રામાયણ · અધ્યાય 6.019

સારણસ્ય વચઃ શ્રુત્વા રાવણં રાક્ષસાધિપમ્
બલમ્ આલોકયન્ સર્વં શુકો વાક્યમ્ અથાબ્રવીત્

સ્થિતાન્ પશ્યસિ યાન્ એતાન્ મત્તાન્ ઇવ મહાદ્વિપાન્
ન્યગ્રોધાન્ ઇવ ગાઙ્ગેયાન્ સાલાન્ હૈમવતીન્ ઇવ

એતે દુષ્પ્રસહા રાજન્ બલિનઃ કામરૂપિણઃ
દૈત્યદાનવસંકાશા યુદ્ધે દેવપરાક્રમાઃ

એષાં કોટિસહસ્રાણિ નવ પઞ્ચચ સપ્ત ચ
તથા શઙ્ખસહસ્રાણિ તથા વૃન્દશતાનિ ચ

એતે સુગ્રીવસચિવાઃ કિષ્કિન્ધાનિલયાઃ સદા
હરયો દેવગન્ધર્વૈર્ ઉત્પન્નાઃ કામરૂપિણઃ

યૌ તૌ પશ્યસિ તિષ્ઠન્તૌ કુમારૌ દેવરૂપિણૌ
મૈન્દશ્ ચ દ્વિવિદશ્ ચોભૌ તાભ્યાં નાસ્તિ સમો યુધિ

બ્રહ્મણા સમનુજ્ઞાતાવ્ અમૃતપ્રાશિનાવ્ ઉભૌ
આશંસેતે યુધા લઙ્કામ્ એતૌ મર્દિતુમ્ ઓજસા

યાવ્ એતાવ્ એતયોઃ પાર્શ્વે સ્થિતૌ પર્વતસંનિભૌ
સુમુખો વિમુખશ્ ચૈવ મૃત્યુપુત્રૌ પિતુઃ સમૌ

યં તુ પશ્યસિ તિષ્ઠન્તં પ્રભિન્નમ્ ઇવ કુઞ્જરમ્
યો બલાત્ ક્ષોભયેત્ ક્રુદ્ધઃ સમુદ્રમ્ અપિ વાનરઃ

એષો ઽભિગન્તા લઙ્કાયા વૈદેહ્યાસ્ તવ ચ પ્રભો
એનં પશ્ય પુરા દૃષ્ટં વાનરં પુનર્ આગતમ્

જ્યેષ્ઠઃ કેસરિણઃ પુત્રો વાતાત્મજ ઇતિ શ્રુતઃ
હનૂમાન્ ઇતિ વિખ્યાતો લઙ્ઘિતો યેન સાગરઃ

કામરૂપી હરિશ્રેષ્ઠો બલરૂપસમન્વિતઃ
અનિવાર્યગતિશ્ ચૈવ યથા સતતગઃ પ્રભુઃ

ઉદ્યન્તં ભાસ્કરં દૃષ્ટ્વા બાલઃ કિલ પિપાસિતઃ
ત્રિયોજનસહસ્રં તુ અધ્વાનમ્ અવતીર્ય હિ

આદિત્યમ્ આહરિષ્યામિ ન મે ક્ષુત્ પ્રતિયાસ્યતિ
ઇતિ સંચિન્ત્ય મનસા પુરૈષ બલદર્પિતઃ

અનાધૃષ્યતમં દેવમ્ અપિ દેવર્ષિદાનવૈઃ
અનાસાદ્યૈવ પતિતો ભાસ્કરોદયને ગિરૌ

પતિતસ્ય કપેર્ અસ્ય હનુર્ એકા શિલાતલે
કિં ચિદ્ ભિન્ના દૃઢહનોર્ હનૂમાન્ એષ તેન વૈ

સત્યમ્ આગમયોગેન મમૈષ વિદિતો હરિઃ
નાસ્ય શક્યં બલં રૂપં પ્રભાવો વાનુભાષિતુમ્

એષ આશંસતે લઙ્કામ્ એકો મર્દિતુમ્ ઓજસા
યશ્ ચૈષો ઽનન્તરઃ શૂરઃ શ્યામઃ પદ્મનિભેક્ષણઃ

ઇક્ષ્વાકૂણામ્ અતિરથો લોકે વિખ્યાત પૌરુષઃ
યસ્મિન્ ન ચલતે ધર્મો યો ધર્મં નાતિવર્તતે

