રામાયણ · અધ્યાય 6.015

તતો મધ્યાત્ સમુદ્રસ્ય સાગરઃ સ્વયમ્ ઉત્થિતઃ
ઉદયન્ હિ મહાશૈલાન્ મેરોર્ ઇવ દિવાકરઃ
પન્નગૈઃ સહ દીપ્તાસ્યૈઃ સમુદ્રઃ પ્રત્યદૃશ્યત

સ્નિગ્ધવૈદૂર્યસંકાશો જામ્બૂનદવિભૂષિતઃ
રક્તમાલ્યામ્બરધરઃ પદ્મપત્રનિભેક્ષણઃ

સાગરઃ સમતિક્રમ્ય પૂર્વમ્ આમન્ત્ર્ય વીર્યવાન્
અબ્રવીત્ પ્રાઞ્જલિર્ વાક્યં રાઘવં શરપાણિનમ્

પૃથિવી વાયુર્ આકાશમ્ આપો જ્યોતિશ્ ચ રાઘવઃ
સ્વભાવે સૌમ્ય તિષ્ઠન્તિ શાશ્વતં માર્ગમ્ આશ્રિતાઃ

તત્ સ્વભાવો મમાપ્ય્ એષ યદ્ અગાધો ઽહમ્ અપ્લવઃ
વિકારસ્ તુ ભવેદ્ રાધ એતત્ તે પ્રવદામ્ય્ અહમ્

ન કામાન્ ન ચ લોભાદ્ વા ન ભયાત્ પાર્થિવાત્મજ
ગ્રાહનક્રાકુલજલં સ્તમ્ભયેયં કથં ચન

વિધાસ્યે રામ યેનાપિ વિષહિષ્યે હ્ય્ અહં તથા
ગ્રાહા ન પ્રહરિષ્યન્તિ યાવત્ સેના તરિષ્યતિ

અયં સૌમ્ય નલો નામ તનુજો વિશ્વકર્મણઃ
પિત્રા દત્તવરઃ શ્રીમાન્ પ્રતિમો વિશ્વકર્મણઃ

એષ સેતું મહોત્સાહઃ કરોતુ મયિ વાનરઃ
તમ્ અહં ધારયિષ્યામિ તથા હ્ય્ એષ યથા પિતા

એવમ્ ઉક્ત્વોદધિર્ નષ્ટઃ સમુત્થાય નલસ્ તતઃ
અબ્રવીદ્ વાનરશ્રેષ્ઠો વાક્યં રામં મહાબલઃ

અહં સેતું કરિષ્યામિ વિસ્તીર્ણે વરુણાલયે
પિતુઃ સામર્થ્યમ્ આસ્થાય તત્ત્વમ્ આહ મહોદધિઃ

મમ માતુર્ વરો દત્તો મન્દરે વિશ્વકર્મણા
ઔરસસ્ તસ્ય પુત્રો ઽહં સદૃશો વિશ્વકર્મણા

ન ચાપ્ય્ અહમ્ અનુક્તો વૈ પ્રબ્રૂયામ્ આત્મનો ગુણાન્
કામમ્ અદ્યૈવ બધ્નન્તુ સેતું વાનરપુંગવાઃ

તતો નિસૃષ્ટરામેણ સર્વતો હરિયૂથપાઃ
અભિપેતુર્ મહારણ્યં હૃષ્ટાઃ શતસહસ્રશઃ

તે નગાન્ નગસંકાશાઃ શાખામૃગગણર્ષભાઃ
બભઞ્જુર્ વાનરાસ્ તત્ર પ્રચકર્ષુશ્ ચ સાગરમ્

તે સાલૈશ્ ચાશ્વકર્ણૈશ્ ચ ધવૈર્ વંશૈશ્ ચ વાનરાઃ
કુટજૈર્ અર્જુનૈસ્ તાલૈસ્ તિકલૈસ્ તિમિશૈર્ અપિ

