રામાયણ · અધ્યાય 5.006

સ વેશ્મજાલં બલવાન્ દદર્શ વ્યાસક્તવૈદૂર્યસુવર્ણજાલમ્
યથા મહત્ પ્રાવૃષિ મેઘજાલં વિદ્યુત્પિનદ્ધં સવિહંગજાલમ્

નિવેશનાનાં વિવિધાશ્ ચ શાલાઃ પ્રધાનશઙ્ખાયુધચાપશાલાઃ
મનોહરાશ્ ચાપિ પુનર્ વિશાલા દદર્શ વેશ્માદ્રિષુ ચન્દ્રશાલાઃ

ગૃહાણિ નાનાવસુરાજિતાનિ દેવાસુરૈશ્ ચાપિ સુપૂજિતાનિ
સર્વૈશ્ ચ દોષૈઃ પરિવર્જિતાનિ કપિર્ દદર્શ સ્વબલાર્જિતાનિ

તાનિ પ્રયત્નાભિસમાહિતાનિ મયેન સાક્ષાદ્ ઇવ નિર્મિતાનિ
મહીતલે સર્વગુણોત્તરાણિ દદર્શ લઙ્કાધિપતેર્ ગૃહાણિ

તતો દદર્શોચ્છ્રિતમેઘરૂપં મનોહરં કાઞ્ચનચારુરૂપમ્
રક્ષોઽધિપસ્યાત્મબલાનુરૂપં ગૃહોત્તમં હ્ય્ અપ્રતિરૂપરૂપમ્

મહીતલે સ્વર્ગમ્ ઇવ પ્રકીર્ણં શ્રિયા જ્વલન્તં બહુરત્નકીર્ણમ્
નાનાતરૂણાં કુસુમાવકીર્ણં ગિરેર્ ઇવાગ્રં રજસાવકીર્ણમ્

નારીપ્રવેકૈર્ ઇવ દીપ્યમાનં તડિદ્ભિર્ અમ્ભોદવદ્ અર્ચ્યમાનમ્
હંસપ્રવેકૈર્ ઇવ વાહ્યમાનં શ્રિયા યુતં ખે સુકૃતાં વિમાનમ્

યથા નગાગ્રં બહુધાતુચિત્રં યથા નભશ્ ચ ગ્રહચન્દ્રચિત્રમ્
દદર્શ યુક્તીકૃતમેઘચિત્રં વિમાનરત્નં બહુરત્નચિત્રમ્

મહી કૃતા પર્વતરાજિપૂર્ણા શૈલાઃ કૃતા વૃક્ષવિતાનપૂર્ણાઃ
વૃક્ષાઃ કૃતાઃ પુષ્પવિતાનપૂર્ણાઃ પુષ્પં કૃતં કેસરપત્રપૂર્ણમ્

કૃતાનિ વેશ્માનિ ચ પાણ્ડુરાણિ તથા સુપુષ્પા અપિ પુષ્કરિણ્યઃ
પુનશ્ ચ પદ્માનિ સકેસરાણિ ધન્યાનિ ચિત્રાણિ તથા વનાનિ

પુષ્પાહ્વયં નામ વિરાજમાનં રત્નપ્રભાભિશ્ ચ વિવર્ધમાનમ્
વેશ્મોત્તમાનામ્ અપિ ચોચ્ચમાનં મહાકપિસ્ તત્ર મહાવિમાનમ્

કૃતાશ્ ચ વૈદૂર્યમયા વિહંગા રૂપ્યપ્રવાલૈશ્ ચ તથા વિહંગાઃ
ચિત્રાશ્ ચ નાનાવસુભિર્ ભુજંગા જાત્યાનુરૂપાસ્ તુરગાઃ શુભાઙ્ગાઃ

પ્રવાલજામ્બૂનદપુષ્પપક્ષાઃ સલીલમ્ આવર્જિતજિહ્મપક્ષાઃ
કામસ્ય સાક્ષાદ્ ઇવ ભાન્તિ પક્ષાઃ કૃતા વિહંગાઃ સુમુખાઃ સુપક્ષાઃ

નિયુજ્યમાનાશ્ ચ ગજાઃ સુહસ્તાઃ સકેસરાશ્ ચોત્પલપત્રહસ્તાઃ
બભૂવ દેવી ચ કૃતા સુહસ્તા લક્ષ્મીસ્ તથા પદ્મિનિ પદ્મહસ્તા

ઇતીવ તદ્ ગૃહમ્ અભિગમ્ય શોભનં સવિસ્મયો નગમ્ ઇવ ચારુશોભનમ્
પુનશ્ ચ તત્ પરમસુગન્ધિ સુન્દરં હિમાત્યયે નગમ્ ઇવ ચારુકન્દરમ્

તતઃ સ તાં કપિર્ અભિપત્ય પૂજિતાં ચરન્ પુરીં દશમુખબાહુપાલિતામ્
અદૃશ્ય તાં જનકસુતાં સુપૂજિતાં સુદુઃખિતાં પતિગુણવેગનિર્જિતામ્

તતસ્ તદા બહુવિધભાવિતાત્મનઃ કૃતાત્મનો જનકસુતાં સુવર્ત્મનઃ
અપશ્યતો ઽભવદ્ અતિદુઃખિતં મનઃ સુચક્ષુષઃ પ્રવિચરતો મહાત્મનઃ