રામાયણ · અધ્યાય 5.029

એવં બહુવિધાં ચિન્તાં ચિન્તયિત્વ મહાકપિઃ
સંશ્રવે મધુરં વાક્યં વૈદેહ્યા વ્યાજહાર હ

રાજા દશરથો નામ રથકુઞ્જરવાજિનામ્
પુણ્યશીલો મહાકીર્તિર્ ઋજુર્ આસીન્ મહાયશાઃ
ચક્રવર્તિકુલે જાતઃ પુરંદરસમો બલે

અહિંસારતિર્ અક્ષુદ્રો ઘૃણી સત્યપરાક્રમઃ
મુખ્યશ્ ચેક્ષ્વાકુવંશસ્ય લક્ષ્મીવાંલ્ લક્ષ્મિવર્ધનઃ

પાર્થિવવ્યઞ્જનૈર્ યુક્તઃ પૃથુશ્રીઃ પાર્થિવર્ષભઃ
પૃથિવ્યાં ચતુરન્તયાં વિશ્રુતઃ સુખદઃ સુખી

તસ્ય પુત્રઃ પ્રિયો જ્યેષ્ઠસ્ તારાધિપનિભાનનઃ
રામો નામ વિશેષજ્ઞઃ શ્રેષ્ઠઃ સર્વધનુષ્મતામ્

રક્ષિતા સ્વસ્ય વૃત્તસ્ય સ્વજનસ્યાપિ રક્ષિતા
રક્ષિતા જીવલોકસ્ય ધર્મસ્ય ચ પરંતપઃ

તસ્ય સત્યાભિસંધસ્ય વૃદ્ધસ્ય વચનાત્ પિતુઃ
સભાર્યઃ સહ ચ ભ્રાત્રા વીરઃ પ્રવ્રજિતો વનમ્

તેન તત્ર મહારણ્યે મૃગયાં પરિધાવતા
જનસ્થાનવધં શ્રુત્વા હતૌ ચ ખરદૂષણૌ
તતસ્ ત્વ્ અમર્ષાપહૃતા જાનકી રાવણેન તુ

યથારૂપાં યથાવર્ણાં યથાલક્ષ્મીં વિનિશ્ચિતામ્
અશ્રૌષં રાઘવસ્યાહં સેયમ્ આસાદિતા મયા

વિરરામૈવમ્ ઉક્ત્વાસૌ વાચં વાનરપુંગવઃ
જાનકી ચાપિ તચ્ છ્રુત્વા વિસ્મયં પરમં ગતા

તતઃ સા વક્રકેશાન્તા સુકેશી કેશસંવૃતમ્
ઉન્નમ્ય વદનં ભીરુઃ શિંશપાવૃક્ષમ્ ઐક્ષત

સા તિર્યગ્ ઊર્ધ્વં ચ તથાપ્ય્ અધસ્તાન્ નિરીક્ષમાણા તમ્ અચિન્ત્ય બુદ્ધિમ્
દદર્શ પિઙ્ગાધિપતેર્ અમાત્યં વાતાત્મજં સૂર્યમ્ ઇવોદયસ્થમ્