રામાયણ · અધ્યાય 5.018

સ તાં પરિવૃતાં દીનાં નિરાનન્દાં તપસ્વિનીમ્
સાકારૈર્ મધુરૈર્ વાક્યૈર્ ન્યદર્શયત રાવણઃ

માં દૃષ્ટ્વા નાગનાસોરુગૂહમાના સ્તનોદરમ્
અદર્શનમ્ ઇવાત્માનં ભયાન્ નેતું ત્વમ્ ઇચ્છસિ

કામયે ત્વાં વિશાલાક્ષિ બહુમન્યસ્વ માં પ્રિયે
સર્વાઙ્ગગુણસંપન્ને સર્વલોકમનોહરે

નેહ કે ચિન્ મનુષ્યા વા રાક્ષસાઃ કામરૂપિણઃ
વ્યપસર્પતુ તે સીતે ભયં મત્તઃ સમુત્થિતમ્

સ્વધર્મે રક્ષસાં ભીરુ સર્વથૈષ ન સંશયઃ
ગમનં વા પરસ્ત્રીણાં હરણં સંપ્રમથ્ય વા

એવં ચૈતદ્ અકામાં ચ ન ત્વાં સ્પ્રક્ષ્યામિ મૈથિલિ
કામં કામઃ શરીરે મે યથાકામં પ્રવર્તતામ્

દેવિ નેહ ભયં કાર્યં મયિ વિશ્વસિહિ પ્રિયે
પ્રણયસ્વ ચ તત્ત્વેન મૈવં ભૂઃ શોકલાલસા

એકવેણી ધરાશય્યા ધ્યાનં મલિનમ્ અમ્બરમ્
અસ્થાને ઽપ્ય્ ઉપવાસશ્ ચ નૈતાન્ય્ ઔપયિકાનિ તે

વિચિત્રાણિ ચ માલ્યાનિ ચન્દનાન્ય્ અગરૂણિ ચ
વિવિધાનિ ચ વાસાંસિ દિવ્યાન્ય્ આભરણાનિ ચ

મહાર્હાણિ ચ પાનાનિ યાનાનિ શયનાનિ ચ
ગીતં નૃત્તં ચ વાદ્યં ચ લભ માં પ્રાપ્ય મૈથિલિ

સ્ત્રીરત્નમ્ અસિ મૈવં ભૂઃ કુરુ ગાત્રેષુ ભૂષણમ્
માં પ્રાપ્ય તુ કથં હિ સ્યાસ્ ત્વમ્ અનર્હા સુવિગ્રહે

ઇદં તે ચારુસંજાતં યૌવનં વ્યતિવર્તતે
યદ્ અતીતં પુનર્ નૈતિ સ્રોતઃ શીઘ્રમ્ અપામ્ ઇવ

ત્વાં કૃત્વોપરતો મન્યે રૂપકર્તા સ વિશ્વકૃત્
ન હિ રૂપોપમા ત્વ્ અન્યા તવાસ્તિ શુભદર્શને

ત્વાં સમાસાદ્ય વૈદેહિ રૂપયૌવનશાલિનીમ્
કઃ પુમાન્ અતિવર્તેત સાક્ષાદ્ અપિ પિતામહઃ

યદ્ યત્ પશ્યામિ તે ગાત્રં શીતાંશુસદૃશાનને
તસ્મિંસ્ તસ્મિન્ પૃથુશ્રોણિ ચક્ષુર્ મમ નિબધ્યતે

ભવ મૈથિલિ ભાર્યા મે મોહમ્ એનં વિસર્જય
બહ્વીનામ્ ઉત્તમસ્ત્રીણાં મમાગ્રમહિષી ભવ

લોકેભ્યો યાનિ રત્નાનિ સંપ્રમથ્યાહૃતાનિ મે
તાનિ તે ભીરુ સર્વાણિ રાજ્યં ચૈતદ્ અહં ચ તે

વિજિત્ય પૃથિવીં સર્વાં નાનાનગરમાલિનીમ્
જનકાય પ્રદાસ્યામિ તવ હેતોર્ વિલાસિનિ

નેહ પશ્યામિ લોકે ઽન્યં યો મે પ્રતિબલો ભવેત્
પશ્ય મે સુમહદ્ વીર્યમ્ અપ્રતિદ્વન્દ્વમ્ આહવે

