રામાયણ · અધ્યાય 6.024

સીતાં તુ મોહિતાં દૃષ્ટ્વા સરમા નામ રાક્ષસી
આસસાદાશુ વૈદેહીં પ્રિયાં પ્રણયિની સખી

સા હિ તત્ર કૃતા મિત્રં સીતયા રક્ષ્યમાણયા
રક્ષન્તી રાવણાદ્ ઇષ્ટા સાનુક્રોશા દૃઢવ્રતા

સા દદર્શ સખીં સીતાં સરમા નષ્ટચેતનામ્
ઉપાવૃત્યોત્થિતાં ધ્વસ્તાં વડવામ્ ઇવ પાંસુષુ

તાં સમાશ્વાસયામ્ આસ સખી સ્નેહેન સુવ્રતા
ઉક્તા યદ્ રાવણેન ત્વં પ્રત્યુક્તં ચ સ્વયં ત્વયા

સખીસ્નેહેન તદ્ ભીરુ મયા સર્વં પ્રતિશ્રુતમ્
લીનયા ગનહે શૂહ્યે ભયમ્ ઉત્સૃજ્ય રાવણાત્
તવ હેતોર્ વિશાલાક્ષિ ન હિ મે જીવિતં પ્રિયમ્

સ સંભ્રાન્તશ્ ચ નિષ્ક્રાન્તો યત્ કૃતે રાક્ષસાધિપઃ
તચ્ ચ મે વિદિતં સર્વમ્ અભિનિષ્ક્રમ્ય મૈથિલિ

ન શક્યં સૌપ્તિકં કર્તું રામસ્ય વિદિતાત્મનઃ
વધશ્ ચ પુરુષવ્યાઘ્રે તસ્મિન્ન્ એવોપપદ્યતે

ન ચૈવ વાનરા હન્તું શક્યાઃ પાદપયોધિનઃ
સુરા દેવર્ષભેણેવ રામેણ હિ સુરક્ષિતાઃ

દીર્ઘવૃત્તભુજઃ શ્રીમાન્ મહોરસ્કઃ પ્રતાપવાન્
ધન્વી સંહનનોપેતો ધર્માત્મા ભુવિ વિશ્રુતઃ

વિક્રાન્તો રક્ષિતા નિત્યમ્ આત્મનશ્ ચ પરસ્ય ચ
લક્ષ્મણેન સહ ભ્રાત્રા કુશલી નયશાસ્ત્રવિત્

હન્તા પરબલૌઘાનામ્ અચિન્ત્યબલપૌરુષઃ
ન હતો રાઘવઃ શ્રીમાન્ સીતે શત્રુનિબર્હણઃ

અયુક્તબુદ્ધિકૃત્યેન સર્વભૂતવિરોધિના
ઇયં પ્રયુક્તા રૌદ્રેણ માયા માયાવિદા ત્વયિ

શોકસ્ તે વિગતઃ સર્વઃ કલ્યાણં ત્વામ્ ઉપસ્થિતમ્
ધ્રુવં ત્વાં ભજતે લક્ષ્મીઃ પ્રિયં પ્રીતિકરં શૃણુ

ઉત્તીર્ય સાગરં રામઃ સહ વાનરસેનયા
સંનિવિષ્ટઃ સમુદ્રસ્ય તીરમ્ આસાદ્ય દક્ષિણમ્

દૃષ્ટો મે પરિપૂર્ણાર્થઃ કાકુત્સ્થઃ સહલક્ષ્મણઃ
સહિતૈઃ સાગરાન્તસ્થૈર્ બલૈસ્ તિષ્ઠતિ રક્ષિતઃ

અનેન પ્રેષિતા યે ચ રાક્ષસા લઘુવિક્રમઃ
રાઘવસ્ તીર્ણ ઇત્ય્ એવં પ્રવૃત્તિસ્ તૈર્ ઇહાહૃતા

સ તાં શ્રુત્વા વિશાલાક્ષિ પ્રવૃત્તિં રાક્ષસાધિપઃ
એષ મન્ત્રયતે સર્વૈઃ સચિવૈઃ સહ રાવણઃ

