રામાયણ · અધ્યાય 5.016

તથા વિપ્રેક્ષમાણસ્ય વનં પુષ્પિતપાદપમ્
વિચિન્વતશ્ ચ વૈદેહીં કિં ચિચ્ છેષા નિશાભવત્

ષડઙ્ગવેદવિદુષાં ક્રતુપ્રવરયાજિનામ્
શુશ્રાવ બ્રહ્મઘોષાંશ્ ચ વિરાત્રે બ્રહ્મરક્ષસામ્

અથ મઙ્ગલવાદિત્રૈઃ શબ્દૈઃ શ્રોત્રમનોહરૈઃ
પ્રાબોધ્યત મહાબાહુર્ દશગ્રીવો મહાબલઃ

વિબુધ્ય તુ યથાકાલં રાક્ષસેન્દ્રઃ પ્રતાવપાન્
સ્રસ્તમાલ્યામ્બરધરો વૈદેહીમ્ અન્વચિન્તયત્

ભૃશં નિયુક્તસ્ તસ્યાં ચ મદનેન મદોત્કટઃ
ન સ તં રાક્ષસઃ કામં શશાકાત્મનિ ગૂહિતુમ્

સ સર્વાભરણૈર્ યુક્તો બિભ્રચ્ છ્રિયમ્ અનુત્તમામ્
તાં નગૈર્ વિવિધૈર્ જુષ્ટાં સર્વપુષ્પફલોપગૈઃ

વૃતાં પુષ્કરિણીભિશ્ ચ નાનાપુષ્પોપશોભિતામ્
સદામદૈશ્ ચ વિહગૈર્ વિચિત્રાં પરમાદ્ભુતામ્

ઈહામૃગૈશ્ ચ વિવિધૈશ્ વૃતાં દૃષ્ટિમનોહરૈઃ
વીથીઃ સંપ્રેક્ષમાણશ્ ચ મણિકાઞ્ચનતોરણાઃ

નાનામૃગગણાકીર્ણાં ફલૈઃ પ્રપતિતૈર્ વૃતામ્
અશોકવનિકામ્ એવ પ્રાવિશત્ સંતતદ્રુમામ્

અઙ્ગનાશતમાત્રં તુ તં વ્રજન્તમ્ અનુવ્રજત્
મહેન્દ્રમ્ ઇવ પૌલસ્ત્યં દેવગન્ધર્વયોષિતઃ

દીપિકાઃ કાઞ્ચનીઃ કાશ્ ચિજ્ જગૃહુસ્ તત્ર યોષિતઃ
બાલવ્યજનહસ્તાશ્ ચ તાલવૃન્તાનિ ચાપરાઃ

કાઞ્ચનૈર્ અપિ ભૃઙ્ગારૈર્ જહ્રુઃ સલિલમ્ અગ્રતઃ
મણ્ડલાગ્રાન્ અસીંશ્ ચૈવ ગૃહ્યાન્યાઃ પૃષ્ઠતો યયુઃ

કા ચિદ્ રત્નમયીં પાત્રીં પૂર્ણાં પાનસ્ય ભામિની
દક્ષિણા દક્ષિણેનૈવ તદા જગ્રાહ પાણિના

રાજહંસપ્રતીકાશં છત્રં પૂર્ણશશિપ્રભમ્
સૌવર્ણદણ્ડમ્ અપરા ગૃહીત્વા પૃષ્ઠતો યયૌ

નિદ્રામદપરીતાક્ષ્યો રાવણસ્યોત્તમસ્ત્રિયઃ
અનુજગ્મુઃ પતિં વીરં ઘનં વિદ્યુલ્લતા ઇવ

તતઃ કાઞ્ચીનિનાદં ચ નૂપુરાણાં ચ નિઃસ્વનમ્
શુશ્રાવ પરમસ્ત્રીણાં સ કપિર્ મારુતાત્મજઃ

તં ચાપ્રતિમકર્માણમ્ અચિન્ત્યબલપૌરુષમ્
દ્વારદેશમ્ અનુપ્રાપ્તં દદર્શ હનુમાન્ કપિઃ

દીપિકાભિર્ અનેકાભિઃ સમન્તાદ્ અવભાસિતમ્
ગન્ધતૈલાવસિક્તાભિર્ ધ્રિયમાણાભિર્ અગ્રતઃ

કામદર્પમદૈર્ યુક્તં જિહ્મતામ્રાયતેક્ષણમ્
સમક્ષમ્ ઇવ કન્દર્પમ્ અપવિદ્ધ શરાસનમ્

મથિતામૃતફેનાભમ્ અરજો વસ્ત્રમ્ ઉત્તમમ્
સલીલમ્ અનુકર્ષન્તં વિમુક્તં સક્તમ્ અઙ્ગદે

તં પત્રવિટપે લીનઃ પત્રપુષ્પઘનાવૃતઃ
સમીપમ્ ઉપસંક્રાન્તં નિધ્યાતુમ્ ઉપચક્રમે

અવેક્ષમાણશ્ ચ તતો દદર્શ કપિકુઞ્જરઃ
રૂપયૌવનસંપન્ના રાવણસ્ય વરસ્ત્રિયઃ

તાભિઃ પરિવૃતો રાજા સુરૂપાભિર્ મહાયશાઃ
તન્મૃગદ્વિજસંઘુષ્ટં પ્રવિષ્ટઃ પ્રમદાવનમ્

ક્ષીબો વિચિત્રાભરણઃ શઙ્કુકર્ણો મહાબલઃ
તેન વિશ્રવસઃ પુત્રઃ સ દૃષ્ટો રાક્ષસાધિપઃ

વૃતઃ પરમનારીભિસ્ તારાભિર્ ઇવ ચન્દ્રમાઃ
તં દદર્શ મહાતેજાસ્ તેજોવન્તં મહાકપિઃ

રાવણો ઽયં મહાબાહુર્ ઇતિ સંચિન્ત્ય વાનરઃ
અવપ્લુતો મહાતેજા હનૂમાન્ મારુતાત્મજઃ

સ તથાપ્ય્ ઉગ્રતેજાઃ સન્ નિર્ધૂતસ્ તસ્ય તેજસા
પત્રગુહ્યાન્તરે સક્તો હનૂમાન્ સંવૃતો ઽભવત્

સ તામ્ અસિતકેશાન્તાં સુશ્રોણીં સંહતસ્તનીમ્
દિદૃક્ષુર્ અસિતાપાઙ્ગીમ્ ઉપાવર્તત રાવણઃ