રામાયણ · અધ્યાય 6.005

સા તુ નીલેન વિધિવત્ સ્વારક્ષા સુસમાહિતા
સાગરસ્યોત્તરે તીરે સાધુ સેના નિવેશિતા

મૈન્દશ્ ચ દ્વિવિધશ્ ચોભૌ તત્ર વાનરપુંગવૌ
વિચેરતુશ્ ચ તાં સેનાં રક્ષાર્થં સર્વતો દિશમ્

નિવિષ્ટાયાં તુ સેનાયાં તીરે નદનદીપતેઃ
પાર્શ્વસ્થં લક્ષ્મણં દૃષ્ટ્વા રામો વચનમ્ અબ્રવીત્

શોકશ્ ચ કિલ કાલેન ગચ્છતા હ્ય્ અપગચ્છતિ
મમ ચાપશ્યતઃ કાન્તામ્ અહન્ય્ અહનિ વર્ધતે

ન મે દુઃખં પ્રિયા દૂરે ન મે દુઃખં હૃતેતિ ચ
એતદ્ એવાનુશોચામિ વયો ઽસ્યા હ્ય્ અતિવર્તતે

વાહિ વાત યતઃ કન્યા તાં સ્પૃષ્ટ્વા મામ્ અપિ સ્પૃશ
ત્વયિ મે ગાત્રસંસ્પર્શશ્ ચન્દ્રે દૃષ્ટિસમાગમઃ

તન્ મે દહતિ ગાત્રાણિ વિષં પીતમ્ ઇવાશયે
હા નાથેતિ પ્રિયા સા માં હ્રિયમાણા યદ્ અબ્રવીત્

તદ્વિયોગેન્ધનવતા તચ્ચિન્તાવિપુલાર્ચિષા
રાત્રિં દિવં શરીરં મે દહ્યતે મદનાગ્નિના

અવગાહ્યાર્ણવં સ્વપ્સ્યે સૌમિત્રે ભવતા વિના
કથં ચિત્ પ્રજ્વલન્ કામઃ સમાસુપ્તં જલે દહેત્

બહ્વ્ એતત્ કામયાનસ્ય શક્યમ્ એતેન જીવિતુમ્
યદ્ અહં સા ચ વામોરુર્ એકાં ધરણિમ્ આશ્રિતૌ

કેદારસ્યેવ કેદારઃ સોદકસ્ય નિરૂદકઃ
ઉપસ્નેહેન જીવામિ જીવન્તીં યચ્ છૃણોમિ તામ્

કદા તુ ખલુ સુસ્શોણીં શતપત્રાયતેક્ષણામ્
વિજિત્ય શત્રૂન્ દ્રક્ષ્યામિ સીતાં સ્ફીતામ્ ઇવ શ્રિયમ્

કદા નુ ચારુબિમ્બૌષ્ઠં તસ્યાઃ પદ્મમ્ ઇવાનનમ્
ઈષદુન્નમ્ય પાસ્યામિ રસાયનમ્ ઇવાતુરઃ

તૌ તસ્યાઃ સંહતૌ પીનૌ સ્તનૌ તાલફલોપમૌ
કદા નુ ખલુ સોત્કમ્પૌ હસન્ત્યા માં ભજિષ્યતઃ

સા નૂનમ્ અસિતાપાઙ્ગી રક્ષોમધ્યગતા સતી
મન્નાથા નાથહીનેવ ત્રાતારં નાધિગચ્છતિ

કદા વિક્ષોભ્ય રક્ષાંસિ સા વિધૂયોત્પતિષ્યતિ
વિધૂય જલદાન્ નીલાઞ્ શશિલેખા શરત્સ્વ્ ઇવ

સ્વભાવતનુકા નૂનં શોકેનાનશનેન ચ
ભૂયસ્ તનુતરા સીતા દેશકાલવિપર્યયાત્

કદા નુ રાક્ષસેન્દ્રસ્ય નિધાયોરસિ સાયકાન્
સીતાં પ્રત્યાહરિષ્યામિ શોકમ્ ઉત્સૃજ્ય માનસં

કદા નુ ખલુ માં સાધ્વી સીતામરસુતોપમા
સોત્કણ્ઠા કણ્ઠમ્ આલમ્બ્ય મોક્ષ્યત્ય્ આનન્દજં જલમ્

કદા શોકમ્ ઇમં ઘોરં મૈથિલી વિપ્રયોગજમ્
સહસા વિપ્રમોક્ષ્યામિ વાસઃ શુક્લેતરં યથા

એવં વિલપતસ્ તસ્ય તત્ર રામસ્ય ધીમતઃ
દિનક્ષયાન્ મન્દવપુર્ ભાસ્કરો ઽસ્તમ્ ઉપાગમત્

આશ્વાસિતો લક્ષ્મણેન રામઃ સંધ્યામ્ ઉપાસત
સ્મરન્ કમલપત્રાક્ષીં સીતાં શોકાકુલીકૃતઃ