રામાયણ · અધ્યાય 5.017

તસ્મિન્ન્ એવ તતઃ કાલે રાજપુત્રી ત્વ્ અનિન્દિતા
રૂપયૌવનસંપન્નં ભૂષણોત્તમભૂષિતમ્

તતો દૃષ્ટ્વૈવ વૈદેહી રાવણં રાક્ષસાધિપમ્
પ્રાવેપત વરારોહા પ્રવાતે કદલી યથા

ઊરુભ્યામ્ ઉદરં છાદ્ય બાહુભ્યાં ચ પયોધરૌ
ઉપવિષ્ટા વિશાલાક્ષી રુદન્તી વરવર્ણિની

દશગ્રીવસ્ તુ વૈદેહીં રક્ષિતાં રાક્ષસીગણૈઃ
દદર્શ દીનાં દુઃખાર્તં નાવં સન્નામ્ ઇવાર્ણવે

અસંવૃતાયામ્ આસીનાં ધરણ્યાં સંશિતવ્રતામ્
છિન્નાં પ્રપતિતાં ભૂમૌ શાખામ્ ઇવ વનસ્પતેઃ
મલમણ્ડનદિગ્ધાઙ્ગીં મણ્ડનાર્હામ્ અમણ્ડિતામ્

સમીપં રાજસિંહસ્ય રામસ્ય વિદિતાત્મનઃ
સંકલ્પહયસંયુક્તૈર્ યાન્તીમ્ ઇવ મનોરથૈઃ

શુષ્યન્તીં રુદતીમ્ એકાં ધ્યાનશોકપરાયણામ્
દુઃખસ્યાન્તમ્ અપશ્યન્તીં રામાં રામમ્ અનુવ્રતામ્

વેષ્ટમાનામ્ અથાવિષ્ટાં પન્નગેન્દ્રવધૂમ્ ઇવ
ધૂપ્યમાનાં ગ્રહેણેવ રોહિણીં ધૂમકેતુના

વૃત્તશીલે કુલે જાતામ્ આચારવતિ ધાર્મિકે
પુનઃ સંસ્કારમ્ આપન્નાં જાતમ્ ઇવ ચ દુષ્કુલે

સન્નામ્ ઇવ મહાકીર્તિં શ્રદ્ધામ્ ઇવ વિમાનિતામ્
પ્રજ્ઞામ્ ઇવ પરિક્ષીણામ્ આશાં પ્રતિહતામ્ ઇવ

આયતીમ્ ઇવ વિધ્વસ્તામ્ આજ્ઞાં પ્રતિહતામ્ ઇવ
દીપ્તામ્ ઇવ દિશં કાલે પૂજામ્ અપહૃતામ્ ઇવ

પદ્મિનીમ્ ઇવ વિધ્વસ્તાં હતશૂરાં ચમૂમ્ ઇવ
પ્રભામ્ ઇવ તપોધ્વસ્તામ્ ઉપક્ષીણામ્ ઇવાપગામ્

વેદીમ્ ઇવ પરામૃષ્ટાં શાન્તામ્ અગ્નિશિખામ્ ઇવ
પૌર્ણમાસીમ્ ઇવ નિશાં રાહુગ્રસ્તેન્દુમણ્ડલામ્

ઉત્કૃષ્ટપર્ણકમલાં વિત્રાસિતવિહંગમામ્
હસ્તિહસ્તપરામૃષ્ટામ્ આકુલાં પદ્મિનીમ્ ઇવ

પતિશોકાતુરાં શુષ્કાં નદીં વિસ્રાવિતામ્ ઇવ
પરયા મૃજયા હીનાં કૃષ્ણપક્ષે નિશામ્ ઇવ

સુકુમારીં સુજાતાઙ્ગીં રત્નગર્ભગૃહોચિતામ્
તપ્યમાનામ્ ઇવોષ્ણેન મૃણાલીમ્ અચિરોદ્ધૃતામ્

ગૃહીતામાલિતાં સ્તમ્ભે યૂથપેન વિનાકૃતામ્
નિઃશ્વસન્તીં સુદુઃખાર્તાં ગજરાજવધૂમ્ ઇવ

એકયા દીર્ઘયા વેણ્યા શોભમાનામ્ અયત્નતઃ
નીલયા નીરદાપાયે વનરાજ્યા મહીમ્ ઇવ

ઉપવાસેન શોકેન ધ્યાનેન ચ ભયેન ચ
પરિક્ષીણાં કૃશાં દીનામ્ અલ્પાહારાં તપોધનામ્

આયાચમાનાં દુઃખાર્તાં પ્રાઞ્જલિં દેવતામ્ ઇવ
ભાવેન રઘુમુખ્યસ્ય દશગ્રીવપરાભવમ્

સમીક્ષમાણાં રુદતીમ્ અનિન્દિતાં સુપક્ષ્મતામ્રાયતશુક્લલોચનામ્
અનુવ્રતાં રામમ્ અતીવ મૈથિલીં પ્રલોભયામ્ આસ વધાય રાવણઃ