રામાયણ · અધ્યાય 5.030

તતઃ શાખાન્તરે લીનં દૃષ્ટ્વા ચલિતમાનસા
સા દદર્શ કપિં તત્ર પ્રશ્રિતં પ્રિયવાદિનમ્

સા તુ દૃષ્ટ્વા હરિશ્રેષ્ઠં વિનીતવદ્ ઉપસ્થિતમ્
મૈથિલી ચિન્તયામ્ આસ સ્વપ્નો ઽયમ્ ઇતિ ભામિની

સા તં સમીક્ષ્યૈવ ભૃશં વિસંજ્ઞા ગતાસુકલ્પેવ બભૂવ સીતા
ચિરેણ સંજ્ઞાં પ્રતિલભ્ય ચૈવ વિચિન્તયામ્ આસ વિશાલનેત્રા

સ્વપ્નો મયાયં વિકૃતો ઽદ્ય દૃષ્ટઃ શાખામૃગઃ શાસ્ત્રગણૈર્ નિષિદ્ધઃ
સ્વસ્ત્ય્ અસ્તુ રામાય સલક્ષ્મણાય તથા પિતુર્ મે જનકસ્ય રાજ્ઞઃ

સ્વપ્નો ઽપિ નાયં ન હિ મે ઽસ્તિ નિદ્રા શોકેન દુઃખેન ચ પીડિતાયાઃ
સુખં હિ મે નાસ્તિ યતો ઽસ્મિ હીના તેનેન્દુપૂર્ણપ્રતિમાનનેન

અહં હિ તસ્યાદ્ય મનો ભવેન સંપીડિતા તદ્ ગતસર્વભાવા
વિચિન્તયન્તી સતતં તમ્ એવ તથૈવ પશ્યામિ તથા શૃણોમિ

મનોરથઃ સ્યાદ્ ઇતિ ચિન્તયામિ તથાપિ બુદ્ધ્યા ચ વિતર્કયામિ
કિં કારણં તસ્ય હિ નાસ્તિ રૂપં સુવ્યક્તરૂપશ્ ચ વદત્ય્ અયં મામ્

નમો ઽસ્તુ વાચસ્પતયે સવજ્રિણે સ્વયમ્ભુવે ચૈવ હુતાશનાય
અનેન ચોક્તં યદ્ ઇદં મમાગ્રતો વનૌકસા તચ્ ચ તથાસ્તુ નાન્યથા