અસકૃત્ સંયુગે ભગ્ના મયા વિમૃદિતધ્વજાઃ
અશક્તાઃ પ્રત્યનીકેષુ સ્થાતું મમ સુરાસુરાઃ

ઇચ્છ માં ક્રિયતામ્ અદ્ય પ્રતિકર્મ તવોત્તમમ્
સપ્રભાણ્ય્ અવસજ્જન્તાં તવાઙ્ગે ભૂષણાનિ ચ
સાધુ પશ્યામિ તે રૂપં સંયુક્તં પ્રતિકર્મણા

પ્રતિકર્માભિસંયુક્તા દાક્ષિણ્યેન વરાનને
ભુઙ્ક્ષ્વ ભોગાન્ યથાકામં પિબ ભીરુ રમસ્વ ચ
યથેષ્ટં ચ પ્રયચ્છ ત્વં પૃથિવીં વા ધનાનિ ચ

લલસ્વ મયિ વિસ્રબ્ધા ધૃષ્ટમ્ આજ્ઞાપયસ્વ ચ
મત્પ્રભાવાલ્ લલન્ત્યાશ્ ચ લલન્તાં બાન્ધવાસ્ તવ

ઋદ્ધિં મમાનુપશ્ય ત્વં શ્રિયં ભદ્રે યશશ્ ચ મે
કિં કરિષ્યસિ રામેણ સુભગે ચીરવાસસા

નિક્ષિપ્તવિજયો રામો ગતશ્રીર્ વનગોચરઃ
વ્રતી સ્થણ્ડિલશાયી ચ શઙ્કે જીવતિ વા ન વા

ન હિ વૈદેહિ રામસ્ ત્વાં દ્રષ્ટું વાપ્ય્ ઉપલપ્સ્યતે
પુરો બલાકૈર્ અસિતૈર્ મેઘૈર્ જ્યોત્સ્નામ્ ઇવાવૃતામ્

ન ચાપિ મમ હસ્તાત્ ત્વાં પ્રાપ્તુમ્ અર્હતિ રાઘવઃ
હિરણ્યકશિપુઃ કીર્તિમ્ ઇન્દ્રહસ્તગતામ્ ઇવ

ચારુસ્મિતે ચારુદતિ ચારુનેત્રે વિલાસિનિ
મનો હરસિ મે ભીરુ સુપર્ણઃ પન્નગં યથા

ક્લિષ્ટકૌશેયવસનાં તન્વીમ્ અપ્ય્ અનલંકૃતામ્
તાં દૃષ્ટ્વા સ્વેષુ દારેષુ રતિં નોપલભામ્ય્ અહમ્

અન્તઃપુરનિવાસિન્યઃ સ્ત્રિયઃ સર્વગુણાન્વિતાઃ
યાવન્ત્યો મમ સર્વાસામ્ ઐશ્વર્યં કુરુ જાનકિ

મમ હ્ય્ અસિતકેશાન્તે ત્રૈલોક્યપ્રવરાઃ સ્ત્રિયઃ
તાસ્ ત્વાં પરિચરિષ્યન્તિ શ્રિયમ્ અપ્સરસો યથા

યાનિ વૈશ્રવણે સુભ્રુ રત્નાનિ ચ ધનાનિ ચ
તાનિ લોકાંશ્ ચ સુશ્રોણિ માં ચ ભુઙ્ક્ષ્વ યથાસુખમ્

ન રામસ્ તપસા દેવિ ન બલેન ન વિક્રમૈઃ
ન ધનેન મયા તુલ્યસ્ તેજસા યશસાપિ વા

પિબ વિહર રમસ્વ ભુઙ્ક્ષ્વ ભોગાન્ ધનનિચયં પ્રદિશામિ મેદિનીં ચ
મયિ લલ લલને યથાસુખં ત્વં ત્વયિ ચ સમેત્ય લલન્તુ બાન્ધવાસ્ તે

કુસુમિતતરુજાલસંતતાનિ ભ્રમરયુતાનિ સમુદ્રતીરજાનિ
કનકવિમલહારભૂષિતાઙ્ગી વિહર મયા સહ ભીરુ કાનનાનિ