રામાયણ · અધ્યાય 5.057

એતદ્ આખ્યાનં તત્ સર્વં હનૂમાન્ મારુતાત્મજઃ
ભૂયઃ સમુપચક્રામ વચનં વક્તુમ્ ઉત્તરમ્

સફલો રાઘવોદ્યોગઃ સુગ્રીવસ્ય ચ સંભ્રમઃ
શીલમ્ આસાદ્ય સીતાયા મમ ચ પ્લવનં મહત્

આર્યાયાઃ સદૃશં શીલં સીતાયાઃ પ્લવગર્ષભાઃ
તપસા ધારયેલ્ લોકાન્ ક્રુદ્ધા વા નિર્દહેદ્ અપિ

સર્વથાતિપ્રવૃદ્ધો ઽસૌ રાવણો રાક્ષસાધિપઃ
યસ્ય તાં સ્પૃશતો ગાત્રં તપસા ન વિનાશિતમ્

ન તદ્ અગ્નિશિખા કુર્યાત્ સંસ્પૃષ્ટા પાણિના સતી
જનકસ્યાત્મજા કુર્યાદ્ ઉત્ક્રોધકલુષીકૃતા

અશોકવનિકામધ્યે રાવણસ્ય દુરાત્મનઃ
અધસ્તાચ્ છિંશપાવૃક્ષે સાધ્વી કરુણમ્ આસ્થિતા

રાક્ષસીભિઃ પરિવૃતા શોકસંતાપકર્શિતા
મેઘલેખાપરિવૃતા ચન્દ્રલેખેવ નિષ્પ્રભા

અચિન્તયન્તી વૈદેહી રાવણં બલદર્પિતમ્
પતિવ્રતા ચ સુશ્રોણી અવષ્ટબ્ધા ચ જાનકી

અનુરક્તા હિ વૈદેહી રામં સર્વાત્મના શુભા
અનન્યચિત્તા રામે ચ પૌલોમીવ પુરંદરે

તદ્ એકવાસઃસંવીતા રજોધ્વસ્તા તથૈવ ચ
શોકસંતાપદીનાઙ્ગી સીતા ભર્તૃહિતે રતા

સા મયા રાક્ષસી મધ્યે તર્જ્યમાના મુહુર્ મુહુઃ
રાક્ષસીભિર્ વિરૂપાભિર્ દૃષ્ટા હિ પ્રમદા વને

એકવેણીધરા દીના ભર્તૃચિન્તાપરાયણા
અધઃશય્યા વિવર્ણાઙ્ગી પદ્મિનીવ હિમાગમે

રાવણાદ્ વિનિવૃત્તાર્થા મર્તવ્યકૃતનિશ્ચયા
કથં ચિન્ મૃગશાવાક્ષી વિશ્વાસમ્ ઉપપાદિતા

તતઃ સંભાષિતા ચૈવ સર્વમ્ અર્થં ચ દર્શિતા
રામસુગ્રીવસખ્યં ચ શ્રુત્વા પ્રીતિમ્ ઉપાગતા

નિયતઃ સમુદાચારો ભક્તિર્ ભર્તરિ ચોત્તમા

યન્ ન હન્તિ દશગ્રીવં સ મહાત્મા દશાનનઃ
નિમિત્તમાત્રં રામસ્ તુ વધે તસ્ય ભવિષ્યતિ

એવમ્ આસ્તે મહાભાગા સીતા શોકપરાયણા
યદ્ અત્ર પ્રતિકર્તવ્યં તત્ સર્વમ્ ઉપપાદ્યતામ્