રામાયણ · અધ્યાય 5.042

સંદિષ્ટો રાક્ષસેન્દ્રેણ પ્રહસ્તસ્ય સુતો બલી
જમ્બુમાલી મહાદંષ્ટ્રો નિર્જગામ ધનુર્ધરઃ

રક્તમાલ્યામ્બરધરઃ સ્રગ્વી રુચિરકુણ્ડલઃ
મહાન્ વિવૃત્તનયનશ્ ચણ્ડઃ સમરદુર્જયઃ

ધનુઃ શક્રધનુઃ પ્રખ્યં મહદ્ રુચિરસાયકમ્
વિસ્ફારયાણો વેગેન વજ્રાશનિસમસ્વનમ્

તસ્ય વિસ્ફારઘોષેણ ધનુષો મહતા દિશઃ
પ્રદિશશ્ ચ નભશ્ ચૈવ સહસા સમપૂર્યત

રથેન ખરયુક્તેન તમ્ આગતમ્ ઉદીક્ષ્ય સઃ
હનૂમાન્ વેગસંપન્નો જહર્ષ ચ નનાદ ચ

તં તોરણવિટઙ્કસ્થં હનૂમન્તં મહાકપિમ્
જમ્બુમાલી મહાબાહુર્ વિવ્યાધ નિશિતૈઃ શરૈઃ

અર્ધચન્દ્રેણ વદને શિરસ્ય્ એકેન કર્ણિના
બાહ્વોર્ વિવ્યાધ નારાચૈર્ દશભિસ્ તં કપીશ્વરમ્

તસ્ય તચ્ છુશુભે તામ્રં શરેણાભિહતં મુખમ્
શરદીવામ્બુજં ફુલ્લં વિદ્ધં ભાસ્કરરશ્મિના

ચુકોપ બાણાભિહતો રાક્ષસસ્ય મહાકપિઃ
તતઃ પાર્શ્વે ઽતિવિપુલાં દદર્શ મહતીં શિલામ્

તરસા તાં સમુત્પાટ્ય ચિક્ષેપ બલવદ્ બલી
તાં શરૈર્ દશભિઃ ક્રુદ્ધસ્ તાડયામ્ આસ રાક્ષસઃ

વિપન્નં કર્મ તદ્ દૃષ્ટ્વા હનૂમાંશ્ ચણ્ડવિક્રમઃ
સાલં વિપુલમ્ ઉત્પાટ્ય ભ્રામયામ્ આસ વીર્યવાન્

ભ્રામયન્તં કપિં દૃષ્ટ્વા સાલવૃક્ષં મહાબલમ્
ચિક્ષેપ સુબહૂન્ બાણાઞ્ જમ્બુમાલી મહાબલઃ

સાલં ચતુર્ભિર્ ચિચ્છેદ વાનરં પઞ્ચભિર્ ભુજે
ઉરસ્ય્ એકેન બાણેન દશભિસ્ તુ સ્તનાન્તરે

સ શરૈઃ પૂરિતતનુઃ ક્રોધેન મહતા વૃતઃ
તમ્ એવ પરિઘં ગૃહ્ય ભ્રામયામ્ આસ વેગિતઃ

અતિવેગો ઽતિવેગેન ભ્રામયિત્વા બલોત્કટઃ
પરિઘં પાતયામ્ આસ જમ્બુમાલેર્ મહોરસિ

તસ્ય ચૈવ શિરો નાસ્તિ ન બાહૂ ન ચ જાનુની
ન ધનુર્ ન રથો નાશ્વાસ્ તત્રાદૃશ્યન્ત નેષવઃ

સ હતસ્ તરસા તેન જમ્બુમાલી મહારથઃ
પપાત નિહતો ભૂમૌ ચૂર્ણિતાઙ્ગવિભૂષણઃ

જમ્બુમાલિં ચ નિહતં કિંકરાંશ્ ચ મહાબલાન્
ચુક્રોધ રાવણઃ શ્રુત્વા કોપસંરક્તલોચનઃ

સ રોષસંવર્તિતતામ્રલોચનઃ પ્રહસ્તપુત્રે નિહતે મહાબલે
અમાત્યપુત્રાન્ અતિવીર્યવિક્રમાન્ સમાદિદેશાશુ નિશાચરેશ્વરઃ