રામાયણ · અધ્યાય 5.058

તસ્ય તદ્ વચનં શ્રુત્વા વાલિસૂનુર્ અભાષત
જામ્બવત્પ્રમુખાન્ સર્વાન્ અનુજ્ઞાપ્ય મહાકપીન્

અસ્મિન્ન્ એવંગતે કાર્યે ભવતાં ચ નિવેદિતે
ન્યાય્યં સ્મ સહ વૈદેહ્યા દ્રષ્ટું તૌ પાર્થિવાત્મજૌ

અહમ્ એકો ઽપિ પર્યાપ્તઃ સરાક્ષસગણાં પુરીમ્
તાં લઙ્કાં તરસા હન્તું રાવણં ચ મહાબલમ્

કિં પુનઃ સહિતો વીરૈર્ બલવદ્ભિઃ કૃતાત્મભિઃ
કૃતાસ્ત્રૈઃ પ્લવગૈઃ શક્તૈર્ ભવદ્ભિર્ વિજયૈષિભિઃ

અહં તુ રાવણં યુદ્ધે સસૈન્યં સપુરઃસરમ્
સપુત્રં વિધમિષ્યામિ સહોદરયુતં યુધિ

બ્રાહ્મમ્ ઐન્દ્રં ચ રૌદ્રં ચ વાયવ્યં વારુણં તથા
યદિ શક્રજિતો ઽસ્ત્રાણિ દુર્નિરીક્ષ્યાણિ સંયુગે
તાન્ય્ અહં વિધમિષ્યામિ નિહનિષ્યામિ રાક્ષસાન્

ભવતામ્ અભ્યનુજ્ઞાતો વિક્રમો મે રુણદ્ધિ તમ્

મયાતુલા વિસૃષ્ટા હિ શૈલવૃષ્ટિર્ નિરન્તરા
દેવાન્ અપિ રણે હન્યાત્ કિં પુનસ્ તાન્ નિશાચરાન્

સાગરો ઽપ્ય્ અતિયાદ્ વેલાં મન્દરઃ પ્રચલેદ્ અપિ
ન જામ્બવન્તં સમરે કમ્પયેદ્ અરિવાહિની

સર્વરાક્ષસસંઘાનાં રાક્ષસા યે ચ પૂર્વકાઃ
અલમ્ એકો વિનાશાય વીરો વાયુસુતઃ કપિઃ

પનસસ્યોરુવેગેન નીલસ્ય ચ મહાત્મનઃ
મન્દરો ઽપ્ય્ અવશીર્યેત કિં પુનર્ યુધિ રાક્ષસાઃ

સદેવાસુરયુદ્ધેષુ ગન્ધર્વોરગપક્ષિષુ
મૈન્દસ્ય પ્રતિયોદ્ધારં શંસત દ્વિવિદસ્ય વા

અશ્વિપુત્રૌ મહાવેગાવ્ એતૌ પ્લવગસત્તમૌ
પિતામહવરોત્સેકાત્ પરમં દર્પમ્ આસ્થિતૌ

અશ્વિનોર્ માનનાર્થં હિ સર્વલોકપિતામહઃ
સર્વાવધ્યત્વમ્ અતુલમ્ અનયોર્ દત્તવાન્ પુરા

વરોત્સેકેન મત્તૌ ચ પ્રમથ્ય મહતીં ચમૂમ્
સુરાણામ્ અમૃતં વીરૌ પીતવન્તૌ પ્લવંગમૌ

એતાવ્ એવ હિ સંક્રુદ્ધૌ સવાજિરથકુઞ્જરામ્
લઙ્કાં નાશયિતું શક્તૌ સર્વે તિષ્ઠન્તુ વાનરાઃ

અયુક્તં તુ વિના દેવીં દૃષ્ટબદ્ભિઃ પ્લવંગમાઃ
સમીપં ગન્તુમ્ અસ્માભી રાઘવસ્ય મહાત્મનઃ

દૃષ્ટા દેવી ન ચાનીતા ઇતિ તત્ર નિવેદનમ્
અયુક્તમ્ ઇવ પશ્યામિ ભવદ્ભિઃ ખ્યાતવિક્રમૈઃ

ન હિ વઃ પ્લવતે કશ્ ચિન્ નાપિ કશ્ ચિત્ પરાક્રમે
તુલ્યઃ સામરદૈત્યેષુ લોકેષુ હરિસત્તમાઃ

તેષ્વ્ એવં હતવીરેષુ રાક્ષસેષુ હનૂમતા
કિમ્ અન્યદ્ અત્ર કર્તવ્યં ગૃહીત્વા યામ જાનકીમ્

તમ્ એવં કૃતસંકલ્પં જામ્બવાન્ હરિસત્તમઃ
ઉવાચ પરમપ્રીતો વાક્યમ્ અર્થવદ્ અર્થવિત્

ન તાવદ્ એષા મતિર્ અક્ષમા નો યથા ભવાન્ પશ્યતિ રાજપુત્ર
યથા તુ રામસ્ય મતિર્ નિવિષ્ટા તથા ભવાન્ પશ્યતુ કાર્યસિદ્ધિમ્