

વિભીષણં ચ ધર્મજ્ઞમ્ અનુરક્તં નિશાચરમ્
મન્ત્રજ્ઞં ચ વિધિજ્ઞં ચ શ્લક્ષ્ણયા પરયા ગિરા

સુવેલં સાધુ શૈલેન્દ્રમ્ ઇમં ધાતુશતૈશ્ ચિતમ્
અધ્યારોહામહે સર્વે વત્સ્યામો ઽત્ર નિશામ્ ઇમામ્

લઙ્કાં ચાલોકયિષ્યામો નિલયં તસ્ય રક્ષસઃ
યેન મે મરણાન્તાય હૃતા ભાર્યા દુરાત્મના

યેન ધર્મો ન વિજ્ઞાતો ન વૃત્તં ન કુલં તથા
રાક્ષસ્યા નીચયા બુદ્ધ્યા યેન તદ્ ગર્હિતં કૃતમ્

યસ્મિન્ મે વર્ધતે રોષઃ કીર્તિતે રાક્ષસાધમે
યસ્યાપરાધાન્ નીચસ્ય વધં દ્રક્ષ્યામિ રક્ષસામ્

એકો હિ કુરુતે પાપં કાલપાશવશં ગતઃ
નીચેનાત્માપચારેણ કુલં તેન વિનશ્યતિ

એવં સંમન્ત્રયન્ન્ એવ સક્રોધો રાવણં પ્રતિ
રામઃ સુવેલં વાસાય ચિત્રસાનુમ્ ઉપારુહત્

પૃષ્ઠતો લક્ષ્મણ ચૈનમ્ અન્વગચ્છત્ સમાહિતઃ
સશરં ચાપમ્ ઉદ્યમ્ય સુમહદ્ વિક્રમે રતઃ

તમ્ અન્વરોહત્ સુગ્રીવઃ સામાત્યઃ સવિભીષણઃ
હનૂમાન્ અઙ્ગદો નીલો મૈન્દો દ્વિવિદ એવ ચ

ગજો ગવાક્ષો ગવયઃ શરભો ગન્ધમાદનઃ
પનસઃ કુમુદશ્ ચૈવ હરો રમ્ભશ્ ચ યૂથપઃ

એતે ચાન્યે ચ બહવો વાનરાઃ શીઘ્રગામિનઃ
તે વાયુવેગપ્રવણાસ્ તં ગિરિં ગિરિચારિણઃ
અધ્યારોહન્ત શતશઃ સુવેલં યત્ર રાઘવઃ

તે ત્વ્ અદીર્ઘેણ કાલેન ગિરિમ્ આરુહ્ય સર્વતઃ
દદૃશુઃ શિખરે તસ્ય વિષક્તામ્ ઇવ ખે પુરીમ્

તાં શુભાં પ્રવરદ્વારાં પ્રાકારવરશોભિતામ્
લઙ્કાં રાક્ષસસંપૂર્ણાં દદૃશુર્ હરિયૂથપાઃ

પ્રાકારચયસંસ્થૈશ્ ચ તથા નીલૈર્ નિશાચરૈઃ
દદૃશુસ્ તે હરિશ્રેષ્ઠાઃ પ્રાકારમ્ અપરં કૃતમ્

તે દૃષ્ટ્વા વાનરાઃ સર્વે રાક્ષસાન્ યુદ્ધકાઙ્ક્ષિણઃ
મુમુચુર્ વિપુલાન્ નાદાંસ્ તત્ર રામસ્ય પશ્યતઃ

તતો ઽસ્તમ્ અગમત્ સૂર્યઃ સંધ્યયા પ્રતિરઞ્જિતઃ
પૂર્ણચન્દ્રપ્રદીપા ચ ક્ષપા સમભિવર્તતે

તતઃ સ રામો હરિવાહિનીપતિર્ વિભીષણેન પ્રતિનન્દ્ય સત્કૃતઃ
સલક્ષ્મણો યૂથપયૂથસંવૃતઃ સુવેલ પૃષ્ઠે ન્યવસદ્ યથાસુખમ્