યો બ્રાહ્મમ્ અસ્ત્રં વેદાંશ્ ચ વેદ વેદવિદાં વરઃ
યો ભિન્દ્યાદ્ ગગનં બાણૈઃ પર્વતાંશ્ ચાપિ દારયેત્

યસ્ય મૃત્યોર્ ઇવ ક્રોધઃ શક્રસ્યેવ પરાક્રમઃ
સ એષ રામસ્ ત્વાં યોદ્ધું રાજન્ સમભિવર્તતે

યશ્ ચૈષ દક્ષિણે પાર્શ્વે શુદ્ધજામ્બૂનદપ્રભઃ
વિશાલવક્ષાસ્ તામ્રાક્ષો નીલકુઞ્ચિતમૂર્ધજઃ

એષો ઽસ્ય લક્ષ્મણો નામ ભ્રાતા પ્રાણસમઃ પ્રિયઃ
નયે યુદ્ધે ચ કુશલઃ સર્વશાસ્ત્રવિશારદઃ

અમર્ષી દુર્જયો જેતા વિક્રાન્તો બુદ્ધિમાન્ બલી
રામસ્ય દક્ષિણો બાહુર્ નિત્યં પ્રાણો બહિશ્ચરઃ

ન હ્ય્ એષ રાઘવસ્યાર્થે જીવિતં પરિરક્ષતિ
એષૈવાશંસતે યુદ્ધે નિહન્તું સર્વરાક્ષસાન્

યસ્ તુ સવ્યમ્ અસૌ પક્ષં રામસ્યાશ્રિત્ય તિષ્ઠતિ
રક્ષોગણપરિક્ષિપ્તો રાજા હ્ય્ એષ વિભીષણઃ

શ્રીમતા રાજરાજેન લઙ્કાયામ્ અભિષેચિતઃ
ત્વામ્ એવ પ્રતિસંરબ્ધો યુદ્ધાયૈષો ઽભિવર્તતે

યં તુ પશ્યસિ તિષ્ઠન્તં મધ્યે ગિરિમ્ ઇવાચલમ્
સર્વશાખામૃગેન્દ્રાણાં ભર્તારમ્ અપરાજિતમ્

તેજસા યશસા બુદ્ધ્યા જ્ઞાનેનાભિજનેન ચ
યઃ કપીન્ અતિ બભ્રાજ હિમવાન્ ઇવ પર્વતાન્

કિષ્કિન્ધાં યઃ સમધ્યાસ્તે ગુહાં સગહનદ્રુમામ્
દુર્ગાં પર્વતદુર્ગસ્થાં પ્રધાનૈઃ સહ યૂથપૈઃ

યસ્યૈષા કાઞ્ચની માલા શોભતે શતપુષ્કરા
કાન્તા દેવમનુષ્યાણાં યસ્યાં લક્ષ્મીઃ પ્રતિષ્ઠિતા

એતાં ચ માલાં તારાં ચ કપિરાજ્યં ચ શાશ્વતમ્
સુગ્રીવો વાલિનં હત્વા રામેણ પ્રતિપાદિતઃ

એવં કોટિસહસ્રેણ શઙ્કૂનાં ચ શતેન ચ
સુગ્રીવો વાનરેન્દ્રસ્ ત્વાં યુદ્ધાર્થમ્ અભિવર્તતે

ઇમાં મહારાજસમીક્ષ્ય વાહિનીમ્ ઉપસ્થિતાં પ્રજ્વલિતગ્રહોપમામ્
તતઃ પ્રયત્નઃ પરમો વિધીયતાં યથા જયઃ સ્યાન્ ન પરૈઃ પરાજયઃ