રામાયણ · અધ્યાય 5.054

તતસ્ તુ શિંશપામૂલે જાનકીં પર્યવસ્થિતામ્
અભિવાદ્યાબ્રવીદ્ દિષ્ટ્યા પશ્યામિ ત્વામ્ ઇહાક્ષતામ્

તતસ્ તં પ્રસ્થિતં સીતા વીક્ષમાણા પુનઃ પુનઃ
ભર્તૃસ્નેહાન્વિતં વાક્યં હનૂમન્તમ્ અભાષત

કામમ્ અસ્ય ત્વમ્ એવૈકઃ કાર્યસ્ય પરિસાધને
પર્યાપ્તઃ પરવીરઘ્ન યશસ્યસ્ તે બલોદયઃ

બલૈસ્ તુ સંકુલાં કૃત્વા લઙ્કાં પરબલાર્દનઃ
માં નયેદ્ યદિ કાકુત્સ્થસ્ તસ્ય તત્ સાદૃશં ભવેત્

તદ્ યથા તસ્ય વિક્રાન્તમ્ અનુરૂપં મહાત્મનઃ
ભવત્ય્ આહવશૂરસ્ય તત્ત્વમ્ એવોપપાદય

તદ્ અર્થોપહિતં વાક્યં પ્રશ્રિતં હેતુસંહિતમ્
નિશમ્ય હનુમાંસ્ તસ્યા વાક્યમ્ ઉત્તરમ્ અબ્રવીત્

ક્ષિપ્રમ્ એષ્યતિ કાકુત્સ્થો હર્યૃક્ષપ્રવરૈર્ વૃતઃ
યસ્ તે યુધિ વિજિત્યારીઞ્ શોકં વ્યપનયિષ્યતિ

એવમ્ આશ્વાસ્ય વૈદેહીં હનૂમાન્ મારુતાત્મજઃ
ગમનાય મતિં કૃત્વા વૈદેહીમ્ અભ્યવાદયત્

તતઃ સ કપિશાર્દૂલઃ સ્વામિસંદર્શનોત્સુકઃ
આરુરોહ ગિરિશ્રેષ્ઠમ્ અરિષ્ટમ્ અરિમર્દનઃ

તુઙ્ગપદ્મકજુષ્ટાભિર્ નીલાભિર્ વનરાજિભિઃ
સાલતાલાશ્વકર્ણૈશ્ ચ વંશૈશ્ ચ બહુભિર્ વૃતમ્

લતાવિતાનૈર્ વિતતૈઃ પુષ્પવદ્ભિર્ અલંકૃતમ્
નાનામૃગગણાકીર્ણં ધાતુનિષ્યન્દભૂષિતમ્

બહુપ્રસ્રવણોપેતં શિલાસંચયસંકટમ્
મહર્ષિયક્ષગન્ધર્વકિંનરોરગસેવિતમ્

લતાપાદપસંબાધં સિંહાકુલિતકન્દરમ્
વ્યાઘ્રસંઘસમાકીર્ણં સ્વાદુમૂલફલદ્રુમમ્

તમ્ આરુરોહાતિબલઃ પર્વતં પ્લવગોત્તમઃ
રામદર્શનશીઘ્રેણ પ્રહર્ષેણાભિચોદિતઃ

તેન પાદતલાક્રાન્તા રમ્યેષુ ગિરિસાનુષુ
સઘોષાઃ સમશીર્યન્ત શિલાશ્ ચૂર્ણીકૃતાસ્ તતઃ

સ તમ્ આરુહ્ય શૈલેન્દ્રં વ્યવર્ધત મહાકપિઃ
દક્ષિણાદ્ ઉત્તરં પારં પ્રાર્થયંલ્ લવણામ્ભસઃ

અધિરુહ્ય તતો વીરઃ પર્વતં પવનાત્મજઃ
દદર્શ સાગરં ભીમં મીનોરગનિષેવિતમ્

સ મારુત ઇવાકાશં મારુતસ્યાત્મસંભવઃ
પ્રપેદે હરિશાર્દૂલો દક્ષિણાદ્ ઉત્તરાં દિશમ્

સ તદા પીડિતસ્ તેન કપિના પર્વતોત્તમઃ
રરાસ સહ તૈર્ ભૂતૈઃ પ્રાવિશદ્ વસુધાતલમ્
કમ્પમાનૈશ્ ચ શિખરૈઃ પતદ્ભિર્ અપિ ચ દ્રુમૈઃ

તસ્યોરુવેગાન્ મથિતાઃ પાદપાઃ પુષ્પશાલિનઃ
નિપેતુર્ ભૂતલે રુગ્ણાઃ શક્રાયુધહતા ઇવ

કન્દરોદરસંસ્થાનાં પીડિતાનાં મહૌજસામ્
સિંહાનાં નિનદો ભીમો નભો ભિન્દન્ સ શુશ્રુવે

સ્રસ્તવ્યાવિદ્ધવસના વ્યાકુલીકૃતભૂષણા
વિદ્યાધર્યઃ સમુત્પેતુઃ સહસા ધરણીધરાત્

અતિપ્રમાણા બલિનો દીપ્તજિહ્વા મહાવિષાઃ
નિપીડિતશિરોગ્રીવા વ્યવેષ્ટન્ત મહાહયઃ

કિંનરોરગગન્ધર્વયક્ષવિદ્યાધરાસ્ તથા
પીડિતં તં નગવરં ત્યક્ત્વા ગગનમ્ આસ્થિતાઃ

સ ચ ભૂમિધરઃ શ્રીમાન્ બલિના તેન પીડિતઃ
સવૃક્ષશિખરોદગ્રાઃ પ્રવિવેશ રસાતલમ્

દશયોજનવિસ્તારસ્ ત્રિંશદ્યોજનમ્ ઉચ્છ્રિતઃ
ધરણ્યાં સમતાં યાતઃ સ બભૂવ ધરાધરઃ