Ramayana · Chapter 5.018

sa tāṃ parivṛtāṃ dīnāṃ nirānandāṃ tapasvinīm
sākārair madhurair vākyair nyadarśayata rāvaṇaḥ

māṃ dṛṣṭvā nāganāsorugūhamānā stanodaram
adarśanam ivātmānaṃ bhayān netuṃ tvam icchasi

kāmaye tvāṃ viśālākṣi bahumanyasva māṃ priye
sarvāṅgaguṇasaṃpanne sarvalokamanohare

neha ke cin manuṣyā vā rākṣasāḥ kāmarūpiṇaḥ
vyapasarpatu te sīte bhayaṃ mattaḥ samutthitam

svadharme rakṣasāṃ bhīru sarvathaiṣa na saṃśayaḥ
gamanaṃ vā parastrīṇāṃ haraṇaṃ saṃpramathya vā

evaṃ caitad akāmāṃ ca na tvāṃ sprakṣyāmi maithili
kāmaṃ kāmaḥ śarīre me yathākāmaṃ pravartatām

devi neha bhayaṃ kāryaṃ mayi viśvasihi priye
praṇayasva ca tattvena maivaṃ bhūḥ śokalālasā

ekaveṇī dharāśayyā dhyānaṃ malinam ambaram
asthāne 'py upavāsaś ca naitāny aupayikāni te

vicitrāṇi ca mālyāni candanāny agarūṇi ca
vividhāni ca vāsāṃsi divyāny ābharaṇāni ca

mahārhāṇi ca pānāni yānāni śayanāni ca
gītaṃ nṛttaṃ ca vādyaṃ ca labha māṃ prāpya maithili

strīratnam asi maivaṃ bhūḥ kuru gātreṣu bhūṣaṇam
māṃ prāpya tu kathaṃ hi syās tvam anarhā suvigrahe

idaṃ te cārusaṃjātaṃ yauvanaṃ vyativartate
yad atītaṃ punar naiti srotaḥ śīghram apām iva

tvāṃ kṛtvoparato manye rūpakartā sa viśvakṛt
na hi rūpopamā tv anyā tavāsti śubhadarśane

tvāṃ samāsādya vaidehi rūpayauvanaśālinīm
kaḥ pumān ativarteta sākṣād api pitāmahaḥ

yad yat paśyāmi te gātraṃ śītāṃśusadṛśānane
tasmiṃs tasmin pṛthuśroṇi cakṣur mama nibadhyate

bhava maithili bhāryā me moham enaṃ visarjaya
bahvīnām uttamastrīṇāṃ mamāgramahiṣī bhava

lokebhyo yāni ratnāni saṃpramathyāhṛtāni me
tāni te bhīru sarvāṇi rājyaṃ caitad ahaṃ ca te

vijitya pṛthivīṃ sarvāṃ nānānagaramālinīm
janakāya pradāsyāmi tava hetor vilāsini

neha paśyāmi loke 'nyaṃ yo me pratibalo bhavet
paśya me sumahad vīryam apratidvandvam āhave

asakṛt saṃyuge bhagnā mayā vimṛditadhvajāḥ
aśaktāḥ pratyanīkeṣu sthātuṃ mama surāsurāḥ

iccha māṃ kriyatām adya pratikarma tavottamam
saprabhāṇy avasajjantāṃ tavāṅge bhūṣaṇāni ca
sādhu paśyāmi te rūpaṃ saṃyuktaṃ pratikarmaṇā

pratikarmābhisaṃyuktā dākṣiṇyena varānane
bhuṅkṣva bhogān yathākāmaṃ piba bhīru ramasva ca
yatheṣṭaṃ ca prayaccha tvaṃ pṛthivīṃ vā dhanāni ca

lalasva mayi visrabdhā dhṛṣṭam ājñāpayasva ca
matprabhāvāl lalantyāś ca lalantāṃ bāndhavās tava

ṛddhiṃ mamānupaśya tvaṃ śriyaṃ bhadre yaśaś ca me
kiṃ kariṣyasi rāmeṇa subhage cīravāsasā

nikṣiptavijayo rāmo gataśrīr vanagocaraḥ
vratī sthaṇḍilaśāyī ca śaṅke jīvati vā na vā

na hi vaidehi rāmas tvāṃ draṣṭuṃ vāpy upalapsyate
puro balākair asitair meghair jyotsnām ivāvṛtām

na cāpi mama hastāt tvāṃ prāptum arhati rāghavaḥ
hiraṇyakaśipuḥ kīrtim indrahastagatām iva

cārusmite cārudati cārunetre vilāsini
mano harasi me bhīru suparṇaḥ pannagaṃ yathā

kliṣṭakauśeyavasanāṃ tanvīm apy analaṃkṛtām
tāṃ dṛṣṭvā sveṣu dāreṣu ratiṃ nopalabhāmy aham

antaḥpuranivāsinyaḥ striyaḥ sarvaguṇānvitāḥ
yāvantyo mama sarvāsām aiśvaryaṃ kuru jānaki

mama hy asitakeśānte trailokyapravarāḥ striyaḥ
tās tvāṃ paricariṣyanti śriyam apsaraso yathā

yāni vaiśravaṇe subhru ratnāni ca dhanāni ca
tāni lokāṃś ca suśroṇi māṃ ca bhuṅkṣva yathāsukham

na rāmas tapasā devi na balena na vikramaiḥ
na dhanena mayā tulyas tejasā yaśasāpi vā

piba vihara ramasva bhuṅkṣva bhogān dhananicayaṃ pradiśāmi medinīṃ ca
mayi lala lalane yathāsukhaṃ tvaṃ tvayi ca sametya lalantu bāndhavās te

kusumitatarujālasaṃtatāni bhramarayutāni samudratīrajāni
kanakavimalahārabhūṣitāṅgī vihara mayā saha bhīru kānanāni