બિલ્વકૈઃ સપ્તપર્ણૈશ્ ચ કર્ણિકારૈશ્ ચ પુષ્પિતૈઃ
ચૂતૈશ્ ચાશોકવૃક્ષૈશ્ ચ સાગરં સમપૂરયન્

સમૂલાંશ્ ચ વિમૂલાંશ્ ચ પાદપાન્ હરિસત્તમાઃ
ઇન્દ્રકેતૂન્ ઇવોદ્યમ્ય પ્રજહ્રુર્ હરયસ્ તરૂન્

પ્રક્ષિપ્યમાણૈર્ અચલૈઃ સહસા જલમ્ ઉદ્ધતમ્
સમુત્પતિતમ્ આકાશમ્ અપાસર્પત્ તતસ્ તતઃ

દશયોજનવિસ્તીર્ણં શતયોજનમ્ આયતમ્
નલશ્ ચક્રે મહાસેતું મધ્યે નદનદીપતેઃ

શિલાનાં ક્ષિપ્યમાણાનાં શૈલાનાં તત્ર પાત્યતામ્
બભૂવ તુમુલઃ શબ્દસ્ તદા તસ્મિન્ મહોદધૌ

સ નલેન કૃતઃ સેતુઃ સાગરે મકરાલયે
શુશુભે સુભગઃ શ્રીમાન્ સ્વાતીપથ ઇવામ્બરે

તતો દેવાઃ સગન્ધર્વાઃ સિદ્ધાશ્ ચ પરમર્ષયઃ

આપ્લવન્તઃ પ્લવન્તશ્ ચ ગર્જન્તશ્ ચ પ્લવંગમાઃ
તમ્ અચિન્ત્યમ્ અસહ્યં ચ અદ્ભુતં લોમહર્ષણમ્
દદૃશુઃ સર્વભૂતાનિ સાગરે સેતુબન્ધનમ્

તાનિ કોટિસહસ્રાણિ વાનરાણાં મહૌજસામ્
બધ્નન્તઃ સાગરે સેતું જગ્મુઃ પારં મહોદધેઃ

વિશાલઃ સુકૃતઃ શ્રીમાન્ સુભૂમિઃ સુસમાહિતઃ
અશોભત મહાસેતુઃ સીમન્ત ઇવ સાગરે

તતઃ પરે સમુદ્રસ્ય ગદાપાણિર્ વિભીષણઃ
પરેષામ્ અભિઘતાર્થમ્ અતિષ્ઠત્ સચિવૈઃ સહ

અગ્રતસ્ તસ્ય સૈન્યસ્ય શ્રીમાન્ રામઃ સલક્ષ્મણઃ
જગામ ધન્વી ધર્માત્મા સુગ્રીવેણ સમન્વિતઃ

અન્યે મધ્યેન ગચ્છન્તિ પાર્શ્વતો ઽન્યે પ્લવંગમાઃ
સલિલે પ્રપતન્ત્ય્ અન્યે માર્ગમ્ અન્યે ન લેભિરે
કે ચિદ્ વૈહાયસ ગતાઃ સુપર્ણા ઇવ પુપ્લુવુઃ

ઘોષેણ મહતા ઘોષં સાગરસ્ય સમુચ્છ્રિતમ્
ભીમમ્ અન્તર્દધે ભીમા તરન્તી હરિવાહિની

વાનરાણાં હિ સા તીર્ણા વાહિની નલ સેતુના
તીરે નિવિવિશે રાજ્ઞા બહુમૂલફલોદકે

તદ્ અદ્ભુતં રાઘવ કર્મ દુષ્કરં સમીક્ષ્ય દેવાઃ સહ સિદ્ધચારણૈઃ
ઉપેત્ય રામં સહિતા મહર્ષિભિઃ સમભ્યષિઞ્ચન્ સુશુભૈર્ જલૈઃ પૃથક્

જયસ્વ શત્રૂન્ નરદેવ મેદિનીં સસાગરાં પાલય શાશ્વતીઃ સમાઃ
ઇતીવ રામં નરદેવસત્કૃતં શુભૈર્ વચોભિર્ વિવિધૈર્ અપૂજયન્