રામાયણ · અધ્યાય 6.001

શ્રુત્વા હનુમતો વાક્યં યથાવદ્ અભિભાષિતમ્
રામઃ પ્રીતિસમાયુક્તો વાક્યમ્ ઉત્તરમ્ અબ્રવીત્

કૃતં હનુમતા કાર્યં સુમહદ્ ભુવિ દુષ્કરમ્
મનસાપિ યદ્ અન્યેન ન શક્યં ધરણીતલે

ન હિ તં પરિપશ્યામિ યસ્ તરેત મહાર્ણવમ્
અન્યત્ર ગરુણાદ્ વાયોર્ અન્યત્ર ચ હનૂમતઃ

દેવદાનવયક્ષાણાં ગન્ધર્વોરગરક્ષસામ્
અપ્રધૃષ્યાં પુરીં લઙ્કાં રાવણેન સુરક્ષિતામ્

પ્રવિષ્ટઃ સત્ત્વમ્ આશ્રિત્ય જીવન્ કો નામ નિષ્ક્રમેત્
કો વિશેત્ સુદુરાધર્ષાં રાક્ષસૈશ્ ચ સુરક્ષિતામ્
યો વીર્યબલસંપન્નો ન સમઃ સ્યાદ્ ધનૂમતઃ

ભૃત્યકાર્યં હનુમતા સુગ્રીવસ્ય કૃતં મહત્
એવં વિધાય સ્વબલં સદૃશં વિક્રમસ્ય ચ

યો હિ ભૃત્યો નિયુક્તઃ સન્ ભર્ત્રા કર્મણિ દુષ્કરે
કુર્યાત્ તદનુરાગેણ તમ્ આહુઃ પુરુષોત્તમમ્

નિયુક્તો નૃપતેઃ કાર્યં ન કુર્યાદ્ યઃ સમાહિતઃ
ભૃત્યો યુક્તઃ સમર્થશ્ ચ તમ્ આહુઃ પુરુષાધમમ્

તન્નિયોગે નિયુક્તેન કૃતં કૃત્યં હનૂમતા
ન ચાત્મા લઘુતાં નીતઃ સુગ્રીવશ્ ચાપિ તોષિતઃ

અહં ચ રઘુવંશશ્ ચ લક્ષ્મણશ્ ચ મહાબલઃ
વૈદેહ્યા દર્શનેનાદ્ય ધર્મતઃ પરિરક્ષિતાઃ

ઇદં તુ મમ દીનસ્યા મનો ભૂયઃ પ્રકર્ષતિ
યદ્ ઇહાસ્ય પ્રિયાખ્યાતુર્ ન કુર્મિ સદૃશં પ્રિયમ્

એષ સર્વસ્વભૂતસ્ તુ પરિષ્વઙ્ગો હનૂમતઃ
મયા કાલમ્ ઇમં પ્રાપ્ય દત્તસ્ તસ્ય મહાત્મનઃ

સર્વથા સુકૃતં તાવત્ સીતાયાઃ પરિમાર્ગણમ્
સાગરં તુ સમાસાદ્ય પુનર્ નષ્ટં મનો મમ

કથં નામ સમુદ્રસ્ય દુષ્પારસ્ય મહામ્ભસઃ
હરયો દક્ષિણં પારં ગમિષ્યન્તિ સમાહિતાઃ

યદ્ય્ અપ્ય્ એષ તુ વૃત્તાન્તો વૈદેહ્યા ગદિતો મમ
સમુદ્રપારગમને હરીણાં કિમ્ ઇવોત્તરમ્

ઇત્ય્ ઉક્ત્વા શોકસંભ્રાન્તો રામઃ શત્રુનિબર્હણઃ
હનૂમન્તં મહાબાહુસ્ તતો ધ્યાનમ્ ઉપાગમત્