રામાયણ · અધ્યાય 5.039

સ ચ વાગ્ભિઃ પ્રશસ્તાભિર્ ગમિષ્યન્ પૂજિતસ્ તયા
તસ્માદ્ દેશાદ્ અપક્રમ્ય ચિન્તયામ્ આસ વાનરઃ

અલ્પશેષમ્ ઇદં કાર્યં દૃષ્ટેયમ્ અસિતેક્ષણા
ત્રીન્ ઉપાયાન્ અતિક્રમ્ય ચતુર્થ ઇહ દૃશ્યતે

ન સામ રક્ષઃસુ ગુણાય કલ્પતે ન દનમ્ અર્થોપચિતેષુ વર્તતે
ન ભેદસાધ્યા બલદર્પિતા જનાઃ પરાક્રમસ્ ત્વ્ એષ મમેહ રોચતે

ન ચાસ્ય કાર્યસ્ય પરાક્રમાદ્ ઋતે વિનિશ્ચયઃ કશ્ ચિદ્ ઇહોપપદ્યતે
હૃતપ્રવીરાસ્ તુ રણે હિ રાક્ષસાઃ કથં ચિદ્ ઈયુર્ યદ્ ઇહાદ્ય માર્દવમ્

કાર્યે કર્મણિ નિર્દિષ્ટો યો બહૂન્ય્ અપિ સાધયેત્
પૂર્વકાર્યવિરોધેન સ કાર્યં કર્તુમ્ અર્હતિ

ન હ્ય્ એકઃ સાધકો હેતુઃ સ્વલ્પસ્યાપીહ કર્મણઃ
યો હ્ય્ અર્થં બહુધા વેદ સ સમર્થો ઽર્થસાધને

ઇહૈવ તાવત્ કૃતનિશ્ચયો હ્ય્ અહં યદિ વ્રજેયં પ્લવગેશ્વરાલયમ્
પરાત્મસંમર્દ વિશેષતત્ત્વવિત્ તતઃ કૃતં સ્યાન્ મમ ભર્તૃશાસનમ્

કથં નુ ખલ્વ્ અદ્ય ભવેત્ સુખાગતં પ્રસહ્ય યુદ્ધં મમ રાક્ષસૈઃ સહ
તથૈવ ખલ્વ્ આત્મબલં ચ સારવત્ સમાનયેન્ માં ચ રણે દશાનનઃ

ઇદમ્ અસ્ય નૃશંસસ્ય નન્દનોપમમ્ ઉત્તમમ્
વનં નેત્રમનઃકાન્તં નાનાદ્રુમલતાયુતમ્

ઇદં વિધ્વંસયિષ્યામિ શુષ્કં વનમ્ ઇવાનલઃ
અસ્મિન્ ભગ્ને તતઃ કોપં કરિષ્યતિ સ રાવણઃ

તતો મહત્ સાશ્વમહારથદ્વિપં બલં સમાનેષ્વ્ અપિ રાક્ષસાધિપઃ
ત્રિશૂલકાલાયસપટ્ટિશાયુધં તતો મહદ્ યુદ્ધમ્ ઇદં ભવિષ્યતિ

અહં તુ તૈઃ સંયતિ ચણ્ડવિક્રમૈઃ સમેત્ય રક્ષોભિર્ અસંગવિક્રમઃ
નિહત્ય તદ્ રાવણચોદિતં બલં સુખં ગમિષ્યામિ કપીશ્વરાલયમ્

તતો મારુતવત્ ક્રુદ્ધો મારુતિર્ ભીમવિક્રમઃ
ઊરુવેગેન મહતા દ્રુમાન્ ક્ષેપ્તુમ્ અથારભત્

તતસ્ તદ્ ધનુમાન્ વીરો બભઞ્જ પ્રમદાવનમ્
મત્તદ્વિજસમાઘુષ્ટં નાનાદ્રુમલતાયુતમ્

તદ્ વનં મથિતૈર્ વૃક્ષૈર્ ભિન્નૈશ્ ચ સલિલાશયૈઃ
ચૂર્ણિતૈઃ પર્વતાગ્રૈશ્ ચ બભૂવાપ્રિયદર્શનમ્

લતાગૃહૈશ્ ચિત્રગૃહૈશ્ ચ નાશિતૈર્ મહોરગૈર્ વ્યાલમૃગૈશ્ ચ નિર્ધુતૈઃ
શિલાગૃહૈર્ ઉન્મથિતૈસ્ તથા ગૃહૈઃ પ્રનષ્ટરૂપં તદ્ અભૂન્ મહદ્ વનમ્

સ તસ્ય કૃત્વાર્થપતેર્ મહાકપિર્ મહદ્ વ્યલીકં મનસો મહાત્મનઃ
યુયુત્સુર્ એકો બહુભિર્ મહાબલૈઃ શ્રિયા જ્વલંસ્ તોરણમ્ આશ્રિતઃ કપિઃ