રામાયણ · અધ્યાય 5.043

તતસ્ તે રાક્ષસેન્દ્રેણ ચોદિતા મન્ત્રિણઃ સુતાઃ
નિર્યયુર્ ભવનાત્ તસ્માત્ સપ્ત સપ્તાર્ચિવર્ચસઃ

મહાબલપરીવારા ધનુષ્મન્તો મહાબલાઃ
કૃતાસ્ત્રાસ્ત્રવિદાં શ્રેષ્ઠાઃ પરસ્પરજયૈષિણઃ

હેમજાલપરિક્ષિપ્તૈર્ ધ્વજવદ્ભિઃ પતાકિભિઃ
તોયદસ્વનનિર્ઘોષૈર્ વાજિયુક્તૈર્ મહારથૈઃ

તપ્તકાઞ્ચનચિત્રાણિ ચાપાન્ય્ અમિતવિક્રમાઃ
વિસ્ફારયન્તઃ સંહૃષ્ટાસ્ તડિદ્વન્ત ઇવામ્બુદાઃ

જનન્યસ્ તાસ્ તતસ્ તેષાં વિદિત્વા કિંકરાન્ હતાન્
બભૂવુઃ શોકસંભ્રાન્તાઃ સબાન્ધવસુહૃજ્જનાઃ

તે પરસ્પરસંઘર્ષાસ્ તપ્તકાઞ્ચનભૂષણાઃ
અભિપેતુર્ હનૂમન્તં તોરણસ્થમ્ અવસ્થિતમ્

સૃજન્તો બાણવૃષ્ટિં તે રથગર્જિતનિઃસ્વનાઃ
વૃષ્ટિમન્ત ઇવામ્ભોદા વિચેરુર્ નૈરૃતર્ષભાઃ

અવકીર્ણસ્ તતસ્ તાભિર્ હનૂમાઞ્ શરવૃષ્ટિભિઃ
અભવત્ સંવૃતાકારઃ શૈલરાડ્ ઇવ વૃષ્ટિભિઃ

સ શરાન્ વઞ્ચયામ્ આસ તેષામ્ આશુચરઃ કપિઃ
રથવેગાંશ્ ચ વીરાણાં વિચરન્ વિમલે ઽમ્બરે

સ તૈઃ ક્રીડન્ ધનુષ્મદ્ભિર્ વ્યોમ્નિ વીરઃ પ્રકાશતે
ધનુષ્મદ્ભિર્ યથા મેઘૈર્ મારુતઃ પ્રભુર્ અમ્બરે

સ કૃત્વા નિનદં ઘોરં ત્રાસયંસ્ તાં મહાચમૂમ્
ચકાર હનુમાન્ વેગં તેષુ રક્ષઃસુ વીર્યવાન્

તલેનાભિહનત્ કાંશ્ ચિત્ પાદૈઃ કાંશ્ ચિત્ પરંતપઃ
મુષ્ટિનાભ્યહનત્ કાંશ્ ચિન્ નખૈઃ કાંશ્ ચિદ્ વ્યદારયત્

પ્રમમાથોરસા કાંશ્ ચિદ્ ઊરુભ્યામ્ અપરાન્ કપિઃ
કે ચિત્ તસ્યૈવ નાદેન તત્રૈવ પતિતા ભુવિ

તતસ્ તેષ્વ્ અવપન્નેષુ ભૂમૌ નિપતિતેષુ ચ
તત્ સૈન્યમ્ અગમત્ સર્વં દિશો દશભયાર્દિતમ્

વિનેદુર્ વિસ્વરં નાગા નિપેતુર્ ભુવિ વાજિનઃ
ભગ્નનીડધ્વજચ્છત્રૈર્ ભૂશ્ ચ કીર્ણાભવદ્ રથૈઃ

સ તાન્ પ્રવૃદ્ધાન્ વિનિહત્ય રાક્ષસાન્ મહાબલશ્ ચણ્ડપરાક્રમઃ કપિઃ
યુયુત્સુર્ અન્યૈઃ પુનર્ એવ રાક્ષસૈસ્ તદ્ એવ વીરો ઽભિજગામ તોરણમ્