રામાયણ · અધ્યાય 5.041

તતઃ સ કિંકરાન્ હત્વા હનૂમાન્ ધ્યાનમ્ આસ્થિતઃ
વનં ભગ્નં મયા ચૈત્યપ્રાસાદો ન વિનાશિતઃ
તસ્માત્ પ્રાસાદમ્ અપ્ય્ એવમ્ ઇમં વિધ્વંસયામ્ય્ અહમ્

ઇતિ સંચિન્ત્ય હનુમાન્ મનસા દર્શયન્ બલમ્
ચૈત્યપ્રાસાદમ્ આપ્લુત્ય મેરુશૃઙ્ગમ્ ઇવોન્નતમ્
આરુરોહ હરિશ્રેષ્ઠો હનૂમાન્ મારુતાત્મજઃ

સંપ્રધૃષ્ય ચ દુર્ધર્ષશ્ ચૈત્યપ્રાસાદમ્ ઉન્નતમ્
હનૂમાન્ પ્રજ્વલંલ્ લક્ષ્મ્યા પારિયાત્રોપમો ઽભવત્

સ ભૂત્વા તુ મહાકાયો હનૂમાન્ મારુતાત્મજઃ
ધૃષ્ટમ્ આસ્ફોટયામ્ આસ લઙ્કાં શબ્દેન પૂરયન્

તસ્યાસ્ફોટિતશબ્દેન મહતા શ્રોત્રઘાતિના
પેતુર્ વિહંગા ગગનાદ્ ઉચ્ચૈશ્ ચેદમ્ અઘોષયત્

જયત્ય્ અતિબલો રામો લક્ષ્મણશ્ ચ મહાબલઃ
રાજા જયતિ સુગ્રીવો રાઘવેણાભિપાલિતઃ

દાસો ઽહં કોસલેન્દ્રસ્ય રામસ્યાક્લિષ્ટકર્મણઃ
હનુમાઞ્ શત્રુસૈન્યાનાં નિહન્તા મારુતાત્મજઃ

ન રાવણસહસ્રં મે યુદ્ધે પ્રતિબલં ભવેત્
શિલાભિસ્ તુ પ્રહરતઃ પાદપૈશ્ ચ સહસ્રશઃ

અર્દયિત્વા પુરીં લઙ્કામ્ અભિવાદ્ય ચ મૈથિલીમ્
સમૃદ્ધાર્થો ગમિષ્યામિ મિષતાં સર્વરક્ષસામ્

એવમ્ ઉક્ત્વા વિમાનસ્થશ્ ચૈત્યસ્થાન્ હરિપુંગવઃ
નનાદ ભીમનિર્હ્રાદો રક્ષસાં જનયન્ ભયમ્

તેન શબ્દેન મહતા ચૈત્યપાલાઃ શતં યયુઃ
ગૃહીત્વા વિવિધાન્ અસ્ત્રાન્ પ્રાસાન્ ખડ્ગાન્ પરશ્વધાન્
વિસૃજન્તો મહાક્ષયા મારુતિં પર્યવારયન્

આવર્ત ઇવ ગઙ્ગાયાસ્ તોયસ્ય વિપુલો મહાન્
પરિક્ષિપ્ય હરિશ્રેષ્ઠં સ બભૌ રક્ષસાં ગણઃ

તતો વાતાત્મજઃ ક્રુદ્ધો ભીમરૂપં સમાસ્થિતઃ

પ્રાસાદસ્ય મહાંસ્ તસ્ય સ્તમ્ભં હેમપરિષ્કૃતમ્
ઉત્પાટયિત્વા વેગેન હનૂમાન્ મારુતાત્મજઃ
તતસ્ તં ભ્રામયામ્ આસ શતધારં મહાબલઃ

સ રાક્ષસશતં હત્વા વજ્રેણેન્દ્ર ઇવાસુરાન્
અન્તરિક્ષસ્થિતઃ શ્રીમાન્ ઇદં વચનમ્ અબ્રવીત્

માદૃશાનાં સહસ્રાણિ વિસૃષ્ટાનિ મહાત્મનામ્
બલિનાં વાનરેન્દ્રાણાં સુગ્રીવવશવર્તિનામ્

શતૈઃ શતસહસ્રૈશ્ ચ કોટીભિર્ અયુતૈર્ અપિ
આગમિષ્યતિ સુગ્રીવઃ સર્વેષાં વો નિષૂદનઃ

નેયમ્ અસ્તિ પુરી લઙ્કા ન યૂયં ન ચ રાવણઃ
યસ્માદ્ ઇક્ષ્વાકુનાથેન બદ્ધં વૈરં મહાત્મના