ઇતિ બ્રુવાણા સરમા રાક્ષસી સીતયા સહ
સર્વોદ્યોગેન સૈન્યાનાં શબ્દં શુશ્રાવ ભૈરવમ્

દણ્ડનિર્ઘાતવાદિન્યાઃ શ્રુત્વા ભેર્યા મહાસ્વનમ્
ઉવાચ સરમા સીતામ્ ઇદં મધુરભાષિણી

સંનાહજનની હ્ય્ એષા ભૈરવા ભીરુ ભેરિકા
ભેરીનાદં ચ ગમ્ભીરં શૃણુ તોયદનિસ્વનમ્

કલ્પ્યન્તે મત્તમાતંગા યુજ્યન્તે રથવાજિનઃ
તત્ર તત્ર ચ સંનદ્ધાઃ સંપતન્તિ પદાતયઃ

આપૂર્યન્તે રાજમાર્ગાઃ સૈન્યૈર્ અદ્ભુતદર્શનૈઃ
વેગવદ્ભિર્ નદદ્ભિશ્ ચ તોયૌઘૈર્ ઇવ સાગરઃ

શાસ્ત્રાણાં ચ પ્રસન્નાનાં ચર્મણાં વર્મણાં તથા
રથવાજિગજાનાં ચ ભૂષિતાનાં ચ રક્ષસામ્

પ્રભાં વિસૃજતાં પશ્ય નાનાવર્ણાં સમુત્થિતામ્
વનં નિર્દહતો ધર્મે યથારૂપં વિભાવસોઃ

ઘણ્ટાનાં શૃણુ નિર્ઘોષં રથાનાં શૃણુ નિસ્વનમ્
હયાનાં હેષમાણાનાં શૃણુ તૂર્યધ્વનિં યથા

ઉદ્યતાયુધહસ્તાનાં રાક્ષસેન્દ્રાનુયાયિનામ્
સંભ્રમો રક્ષસામ્ એષ તુમુલો લોમહર્ષણઃ

શ્રીસ્ ત્વાં ભજતિ શોકઘ્ની રક્ષસાં ભયમ્ આગતમ્
રામાત્ કમલપત્રાક્ષિ દૈત્યાનામ્ ઇવ વાસવાત્

અવજિત્ય જિતક્રોધસ્ તમ્ અચિન્ત્યપરાક્રમઃ
રાવણં સમરે હત્વા ભર્તા ત્વાધિગમિષ્યતિ

વિક્રમિષ્યતિ રક્ષઃસુ ભર્તા તે સહલક્ષ્મણઃ
યથા શત્રુષુ શત્રુઘ્નો વિષ્ણુના સહ વાસવઃ

આગતસ્ય હિ રામસ્ય ક્ષિપ્રમ્ અઙ્કગતાં સતીમ્
અહં દ્રક્ષ્યામિ સિદ્ધાર્થાં ત્વાં શત્રૌ વિનિપાતિતે

અશ્રૂણ્ય્ આનન્દજાનિ ત્વં વર્તયિષ્યસિ શોભને
સમાગમ્ય પરિષ્વક્તા તસ્યોરસિ મહોરસઃ

અચિરાન્ મોક્ષ્યતે સીતે દેવિ તે જઘનં ગતામ્
ધૃતામ્ એતાં બહૂન્ માસાન્ વેણીં રામો મહાબલઃ

તસ્ય દૃષ્ટ્વા મુખં દેવિ પૂર્ણચન્દ્રમ્ ઇવોદિતમ્
મોક્ષ્યસે શોકજં વારિ નિર્મોકમ્ ઇવ પન્નગી

રાવણં સમરે હત્વા નચિરાદ્ એવ મૈથિલિ
ત્વયા સમગ્રં પ્રિયયા સુખાર્હો લપ્સ્યતે સુખમ્

સમાગતા ત્વં રામેણ મોદિષ્યસિ મહાત્મના
સુવર્ષેણ સમાયુક્તા યથા સસ્યેન મેદિની

ગિરિવરમ્ અભિતો ઽનુવર્તમાનો હય ઇવ મણ્ડલમ્ આશુ યઃ કરોતિ
તમ્ ઇહ શરણમ્ અભ્યુપેહિ દેવિ દિવસકરં પ્રભવો હ્ય્ અયં પ્રજાનામ્