રામાયણ · અધ્યાય 6.016

સબલે સાગરં તીર્ણે રામે દશરથાત્મજે
અમાત્યૌ રાવણઃ શ્રીમાન્ અબ્રવીચ્ છુકસારણૌ

સમગ્રં સાગરં તીર્ણં દુસ્તરં વાનરં બલમ્
અભૂતપૂર્વં રામેણ સાગરે સેતુબન્ધનમ્

સાગરે સેતુબન્ધં તુ ન શ્રદ્દધ્યાં કથં ચન
અવશ્યં ચાપિ સંખ્યેયં તન્ મયા વાનરં બલમ્

ભવન્તૌ વાનરં સૈન્યં પ્રવિશ્યાનુપલક્ષિતૌ
પરિમાણં ચ વીર્યં ચ યે ચ મુખ્યાઃ પ્લવંગમાઃ

મન્ત્રિણો યે ચ રામસ્ય સુગ્રીવસ્ય ચ સંમતાઃ
યે પૂર્વમ્ અભિવર્તન્તે યે ચ શૂરાઃ પ્લવંગમાઃ

સ ચ સેતુર્ યથા બદ્ધઃ સાગરે સલિલાર્ણવે
નિવેશશ્ ચ યથા તેષાં વાનરાણાં મહાત્મનામ્

રામસ્ય વ્યવસાયં ચ વીર્યં પ્રહરણાનિ ચ
લક્ષ્મણસ્ય ચ વીરસ્ય તત્ત્વતો જ્ઞાતુમ્ અર્હથ

કશ્ ચ સેનાપતિસ્ તેષાં વાનરાણાં મહૌજસામ્
એતજ્ જ્ઞાત્વા યથાતત્ત્વં શીઘ્રમ્ અગન્તુમ્ અર્હથઃ

ઇતિ પ્રતિસમાદિષ્ટૌ રાક્ષસૌ શુકસારણૌ
હરિરૂપધરૌ વીરૌ પ્રવિષ્ટૌ વાનરં બલમ્

તતસ્ તદ્ વાનરં સૈન્યમ્ અચિન્ત્યં લોમહર્ષણમ્
સંખ્યાતું નાધ્યગચ્છેતાં તદા તૌ શુકસારણૌ

તત્ સ્થિતં પર્વતાગ્રેષુ નિર્દરેષુ ગુહાસુ ચ
સમુદ્રસ્ય ચ તીરેષુ વનેષૂપવનેષુ ચ

તરમાણં ચ તીર્ણં ચ તર્તુકામં ચ સર્વશઃ
નિવિષ્ટં નિવિશચ્ ચૈવ ભીમનાદં મહાબલમ્

તૌ દદર્શ મહાતેજાઃ પ્રચ્છન્નૌ ચ વિભીષણઃ
આચચક્ષે ઽથ રામાય ગૃહીત્વા શુકસારણૌ
લઙ્કાયાઃ સમનુપ્રાપ્તૌ ચારૌ પરપુરંજયૌ

તૌ દૃષ્ટ્વા વ્યથિતૌ રામં નિરાશૌ જીવિતે તદા
કૃતાઞ્જલિપુટૌ ભીતૌ વચનં ચેદમ્ ઊચતુઃ

આવામ્ ઇહાગતૌ સૌમ્ય રાવણપ્રહિતાવ્ ઉભૌ
પરિજ્ઞાતું બલં કૃત્સ્નં તવેદં રઘુનન્દન

તયોસ્ તદ્ વચનં શ્રુત્વા રામો દશરથાત્મજઃ
અબ્રવીત્ પ્રહસન્ વાક્યં સર્વભૂતહિતે રતઃ

યદિ દૃષ્ટં બલં કૃત્સ્નં વયં વા સુસમીક્ષિતાઃ
યથોક્તં વા કૃતં કાર્યં છન્દતઃ પ્રતિગમ્યતામ્

પ્રવિશ્ય નગરીં લઙ્કાં ભવદ્ભ્યાં ધનદાનુજઃ
વક્તવ્યો રક્ષસાં રાજા યથોક્તં વચનં મમ

યદ્ બલં ચ સમાશ્રિત્ય સીતાં મે હૃતવાન્ અસિ
તદ્ દર્શય યથાકામં સસૈન્યઃ સહબાન્ધવઃ

શ્વઃકાલે નગરીં લઙ્કાં સપ્રાકારાં સતોરણામ્
રાક્ષસં ચ બલં પશ્ય શરૈર્ વિધ્વંસિતં મયા

ઘોરં રોષમ્ અહં મોક્ષ્યે બલં ધારય રાવણ
શ્વઃકાલે વજ્રવાન્ વજ્રં દાનવેષ્વ્ ઇવ વાસવઃ

ઇતિ પ્રતિસમાદિષ્ટૌ રાક્ષસૌ શુકસારણૌ
આગમ્ય નગરીં લઙ્કામ્ અબ્રૂતાં રાક્ષસાધિપમ્

વિભીષણગૃહીતૌ તુ વધાર્હૌ રાક્ષસેશ્વર
દૃષ્ટ્વા ધર્માત્મના મુક્તૌ રામેણામિતતેજસા

એકસ્થાનગતા યત્ર ચત્વારઃ પુરુષર્ષભાઃ
લોકપાલોપમાઃ શૂરાઃ કૃતાસ્ત્રા દૃઢવિક્રમાઃ

રામો દાશરથિઃ શ્રીમાંલ્ લક્ષ્મણશ્ ચ વિભીષણઃ
સુગ્રીવશ્ ચ મહાતેજા મહેન્દ્રસમવિક્રમઃ

એતે શક્તાઃ પુરીં લઙ્કાં સપ્રાકારાં સતોરણામ્
ઉત્પાટ્ય સંક્રામયિતું સર્વે તિષ્ઠન્તુ વાનરાઃ

યાદૃશં તસ્ય રામસ્ય રૂપં પ્રહરણાનિ ચ
વધિષ્યતિ પુરીં લઙ્કામ્ એકસ્ તિષ્ઠન્તુ તે ત્રયઃ

રામલક્ષ્મણગુપ્તા સા સુગ્રીવેણ ચ વાહિની
બભૂવ દુર્ધર્ષતરા સર્વૈર્ અપિ સુરાસુરૈઃ

પ્રહૃષ્ટરૂપા ધ્વજિની વનૌકસાં મહાત્મનાં સંપ્રતિ યોદ્ધુમ્ ઇચ્છતામ્
અલં વિરોધેન શમો વિધીયતાં પ્રદીયતાં દાશરથાય મૈથિલી