રામાયણ · અધ્યાય 5.052

વીક્ષમાણસ્ તતો લઙ્કાં કપિઃ કૃતમનોરથઃ
વર્ધમાનસમુત્સાહઃ કાર્યશેષમ્ અચિન્તયત્

કિં નુ ખલ્વ્ અવિશિષ્ટં મે કર્તવ્યમ્ ઇહ સામ્પ્રતમ્
યદ્ એષાં રક્ષસાં ભૂયઃ સંતાપજનનં ભવેત્

વનં તાવત્ પ્રમથિતં પ્રકૃષ્ટા રાક્ષસા હતાઃ
બલૈકદેશઃ ક્ષપિતઃ શેષં દુર્ગવિનાશનમ્

દુર્ગે વિનાશિતે કર્મ ભવેત્ સુખપરિશ્રમમ્
અલ્પયત્નેન કાર્યે ઽસ્મિન્ મમ સ્યાત્ સફલઃ શ્રમઃ

યો હ્ય્ અયં મમ લાઙ્ગૂલે દીપ્યતે હવ્યવાહનઃ
અસ્ય સંતર્પણં ન્યાય્યં કર્તુમ્ એભિર્ ગૃહોત્તમૈઃ

તતઃ પ્રદીપ્તલાઙ્ગૂલઃ સવિદ્યુદ્ ઇવ તોયદઃ
ભવનાગ્રેષુ લઙ્કાયા વિચચાર મહાકપિઃ

મુમોચ હનુમાન્ અગ્નિં કાલાનલશિખોપમમ્

શ્વસનેન ચ સંયોગાદ્ અતિવેગો મહાબલઃ
કાલાગ્નિર્ ઇવ જજ્વાલ પ્રાવર્ધત હુતાશનઃ

પ્રદીપ્તમ્ અગ્નિં પવનસ્ તેષુ વેશ્મસુ ચારયત્

તાનિ કાઞ્ચનજાલાનિ મુક્તામણિમયાનિ ચ
ભવનાન્ય્ અવશીર્યન્ત રત્નવન્તિ મહાન્તિ ચ

તાનિ ભગ્નવિમાનાનિ નિપેતુર્ વસુધાતલે
ભવનાનીવ સિદ્ધાનામ્ અમ્બરાત્ પુણ્યસંક્ષયે

વજ્રવિદ્રુમવૈદૂર્યમુક્તારજતસંહિતાન્
વિચિત્રાન્ ભવનાદ્ ધાતૂન્ સ્યન્દમાનાન્ દદર્શ સઃ

નાગ્નિસ્ તૃપ્યતિ કાષ્ઠાનાં તૃણાનાં ચ યથા તથા
હનૂમાન્ રાક્ષસેન્દ્રાણાં વધે કિં ચિન્ ન તૃપ્યતિ

હુતાશનજ્વાલસમાવૃતા સા હતપ્રવીરા પરિવૃત્તયોધા
હનૂમાતઃ ક્રોધબલાભિભૂતા બભૂવ શાપોપહતેવ લઙ્કા

સસંભ્રમં ત્રસ્તવિષણ્ણરાક્ષસાં સમુજ્જ્વલજ્ જ્વાલહુતાશનાઙ્કિતામ્
દદર્શ લઙ્કાં હનુમાન્ મહામનાઃ સ્વયમ્ભુકોપોપહતામ્ ઇવાવનિમ્

સ રાક્ષસાંસ્ તાન્ સુબહૂંશ્ ચ હત્વા વનં ચ ભઙ્ક્ત્વા બહુપાદપં તત્
વિસૃજ્ય રક્ષો ભવનેષુ ચાગ્નિં જગામ રામં મનસા મહાત્મા

લઙ્કાં સમસ્તાં સંદીપ્ય લાઙ્ગૂલાગ્નિં મહાકપિઃ
નિર્વાપયામ્ આસ તદા સમુદ્રે હરિસત્તમઃ