રામાયણ · અધ્યાય 5.059

તતો જામ્બવતો વાક્યમ્ અગૃહ્ણન્ત વનૌકસઃ
અઙ્ગદપ્રમુખા વીરા હનૂમાંશ્ ચ મહાકપિઃ

પ્રીતિમન્તસ્ તતઃ સર્વે વાયુપુત્રપુરઃસરાઃ
મહેન્દ્રાગ્રં પરિત્યજ્ય પુપ્લુવુઃ પ્લવગર્ષભાઃ

મેરુમન્દરસંકાશા મત્તા ઇવ મહાગજાઃ
છાદયન્ત ઇવાકાશં મહાકાયા મહાબલાઃ

સભાજ્યમાનં ભૂતૈસ્ તમ્ આત્મવન્તં મહાબલમ્
હનૂમન્તં મહાવેગં વહન્ત ઇવ દૃષ્ટિભિઃ

રાઘવે ચાર્થનિર્વૃત્તિં ભર્તુશ્ ચ પરમં યશઃ
સમાધાય સમૃદ્ધાર્થાઃ કર્મસિદ્ધિભિર્ ઉન્નતાઃ

પ્રિયાખ્યાનોન્મુખાઃ સર્વે સર્વે યુદ્ધાભિનન્દિનઃ
સર્વે રામપ્રતીકારે નિશ્ચિતાર્થા મનસ્વિનઃ

પ્લવમાનાઃ ખમ્ આપ્લુત્ય તતસ્ તે કાનનૌક્ષકઃ
નન્દનોપમમ્ આસેદુર્ વનં દ્રુમલતાયુતમ્

યત્ તન્ મધુવનં નામ સુગ્રીવસ્યાભિરક્ષિતમ્
અધૃષ્યં સર્વભૂતાનાં સર્વભૂતમનોહરમ્

યદ્ રક્ષતિ મહાવીર્યઃ સદા દધિમુખઃ કપિઃ
માતુલઃ કપિમુખ્યસ્ય સુગ્રીવસ્ય મહાત્મનઃ

તે તદ્ વનમ્ ઉપાગમ્ય બભૂવુઃ પરમોત્કટાઃ
વાનરા વાનરેન્દ્રસ્ય મનઃકાન્તતમં મહત્

તતસ્ તે વાનરા હૃષ્ટા દૃષ્ટ્વા મધુવનં મહત્
કુમારમ્ અભ્યયાચન્ત મધૂનિ મધુપિઙ્ગલાઃ

તતઃ કુમારસ્ તાન્ વૃદ્ધાઞ્ જામ્બવત્પ્રમુખાન્ કપીન્
અનુમાન્ય દદૌ તેષાં નિસર્ગં મધુભક્ષણે

તતશ્ ચાનુમતાઃ સર્વે સંપ્રહૃષ્ટા વનૌકસઃ
મુદિતાશ્ ચ તતસ્ તે ચ પ્રનૃત્યન્તિ તતસ્ તતઃ

ગાયન્તિ કે ચિત્ પ્રણમન્તિ કે ચિન્ નૃત્યન્તિ કે ચિત્ પ્રહસન્તિ કે ચિત્
પતન્તિ કે ચિદ્ વિચરન્તિ કે ચિત્ પ્લવન્તિ કે ચિત્ પ્રલપન્તિ કે ચિત્

પરસ્પરં કે ચિદ્ ઉપાશ્રયન્તે પરસ્પરં કે ચિદ્ અતિબ્રુવન્તે
દ્રુમાદ્ દ્રુમં કે ચિદ્ અભિપ્લવન્તે ક્ષિતૌ નગાગ્રાન્ નિપતન્તિ કે ચિત્

મહીતલાત્ કે ચિદ્ ઉદીર્ણવેગા મહાદ્રુમાગ્રાણ્ય્ અભિસંપતન્તે
ગાયન્તમ્ અન્યઃ પ્રહસન્ન્ ઉપૈતિ હસન્તમ્ અન્યઃ પ્રહસન્ન્ ઉપૈતિ

રુદન્તમ્ અન્યઃ પ્રરુદન્ન્ ઉપૈતિ નુદન્તમ્ અન્યઃ પ્રણુદન્ન્ ઉપૈતિ
સમાકુલં તત્ કપિસૈન્યમ્ આસીન્ મધુપ્રપાનોત્કટ સત્ત્વચેષ્ટમ્
ન ચાત્ર કશ્ ચિન્ ન બભૂવ મત્તો ન ચાત્ર કશ્ ચિન્ ન બભૂવ તૃપ્તો

તતો વનં તત્ પરિભક્ષ્યમાણં દ્રુમાંશ્ ચ વિધ્વંસિતપત્રપુષ્પાન્
સમીક્ષ્ય કોપાદ્ દધિવક્ત્રનામા નિવારયામ્ આસ કપિઃ કપીંસ્ તાન્

સ તૈઃ પ્રવૃદ્ધૈઃ પરિભર્ત્સ્યમાનો વનસ્ય ગોપ્તા હરિવીરવૃદ્ધઃ
ચકાર ભૂયો મતિમ્ ઉગ્રતેજા વનસ્ય રક્ષાં પ્રતિ વાનરેભ્યઃ

ઉવાચ કાંશ્ ચિત્ પરુષાણિ ધૃષ્ટમ્ અસક્તમ્ અન્યાંશ્ ચ તલૈર્ જઘાન
સમેત્ય કૈશ્ ચિત્ કલહં ચકાર તથૈવ સામ્નોપજગામ કાંશ્ ચિત્

સ તૈર્ મદાચ્ ચાપ્રતિવાર્ય વેગૈર્ બલાચ્ ચ તેનાપ્રતિવાર્યમાણૈઃ
પ્રધર્ષિતસ્ ત્યક્તભયૈઃ સમેત્ય પ્રકૃષ્યતે ચાપ્ય્ અનવેક્ષ્ય દોષમ્

નખૈસ્ તુદન્તો દશનૈર્ દશન્તસ્ તલૈશ્ ચ પાદૈશ્ ચ સમાપ્નુવન્તઃ
મદાત્ કપિં તં કપયઃ સમગ્રા મહાવનં નિર્વિષયં ચ ચક્રુઃ