રામાયણ · અધ્યાય 6.009

તતો નિકુમ્ભો રભસઃ સૂર્યશત્રુર્ મહાબલઃ
સુપ્તઘ્નો યજ્ઞકોપશ્ ચ મહાપાર્શ્વો મહોદરઃ

અગ્નિકેતુશ્ ચ દુર્ધર્ષો રશ્મિકેતુશ્ ચ રાક્ષસઃ
ઇન્દ્રજિચ્ ચ મહાતેજા બલવાન્ રાવણાત્મજઃ

પ્રહસ્તો ઽથ વિરૂપાક્ષો વજ્રદંષ્ટ્રો મહાબલઃ
ધૂમ્રાક્ષશ્ ચાતિકાયશ્ ચ દુર્મુખશ્ ચૈવ રાક્ષસઃ

પરિઘાન્ પટ્ટસાન્ પ્રાસાઞ્ શક્તિશૂલપરશ્વધાન્
ચાપાનિ ચ સબાણાનિ ખડ્ગાંશ્ ચ વિપુલાઞ્ શિતાન્

પ્રગૃહ્ય પરમક્રુદ્ધાઃ સમુત્પત્ય ચ રાક્ષસાઃ
અબ્રુવન્ રાવણં સર્વે પ્રદીપ્તા ઇવ તેજસા

અદ્ય રામં વધિષ્યામઃ સુગ્રીવં ચ સલક્ષ્મણમ્
કૃપણં ચ હનૂમન્તં લઙ્કા યેન પ્રધર્ષિતા

તાન્ ગૃહીતાયુધાન્ સર્વાન્ વારયિત્વા વિભીષણઃ
અબ્રવીત્ પ્રાઞ્જલિર્ વાક્યં પુનઃ પ્રત્યુપવેશ્ય તાન્

અપ્ય્ ઉપાયૈસ્ ત્રિભિસ્ તાત યો ઽર્થઃ પ્રાપ્તું ન શક્યતે
તસ્ય વિક્રમકાલાંસ્ તાન્ યુક્તાન્ આહુર્ મનીષિણઃ

પ્રમત્તેષ્વ્ અભિયુક્તેષુ દૈવેન પ્રહતેષુ ચ
વિક્રમાસ્ તાત સિધ્યન્તિ પરીક્ષ્ય વિધિના કૃતાઃ

અપ્રમત્તં કથં તં તુ વિજિગીષું બલે સ્થિતમ્
જિતરોષં દુરાધર્ષં પ્રધર્ષયિતુમ્ ઇચ્છથ

સમુદ્રં લઙ્ઘયિત્વા તુ ઘોરં નદનદીપતિમ્
કૃતં હનુમતા કર્મ દુષ્કરં તર્કયેત કઃ

બલાન્ય્ અપરિમેયાનિ વીર્યાણિ ચ નિશાચરાઃ
પરેષાં સહસાવજ્ઞા ન કર્તવ્યા કથં ચન

કિં ચ રાક્ષસરાજસ્ય રામેણાપકૃતં પુરા
આજહાર જનસ્થાનાદ્ યસ્ય ભાર્યાં યશસ્વિનઃ

ખરો યદ્ય્ અતિવૃત્તસ્ તુ રામેણ નિહતો રણે
અવશ્યં પ્રાણિનાં પ્રાણા રક્ષિતવ્યા યથા બલમ્

એતન્નિમિત્તં વૈદેહી ભયં નઃ સુમહદ્ ભવેત્
આહૃતા સા પરિત્યાજ્યા કલહાર્થે કૃતે ન કિમ્

ન નઃ ક્ષમં વીર્યવતા તેન ધર્માનુવર્તિના
વૈરં નિરર્થકં કર્તું દીયતામ્ અસ્ય મૈથિલી

યાવન્ ન સગજાં સાશ્વાં બહુરત્નસમાકુલામ્
પુરીં દારયતે બાણૈર્ દીયતામ્ અસ્ય મૈથિલી

યાવત્ સુઘોરા મહતી દુર્ધર્ષા હરિવાહિની
નાવસ્કન્દતિ નો લઙ્કાં તાવત્ સીતા પ્રદીયતામ્

વિનશ્યેદ્ ધિ પુરી લઙ્કા શૂરાઃ સર્વે ચ રાક્ષસાઃ
રામસ્ય દયિતા પત્ની ન સ્વયં યદિ દીયતે

પ્રસાદયે ત્વાં બન્ધુત્વાત્ કુરુષ્વ વચનં મમ
હિતં પથ્યં ત્વ્ અહં બ્રૂમિ દીયતામ્ અસ્ય મૈથિલી

પુરા શરત્સૂર્યમરીચિસંનિભાન્ નવાગ્રપુઙ્ખાન્ સુદૃઢાન્ નૃપાત્મજઃ
સૃજત્ય્ અમોઘાન્ વિશિખાન્ વધાય તે પ્રદીયતાં દાશરથાય મૈથિલી

ત્યજસ્વ કોપં સુખધર્મનાશનં ભજસ્વ ધર્મં રતિકીર્તિવર્ધનમ્
પ્રસીદ જીવેમ સપુત્રબાન્ધવાઃ પ્રદીયતાં દાશરથાય મૈથિલી