રામાયણ · અધ્યાય 6.013

રાઘવેણાભયે દત્તે સંનતો રાવણાનુજઃ
ખાત્ પપાતાવનિં હૃષ્ટો ભક્તૈર્ અનુચરૈઃ સહ

સ તુ રામસ્ય ધર્માત્મા નિપપાત વિભીષણઃ
પાદયોઃ શરણાન્વેષી ચતુર્ભિઃ સહ રાક્ષસૈઃ

અબ્રવીચ્ ચ તદા રામં વાક્યં તત્ર વિભીષણઃ
ધર્મયુક્તં ચ યુક્તં ચ સામ્પ્રતં સંપ્રહર્ષણમ્

અનુજો રાવણસ્યાહં તેન ચાસ્મ્ય્ અવમાનિતઃ
ભવન્તં સર્વભૂતાનાં શરણ્યં શરણં ગતઃ

પરિત્યક્તા મયા લઙ્કા મિત્રાણિ ચ ધનાનિ ચ
ભવદ્ગતં મે રાજ્યં ચ જીવિતં ચ સુખાનિ ચ

રાક્ષસાનાં વધે સાહ્યં લઙ્કાયાશ્ ચ પ્રધર્ષણે
કરિષ્યામિ યથાપ્રાણં પ્રવેક્ષ્યામિ ચ વાહિનીમ્

ઇતિ બ્રુવાણં રામસ્ તુ પરિષ્વજ્ય વિભીષણમ્
અબ્રવીલ્ લક્ષ્મણં પ્રીતઃ સમુદ્રાજ્ જલમ્ આનય

તેન ચેમં મહાપ્રાજ્ઞમ્ અભિષિઞ્ચ વિભીષણમ્
રાજાનં રક્ષસાં ક્ષિપ્રં પ્રસન્ને મયિ માનદ

એવમ્ ઉક્તસ્ તુ સૌમિત્રિર્ અભ્યષિઞ્ચદ્ વિભીષણમ્
મધ્યે વાનરમુખ્યાનાં રાજાનં રામશાસનાત્

તં પ્રસાદં તુ રામસ્ય દૃષ્ટ્વા સદ્યઃ પ્લવંગમાઃ
પ્રચુક્રુશુર્ મહાનાદાન્ સાધુ સાધ્વ્ ઇતિ ચાબ્રુવન્

અબ્રવીચ્ ચ હનૂમાંશ્ ચ સુગ્રીવશ્ ચ વિભીષણમ્
કથં સાગરમ્ અક્ષોભ્યં તરામ વરુણાલયમ્

ઉપાયૈર્ અભિગચ્છામો યથા નદનદીપતિમ્
તરામ તરસા સર્વે સસૈન્યા વરુણાલયમ્

એવમ્ ઉક્તસ્ તુ ધર્મજ્ઞઃ પ્રત્યુવાચ વિભીષણઃ
સમુદ્રં રાઘવો રાજા શરણં ગન્તુમ્ અર્હતિ

ખાનિતઃ સગરેણાયમ્ અપ્રમેયો મહોદધિઃ
કર્તુમ્ અર્હતિ રામસ્ય જ્ઞાતેઃ કાર્યં મહોદધિઃ

એવં વિભીષણેનોક્તે રાક્ષસેન વિપશ્ચિતા
પ્રકૃત્યા ધર્મશીલસ્ય રાઘવસ્યાપ્ય્ અરોચત

સ લક્ષ્મણં મહાતેજાઃ સુગ્રીવં ચ હરીશ્વરમ્
સત્ક્રિયાર્થં ક્રિયાદક્ષઃ સ્મિતપૂર્વમ્ ઉવાચ હ

વિભીષણસ્ય મન્ત્રો ઽયં મમ લક્ષ્મણ રોચતે
બ્રૂહિ ત્વં સહસુગ્રીવસ્ તવાપિ યદિ રોચતે

સુગ્રીવઃ પણ્ડિતો નિત્યં ભવાન્ મન્ત્રવિચક્ષણઃ
ઉભાભ્યાં સંપ્રધાર્યાર્યં રોચતે યત્ તદ્ ઉચ્યતામ્

એવમ્ ઉક્તૌ તુ તૌ વીરાવ્ ઉભૌ સુગ્રીવલક્ષ્મણૌ
સમુદાચાર સંયુક્તમ્ ઇદં વચનમ્ ઊચતુઃ

કિમર્થં નો નરવ્યાઘ્ર ન રોચિષ્યતિ રાઘવ
વિભીષણેન યત્ તૂક્તમ્ અસ્મિન્ કાલે સુખાવહમ્

અબદ્ધ્વા સાગરે સેતું ઘોરે ઽસ્મિન્ વરુણાલયે
લઙ્કા નાસાદિતું શક્યા સેન્દ્રૈર્ અપિ સુરાસુરૈઃ

વિભીષણસ્ય શૂરસ્ય યથાર્થં ક્રિયતાં વચઃ
અલં કાલાત્યયં કૃત્વા સમુદ્રો ઽયં નિયુજ્યતામ્

એવમ્ ઉક્તઃ કુશાસ્તીર્ણે તીરે નદનદીપતેઃ
સંવિવેશ તદા રામો વેદ્યામ્ ઇવ હુતાશનઃ