રામાયણ · અધ્યાય 5.047

તતઃ સ કર્મણા તસ્ય વિસ્મિતો ભીમવિક્રમઃ
હનુમાન્ રોષતામ્રાક્ષો રક્ષોઽધિપમ્ અવૈક્ષત

ભાજમાનં મહાર્હેણ કાઞ્ચનેન વિરાજતા
મુક્તાજાલાવૃતેનાથ મુકુટેન મહાદ્યુતિમ્

વજ્રસંયોગસંયુક્તૈર્ મહાર્હમણિવિગ્રહૈઃ
હૈમૈર્ આભરણૈશ્ ચિત્રૈર્ મનસેવ પ્રકલ્પિતૈઃ

મહાર્હક્ષૌમસંવીતં રક્તચન્દનરૂષિતમ્
સ્વનુલિપ્તં વિચિત્રાભિર્ વિવિધભિશ્ ચ ભક્તિભિઃ

વિપુલૈર્ દર્શનીયૈશ્ ચ રક્ષાક્ષૈર્ ભીમદર્શનૈઃ
દીપ્તતીક્ષ્ણમહાદંષ્ટ્રૈઃ પ્રલમ્બદશનચ્છદૈઃ

શિરોભિર્ દશભિર્ વીરં ભ્રાજમાનં મહૌજસં
નાનાવ્યાલસમાકીર્ણૈઃ શિખરૈર્ ઇવ મન્દરમ્

નીલાઞ્જનચય પ્રખ્યં હારેણોરસિ રાજતા
પૂર્ણચન્દ્રાભવક્ત્રેણ સબલાકમ્ ઇવામ્બુદમ્

બાહુભિર્ બદ્ધકેયૂરૈશ્ ચન્દનોત્તમરૂષિતૈઃ
ભ્રાજમાનાઙ્ગદૈઃ પીનૈઃ પઞ્ચશીર્ષૈર્ ઇવોરગૈઃ

મહતિ સ્ફાટિકે ચિત્રે રત્નસંયોગસંસ્કૃતે
ઉત્તમાસ્તરણાસ્તીર્ણે ઉપવિષ્ટં વરાસને

અલંકૃતાભિર્ અત્યર્થં પ્રમદાભિઃ સમન્તતઃ
વાલવ્યજનહસ્તાભિર્ આરાત્ સમુપસેવિતમ્

દુર્ધરેણ પ્રહસ્તેન મહાપાર્શ્વેન રક્ષસા
મન્ત્રિભિર્ મન્ત્રતત્ત્વજ્ઞૈર્ નિકુમ્ભેન ચ મન્ત્રિણા

ઉપોપવિષ્ટં રક્ષોભિશ્ ચતુર્ભિર્ બલદર્પિતૈઃ
કૃત્સ્નૈઃ પરિવૃતં લોકં ચતુર્ભિર્ ઇવ સાગરૈઃ

મન્ત્રિભિર્ મન્ત્રતત્ત્વજ્ઞૈર્ અન્યૈશ્ ચ શુભબુદ્ધિભિઃ
અન્વાસ્યમાનં સચિવૈઃ સુરૈર્ ઇવ સુરેશ્વરમ્

અપશ્યદ્ રાક્ષસપતિં હનૂમાન્ અતિતેજસં
વિષ્ઠિતં મેરુશિખરે સતોયમ્ ઇવ તોયદમ્

સ તૈઃ સંપીડ્યમાનો ઽપિ રક્ષોભિર્ ભીમવિક્રમૈઃ
વિસ્મયં પરમં ગત્વા રક્ષોઽધિપમ્ અવૈક્ષત

ભ્રાજમાનં તતો દૃષ્ટ્વા હનુમાન્ રાક્ષસેશ્વરમ્
મનસા ચિન્તયામ્ આસ તેજસા તસ્ય મોહિતઃ

અહો રૂપમ્ અહો ધૈર્યમ્ અહો સત્ત્વમ્ અહો દ્યુતિઃ
અહો રાક્ષસરાજસ્ય સર્વલક્ષણયુક્તતા

યદ્ય્ અધર્મો ન બલવાન્ સ્યાદ્ અયં રાક્ષસેશ્વરઃ
સ્યાદ્ અયં સુરલોકસ્ય સશક્રસ્યાપિ રક્ષિતા

તેન બિભ્યતિ ખલ્વ્ અસ્માલ્ લોકાઃ સામરદાનવાઃ
અયં હ્ય્ ઉત્સહતે ક્રુદ્ધઃ કર્તુમ્ એકાર્ણવં જગત્

ઇતિ ચિન્તાં બહુવિધામ્ અકરોન્ મતિમાન્ કપિઃ
દૃષ્ટ્વા રાક્ષસરાજસ્ય પ્રભાવમ્ અમિતૌજસઃ