રામાયણ · અધ્યાય 5.031

તામ્ અબ્રવીન્ મહાતેજા હનૂમાન્ મારુતાત્મજઃ
શિરસ્ય્ અઞ્જલિમ્ આધાય સીતાં મધુરયા ગિરા

કા નુ પદ્મપલાશાક્ષી ક્લિષ્ટકૌશેયવાસિની
દ્રુમસ્ય શાખામ્ આલમ્બ્ય તિષ્ઠસિ ત્વમ્ અનિન્દિતા

કિમર્થં તવ નેત્રાભ્યાં વારિ સ્રવતિ શોકજમ્
પુણ્ડરીકપલાશાભ્યાં વિપ્રકીર્ણમ્ ઇવોદકમ્

સુરાણામ્ અસુરાણાં ચ નાગગન્ધર્વરક્ષસામ્
યક્ષાણાં કિંનરાણાં ચ કા ત્વં ભવસિ શોભને

કા ત્વં ભવસિ રુદ્રાણાં મરુતાં વા વરાનને
વસૂનાં વા વરારોહે દેવતા પ્રતિભાસિ મે

કિં નુ ચન્દ્રમસા હીના પતિતા વિબુધાલયાત્
રોહિણી જ્યોતિષાં શ્રેષ્ઠા શ્રેષ્ઠા સર્વગુણાન્વિતા

કોપાદ્ વા યદિ વા મોહાદ્ ભર્તારમ્ અસિતેક્ષણા
વસિષ્ઠં કોપયિત્વા ત્વં નાસિ કલ્યાણ્ય્ અરુન્ધતી

કો નૌ પુત્રઃ પિતા ભ્રાત ભર્તા વા તે સુમધ્યમે
અસ્માલ્ લોકાદ્ અમું લોકં ગતં ત્વમ્ અનુશોચસિ

વ્યઞ્જનાનિ હિ તે યાનિ લક્ષણાનિ ચ લક્ષયે
મહિષી ભૂમિપાલસ્ય રાજકન્યાસિ મે મતા

રાવણેન જનસ્થાનાદ્ બલાદ્ અપહૃતા યદિ
સીતા ત્વમ્ અસિ ભદ્રં તે તન્ મમાચક્ષ્વ પૃચ્છતઃ

સા તસ્ય વચનં શ્રુત્વા રામકીર્તનહર્ષિતા
ઉવાચ વાક્યં વૈદેહી હનૂમન્તં દ્રુમાશ્રિતમ્

દુહિતા જનકસ્યાહં વૈદેહસ્ય મહાત્મનઃ
સીતા ચ નામ નામ્નાહં ભાર્યા રામસ્ય ધીમતઃ

સમા દ્વાદશ તત્રાહં રાઘવસ્ય નિવેશને
ભુઞ્જાના માનુષાન્ ભોગાન્ સર્વકામસમૃદ્ધિની

તતસ્ ત્રયોદશે વર્ષે રાજ્યેનેક્ષ્વાકુનન્દનમ્
અભિષેચયિતું રાજા સોપાધ્યાયઃ પ્રચક્રમે

તસ્મિન્ સંભ્રિયમાણે તુ રાઘવસ્યાભિષેચને
કૈકેયી નામ ભર્તારં દેવી વચનમ્ અબ્રવીત્

ન પિબેયં ન ખાદેયં પ્રત્યહં મમ ભોજનમ્
એષ મે જીવિતસ્યાન્તો રામો યદ્ય્ અભિષિચ્યતે

યત્ તદ્ ઉક્તં ત્વયા વાક્યં પ્રીત્યા નૃપતિસત્તમ
તચ્ ચેન્ ન વિતથં કાર્યં વનં ગચ્છતુ રાઘવઃ

સ રાજા સત્યવાગ્ દેવ્યા વરદાનમ્ અનુસ્મરન્
મુમોહ વચનં શ્રુત્વા કૈકેય્યાઃ ક્રૂરમ્ અપ્રિયમ્

તતસ્ તુ સ્થવિરો રાજા સત્યધર્મે વ્યવસ્થિતઃ
જ્યેષ્ઠં યશસ્વિનં પુત્રં રુદન્ રાજ્યમ્ અયાચત

સ પિતુર્ વચનં શ્રીમાન્ અભિષેકાત્ પરં પ્રિયમ્
મનસા પૂર્વમ્ આસાદ્ય વાચા પ્રતિગૃહીતવાન્

દદ્યાન્ ન પ્રતિગૃહ્ણીયાન્ ન બ્રૂયત્ કિં ચિદ્ અપ્રિયમ્
અપિ જીવિતહેતોર્ હિ રામઃ સત્યપરાક્રમઃ

સ વિહાયોત્તરીયાણિ મહાર્હાણિ મહાયશાઃ
વિસૃજ્ય મનસા રાજ્યં જનન્યૈ માં સમાદિશત્

સાહં તસ્યાગ્રતસ્ તૂર્ણં પ્રસ્થિતા વનચારિણી
ન હિ મે તેન હીનાયા વાસઃ સ્વર્ગે ઽપિ રોચતે

પ્રાગ્ એવ તુ મહાભાગઃ સૌમિત્રિર્ મિત્રનન્દનઃ
પૂર્વજસ્યાનુયાત્રાર્થે દ્રુમચીરૈર્ અલંકૃતઃ

તે વયં ભર્તુર્ આદેશં બહુ માન્યદૃઢવ્રતાઃ
પ્રવિષ્ટાઃ સ્મ પુરાદ્ દૃષ્ટં વનં ગમ્ભીરદર્શનમ્

વસતો દણ્ડકારણ્યે તસ્યાહમ્ અમિતૌજસઃ
રક્ષસાપહૃતા ભાર્યા રાવણેન દુરાત્મના

દ્વૌ માસૌ તેન મે કાલો જીવિતાનુગ્રહઃ કૃતઃ
ઊર્ધ્વં દ્વાભ્યાં તુ માસાભ્યાં તતસ્ ત્યક્ષ્યામિ જીવિતમ્