રામાયણ · અધ્યાય 5.066

અથાહમ્ ઉત્તરં દેવ્યા પુનર્ ઉક્તઃ સસંભ્રમમ્
તવ સ્નેહાન્ નરવ્યાઘ્ર સૌહાર્યાદ્ અનુમાન્ય ચ

એવં બહુવિધં વાચ્યો રામો દાશરથિસ્ ત્વયા
યથા મામ્ આપ્નુયાચ્ છીઘ્રં હત્વા રાવણમ્ આહવે

યદિ વા મન્યસે વીર વસૈકાહમ્ અરિંદમ
કસ્મિંશ્ ચિત્ સંવૃતે દેશે વિશ્રાન્તઃ શ્વો ગમિષ્યસિ

મમ ચાપ્ય્ અલ્પભાગ્યાયાઃ સામ્નિધ્યાત્ તવ વાનર
અસ્ય શોકવિપાકસ્ય મુહૂર્તં સ્યાદ્ વિમોક્ષણમ્

ગતે હિ ત્વયિ વિક્રાન્તે પુનરાગમનાય વૈ
પ્રાણાનામ્ અપિ સંદેહો મમ સ્યાન્ નાત્ર સંશયઃ

તવાદર્શનજઃ શોકો ભૂયો માં પરિતાપયેત્
દુઃખાદ્ દુઃખપરાભૂતાં દુર્ગતાં દુઃખભાગિનીમ્

અયં તુ વીરસંદેહસ્ તિષ્ઠતીવ મમાગ્રતઃ
સુમહાંસ્ ત્વત્સહાયેષુ હર્યૃક્ષેષુ અસંશયઃ

કથં નુ ખલુ દુષ્પારં તરિષ્યન્તિ મહોદધિમ્
તાનિ હર્યૃક્ષસૈન્યાનિ તૌ વા નરવરાત્મજૌ

ત્રયાણામ્ એવ ભૂતાનાં સાગરસ્યાસ્ય લઙ્ઘને
શક્તિઃ સ્યાદ્ વૈનતેયસ્ય વાયોર્ વા તવ વાનઘ

તદ્ અસ્મિન્ કાર્યનિયોગે વીરૈવં દુરતિક્રમે
કિં પશ્યસિ સમાધાનં બ્રૂહિ કાર્યવિદાં વર

કામમ્ અસ્ય ત્વમ્ એવૈકઃ કાર્યસ્ય પરિસાધને
પર્યાપ્તઃ પરવીરઘ્ન યશસ્યસ્ તે બલોદયઃ

બલૈઃ સમગ્રૈર્ યદિ માં હત્વા રાવણમ્ આહવે
વિજયી સ્વાં પુરીં રામો નયેત્ તત્ સ્યાદ્ યશસ્કરમ્

યથાહં તસ્ય વીરસ્ય વનાદ્ ઉપધિના હૃતા
રક્ષસા તદ્ ભયાદ્ એવ તથા નાર્હતિ રાઘવઃ

બલૈસ્ તુ સંકુલાં કૃત્વા લઙ્કાં પરબલાર્દનઃ
માં નયેદ્ યદિ કાકુત્સ્થસ્ તત્ તસ્ય સદૃશં ભવેત્

તદ્ યથા તસ્ય વિક્રાન્તમ્ અનુરૂપં મહાત્મનઃ
ભવત્ય્ આહવશૂરસ્ય તથા ત્વમ્ ઉપપાદય

તદ્ અર્થોપહિતં વાક્યં પ્રશ્રિતં હેતુસંહિતમ્
નિશમ્યાહં તતઃ શેષં વાક્યમ્ ઉત્તરમ્ અબ્રુવમ્

દેવિ હર્યૃક્ષસૈન્યાનામ્ ઈશ્વરઃ પ્લવતાં વરઃ
સુગ્રીવઃ સત્ત્વસંપન્નસ્ તવાર્થે કૃતનિશ્ચયઃ

તસ્ય વિક્રમસંપન્નાઃ સત્ત્વવન્તો મહાબલાઃ
મનઃસંકલ્પસંપાતા નિદેશે હરયઃ સ્થિતાઃ

યેષાં નોપરિ નાધસ્તાન્ ન તિર્યક્ સજ્જતે ગતિઃ
ન ચ કર્મસુ સીદન્તિ મહત્સ્વ્ અમિતતેજસઃ

અસકૃત્ તૈર્ મહાભાગૈર્ વાનરૈર્ બલસંયુતૈઃ
પ્રદક્ષિણીકૃતા ભૂમિર્ વાયુમાર્ગાનુસારિભિઃ

મદ્વિશિષ્ટાશ્ ચ તુલ્યાશ્ ચ સન્તિ તત્ર વનૌકસઃ
મત્તઃ પ્રત્યવરઃ કશ્ ચિન્ નાસ્તિ સુગ્રીવસંનિધૌ

અહં તાવદ્ ઇહ પ્રાપ્તઃ કિં પુનસ્ તે મહાબલાઃ
ન હિ પ્રકૃષ્ટાઃ પ્રેષ્યન્તે પ્રેષ્યન્તે હીતરે જનાઃ

તદ્ અલં પરિતાપેન દેવિ મન્યુર્ વ્યપૈતુ તે
એકોત્પાતેન તે લઙ્કામ્ એષ્યન્તિ હરિયૂથપાઃ

મમ પૃષ્ઠગતૌ તૌ ચ ચન્દ્રસૂર્યાવ્ ઇવોદિતૌ
ત્વત્સકાશં મહાભાગે નૃસિંહાવ્ આગમિષ્યતઃ

અરિઘ્નં સિંહસંકાશં ક્ષિપ્રં દ્રક્ષ્યસિ રાઘવમ્
લક્ષ્મણં ચ ધનુષ્પાણિં લઙ્કા દ્વારમ્ ઉપસ્થિતમ્

નખદંષ્ટ્રાયુધાન્ વીરાન્ સિંહશાર્દૂલવિક્રમાન્
વાનરાન્ વાનરેન્દ્રાભાન્ ક્ષિપ્રં દ્રક્ષ્યસિ સંગતાન્

શૈલામ્બુદન્ નિકાશાનાં લઙ્કામલયસાનુષુ
નર્દતાં કપિમુખ્યાનામ્ અચિરાચ્ છોષ્યસે સ્વનમ્

નિવૃત્તવનવાસં ચ ત્વયા સાર્ધમ્ અરિંદમમ્
અભિષિક્તમ્ અયોધ્યાયાં ક્ષિપ્રં દ્રક્ષ્યસિ રાઘવમ્

તતો મયા વાગ્ભિર્ અદીનભાષિણી શિવાભિર્ ઇષ્ટાભિર્ અભિપ્રસાદિતા
જગામ શાન્તિં મમ મૈથિલાત્મજા તવાપિ શોકેન તથાભિપીડિતા