રામાયણ · અધ્યાય 5.038

શ્રુત્વા તુ વચનં તસ્ય વાયુસૂનોર્ મહાત્મનઃ
ઉવાચાત્મહિતં વાક્યં સીતા સુરસુતોપમા

ત્વાં દૃષ્ટ્વા પ્રિયવક્તારં સંપ્રહૃષ્યામિ વાનર
અર્ધસંજાતસસ્યેવ વૃષ્ટિં પ્રાપ્ય વસુંધરા

યથા તં પુરુષવ્યાઘ્રં ગાત્રૈઃ શોકાભિકર્શિતૈઃ
સંસ્પૃશેયં સકામાહં તથા કુરુ દયાં મયિ

અભિજ્ઞાનં ચ રામસ્ય દત્તં હરિગણોત્તમ
ક્ષિપ્તામ્ ઈષિકાં કાકસ્ય કોપાદ્ એકાક્ષિશાતનીમ્

મનઃશિલાયાસ્ તિકલો ગણ્ડપાર્શ્વે નિવેશિતઃ
ત્વયા પ્રનષ્ટે તિલકે તં કિલ સ્મર્તુમ્ અર્હસિ

સ વીર્યવાન્ કથં સીતાં હૃતાં સમનુમન્યસે
વસન્તીં રક્ષસાં મધ્યે મહેન્દ્રવરુણોપમ

એષ ચૂડામણિર્ દિવ્યો મયા સુપરિરક્ષિતઃ
એતં દૃષ્ટ્વા પ્રહૃષ્યામિ વ્યસને ત્વામ્ ઇવાનઘ

એષ નિર્યાતિતઃ શ્રીમાન્ મયા તે વારિસંભવઃ
અતઃ પરં ન શક્ષ્યામિ જીવિતું શોકલાલસા

અસહ્યાનિ ચ દુઃખાનિ વાચશ્ ચ હૃદયચ્છિદઃ
રાક્ષસીનાં સુઘોરાણાં ત્વત્કૃતે મર્ષયામ્ય્ અહમ્

ધારયિષ્યામિ માસં તુ જીવિતં શત્રુસૂદન
માસાદ્ ઊર્ધ્વં ન જીવિષ્યે ત્વયા હીના નૃપાત્મજ

ઘોરો રાક્ષસરાજો ઽયં દૃષ્ટિશ્ ચ ન સુખા મયિ
ત્વાં ચ શ્રુત્વા વિપદ્યન્તં ન જીવેયમ્ અહં ક્ષણમ્

વૈદેહ્યા વચનં શ્રુત્વા કરુણં સાશ્રુભાષિતમ્
અથાબ્રવીન્ મહાતેજા હનુમાન્ મારુતાત્મજઃ

ત્વચ્છોકવિમુખો રામો દેવિ સત્યેન તે શપે
રામે શોકાભિભૂતે તુ લક્ષ્મણઃ પરિતપ્યતે

દૃષ્ટા કથં ચિદ્ ભવતી ન કાલઃ પરિશોચિતુમ્
ઇમં મુહૂર્તં દુઃખાનામ્ અન્તં દ્રક્ષ્યસિ ભામિનિ

તાવ્ ઉભૌ પુરુષવ્યાઘ્રૌ રાજપુત્રાવ્ અનિન્દિતૌ
ત્વદ્દર્શનકૃતોત્સાહૌ લઙ્કાં ભસ્મીકરિષ્યતઃ

હત્વા તુ સમરે ક્રૂરં રાવણં સહ બાન્ધવમ્
રાઘવૌ ત્વાં વિશાલાક્ષિ સ્વાં પુરીં પ્રાપયિષ્યતઃ

યત્ તુ રામો વિજાનીયાદ્ અભિજ્ઞાનમ્ અનિન્દિતે
પ્રીતિસંજનનં તસ્ય ભૂયસ્ ત્વં દાતુમ્ અર્હસિ

સાબ્રવીદ્ દત્તમ્ એવેહ મયાભિજ્ઞાનમ્ ઉત્તમમ્
એતદ્ એવ હિ રામસ્ય દૃષ્ટ્વા મત્કેશભૂષણમ્
શ્રદ્ધેયં હનુમન્ વાક્યં તવ વીર ભવિષ્યતિ

સ તં મણિવરં ગૃહ્ય શ્રીમાન્ પ્લવગસત્તમઃ
પ્રણમ્ય શિરસા દેવીં ગમનાયોપચક્રમે

તમ્ ઉત્પાતકૃતોત્સાહમ્ અવેક્ષ્ય હરિપુંગવમ્
વર્ધમાનં મહાવેગમ્ ઉવાચ જનકાત્મજા
અશ્રુપૂર્ણમુખી દીના બાષ્પગદ્ગદયા ગિરા

હનૂમન્ સિંહસંકાશૌ ભ્રાતરૌ રામલક્ષ્મણૌ
સુગ્રીવં ચ સહામાત્યં સર્વાન્ બ્રૂયા અનામયમ્

યથા ચ સ મહાબાહુર્ માં તારયતિ રાઘવઃ
અસ્માદ્ દુઃખામ્બુસંરોધાત્ તત્ સમાધાતુમ્ અર્હસિ

ઇમં ચ તીવ્રં મમ શોકવેગં રક્ષોભિર્ એભિઃ પરિભર્ત્સનં ચ
બ્રૂયાસ્ તુ રામસ્ય ગતઃ સમીપં શિવશ્ ચ તે ઽધ્વાસ્તુ હરિપ્રવીર

સ રાજપુત્ર્યા પ્રતિવેદિતાર્થઃ કપિઃ કૃતાર્થઃ પરિહૃષ્ટચેતાઃ
તદ્ અલ્પશેષં પ્રસમીક્ષ્ય કાર્યં દિશં હ્ય્ ઉદીચીં મનસા જગામ