રામાયણ · અધ્યાય 5.015

તતઃ કુમુદષણ્ડાભો નિર્મલં નિર્મલઃ સ્વયમ્
પ્રજગામ નભશ્ ચન્દ્રો હંસો નીલમ્ ઇવોદકમ્

સાચિવ્યમ્ ઇવ કુર્વન્ સ પ્રભયા નિર્મલપ્રભઃ
ચન્દ્રમા રશ્મિભિઃ શીતૈઃ સિષેવે પવનાત્મજમ્

સ દદર્શ તતઃ સીતાં પૂર્ણચન્દ્રનિભાનનામ્
શોકભારૈર્ ઇવ ન્યસ્તાં ભારૈર્ નાવમ્ ઇવામ્ભસિ

દિદૃક્ષમાણો વૈદેહીં હનૂમાન્ મારુતાત્મજઃ
સ દદર્શાવિદૂરસ્થા રાક્ષસીર્ ઘોરદર્શનાઃ

એકાક્ષીમ્ એકકર્ણાં ચ કર્ણપ્રાવરણાં તથા
અકર્ણાં શઙ્કુકર્ણાં ચ મસ્તકોચ્છ્વાસનાસિકામ્

અતિકાયોત્તમાઙ્ગીં ચ તનુદીર્ઘશિરોધરામ્
ધ્વસ્તકેશીં તથાકેશીં કેશકમ્બલધારિણીમ્

લમ્બકર્ણલલાટાં ચ લમ્બોદરપયોધરામ્
લમ્બૌષ્ઠીં ચિબુકૌષ્ઠીં ચ લમ્બાસ્યાં લમ્બજાનુકામ્

હ્રસ્વાં દીર્ઘાં ચ કુબ્જાં ચ વિકટાં વામનાં તથા
કરાલાં ભુગ્નવસ્ત્રાં ચ પિઙ્ગાક્ષીં વિકૃતાનનામ્

વિકૃતાઃ પિઙ્ગલાઃ કાલીઃ ક્રોધનાઃ કલહપ્રિયાઃ
કાલાયસમહાશૂલકૂટમુદ્ગરધારિણીઃ

વરાહમૃગશાર્દૂલમહિષાજશિવા મુખાઃ
ગજોષ્ટ્રહયપાદાશ્ ચ નિખાતશિરસો ઽપરાઃ

એકહસ્તૈકપાદાશ્ ચ ખરકર્ણ્યશ્વકર્ણિકાઃ
ગોકર્ણીર્ હસ્તિકર્ણીશ્ ચ હરિકર્ણીસ્ તથાપરાઃ

અનાસા અતિનાસાશ્ ચ તિર્યન્ નાસા વિનાસિકાઃ
ગજસંનિભનાસાશ્ ચ લલાટોચ્છ્વાસનાસિકાઃ

હસ્તિપાદા મહાપાદા ગોપાદાઃ પાદચૂલિકાઃ
અતિમાત્રશિરોગ્રીવા અતિમાત્રકુચોદરીઃ

અતિમાત્રાસ્ય નેત્રાશ્ ચ દીર્ઘજિહ્વાનખાસ્ તથા
અજામુખીર્ હસ્તિમુખીર્ ગોમુખીઃ સૂકરીમુખીઃ

હયોષ્ટ્રખરવક્ત્રાશ્ ચ રાક્ષસીર્ ઘોરદર્શનાઃ
શૂલમુદ્ગરહસ્તાશ્ ચ ક્રોધનાઃ કલહપ્રિયાઃ

કરાલા ધૂમ્રકેશીશ્ ચ રક્ષસીર્ વિકૃતાનનાઃ
પિબન્તીઃ સતતં પાનં સદા માંસસુરાપ્રિયાઃ

માંસશોણિતદિગ્ધાઙ્ગીર્ માંસશોણિતભોજનાઃ
તા દદર્શ કપિશ્રેષ્ઠો રોમહર્ષણદર્શનાઃ

સ્કન્ધવન્તમ્ ઉપાસીનાઃ પરિવાર્ય વનસ્પતિમ્
તસ્યાધસ્તાચ્ ચ તાં દેવીં રાજપુત્રીમ્ અનિન્દિતામ્

લક્ષયામ્ આસ લક્ષ્મીવાન્ હનૂમાઞ્ જનકાત્મજામ્
નિષ્પ્રભાં શોકસંતપ્તાં મલસંકુલમૂર્ધજામ્

ક્ષીણપુણ્યાં ચ્યુતાં ભૂમૌ તારાં નિપતિતામ્ ઇવ
ચારિત્ર્ય વ્યપદેશાઢ્યાં ભર્તૃદર્શનદુર્ગતામ્

ભૂષણૈર્ ઉત્તમૈર્ હીનાં ભર્તૃવાત્સલ્યભૂષિતામ્
રાક્ષસાધિપસંરુદ્ધાં બન્ધુભિશ્ ચ વિનાકૃતામ્

વિયૂથાં સિંહસંરુદ્ધાં બદ્ધાં ગજવધૂમ્ ઇવ
ચન્દ્રલેખાં પયોદાન્તે શારદાભ્રૈર્ ઇવાવૃતામ્

ક્લિષ્ટરૂપામ્ અસંસ્પર્શાદ્ અયુક્તામ્ ઇવ વલ્લકીમ્
સીતાં ભર્તૃહિતે યુક્તામ્ અયુક્તાં રક્ષસાં વશે

અશોકવનિકામધ્યે શોકસાગરમ્ આપ્લુતામ્
તાભિઃ પરિવૃતાં તત્ર સગ્રહામ્ ઇવ રોહિણીમ્
દદર્શ હનુમાન્ દેવીં લતામ્ અકુસુમામ્ ઇવ

સા મલેન ચ દિગ્ધાઙ્ગી વપુષા ચાપ્ય્ અલંકૃતા
મૃણાલી પઙ્કદિગ્ધેવ વિભાતિ ચ ન ભાતિ ચ

મલિનેન તુ વસ્ત્રેણ પરિક્લિષ્ટેન ભામિનીમ્
સંવૃતાં મૃગશાવાક્ષીં દદર્શ હનુમાન્ કપિઃ

તાં દેવીં દીનવદનામ્ અદીનાં ભર્તૃતેજસા
રક્ષિતાં સ્વેન શીલેન સીતામ્ અસિતલોચનામ્

તાં દૃષ્ટ્વા હનુમાન્ સીતાં મૃગશાવનિભેક્ષણામ્
મૃગકન્યામ્ ઇવ ત્રસ્તાં વીક્ષમાણાં સમન્તતઃ

દહન્તીમ્ ઇવ નિઃશ્વાસૈર્ વૃક્ષાન્ પલ્લવધારિણઃ
સંઘાતમ્ ઇવ શોકાનાં દુઃખસ્યોર્મિમ્ ઇવોત્થિતામ્

તાં ક્ષામાં સુવિભક્તાઙ્ગીં વિનાભરણશોભિનીમ્

પ્રહર્ષમ્ અતુલં લેભે મારુતિઃ પ્રેક્ષ્ય મૈથિલીમ્
હર્ષજાનિ ચ સો ઽશ્રૂણિ તાં દૃષ્ટ્વા મદિરેક્ષણામ્
મુમોચ હનુમાંસ્ તત્ર નમશ્ ચક્રે ચ રાઘવમ્

નમસ્કૃત્વા ચ રામાય લક્ષ્મણાય ચ વીર્યવાન્
સીતાદર્શનસંહૃષ્ટો હનૂમાન્ સંવૃતો ઽભવત્