રામાયણ · અધ્યાય 4.063

આખ્યાતા ગૃધ્રરાજેન સમુત્પત્ય પ્લવંગમાઃ
સંગતાઃ પ્રીતિસંયુક્તા વિનેદુઃ સિંહવિક્રમાઃ

સંપાતેર્ વચનં શ્રુત્વા હરયો રાવણક્ષયમ્
હૃષ્ટાઃ સાગરમ્ આજગ્મુઃ સીતાદર્શનકાઙ્ક્ષિણઃ

અભિક્રમ્ય તુ તં દેશં દદૃશુર્ ભીમવિક્રમાઃ
કૃત્સ્નં લોકસ્ય મહતઃ પ્રતિબિમ્બમ્ ઇવ સ્થિતમ્

દક્ષિણસ્ય સમુદ્રસ્ય સમાસાદ્યોત્તરાં દિશમ્
સંનિવેશં તતશ્ ચક્રુઃ સહિતા વાનરોત્તમાઃ

સત્ત્વૈર્ મહદ્ભિર્ વિકૃતૈઃ ક્રીડદ્ભિર્ વિવિધૈર્ જલે
વ્યાત્તાસ્યૈઃ સુમહાકાયૈર્ ઊર્મિભિશ્ ચ સમાકુલમ્

પ્રસુપ્તમ્ ઇવ ચાન્યત્ર ક્રીડન્તમ્ ઇવ ચાન્યતઃ
ક્વ ચિત્ પર્વતમાત્રૈશ્ ચ જલરાશિભિર્ આવૃતમ્

સંકુલં દાનવેન્દ્રૈશ્ ચ પાતાલતલવાસિભિઃ
રોમહર્ષકરં દૃષ્ટ્વા વિષેદુઃ કપિકુઞ્જરાઃ

આકાશમ્ ઇવ દુષ્પારં સાગરં પ્રેક્ષ્ય વાનરાઃ
વિષેદુઃ સહસા સર્વે કથં કાર્યમ્ ઇતિ બ્રુવન્

વિષણ્ણાં વાહિનીં દૃષ્ટ્વા સાગરસ્ય નિરીક્ષણાત્
આશ્વાસયામ્ આસ હરીન્ ભયાર્તાન્ હરિસત્તમઃ

ન નિષાદેન નઃ કાર્યં વિષાદો દોષવત્તરઃ
વિષાદો હન્તિ પુરુષં બાલં ક્રુદ્ધ ઇવોરગઃ

વિષાદો ઽયં પ્રસહતે વિક્રમે પર્યુપસ્થિતે
તેજસા તસ્ય હીનસ્ય પુરુષાર્થો ન સિધ્યતિ

તસ્યાં રાત્ર્યાં વ્યતીતાયામ્ અઙ્ગદો વાનરૈઃ સહ
હરિવૃદ્ધૈઃ સમાગમ્ય પુનર્ મન્ત્રમ્ અમન્ત્રયત્

સા વાનરાણાં ધ્વજિની પરિવાર્યાઙ્ગદં બભૌ
વાસવં પરિવાર્યેવ મરુતાં વાહિની સ્થિતા

કો ઽન્યસ્ તાં વાનરીં સેનાં શક્તઃ સ્તમ્ભયિતું ભવેત્
અન્યત્ર વાલિતનયાદ્ અન્યત્ર ચ હનૂમતઃ

તતસ્ તાન્ હરિવૃદ્ધાંશ્ ચ તચ્ ચ સૈન્યમ્ અરિંદમઃ
અનુમાન્યાઙ્ગદઃ શ્રીમાન્ વાક્યમ્ અર્થવદ્ અબ્રવીત્

ક ઇદાનીં મહાતેજા લઙ્ઘયિષ્યતિ સાગરમ્
કઃ કરિષ્યતિ સુગ્રીવં સત્યસંધમ્ અરિંદમમ્

કો વીરો યોજનશતં લઙ્ઘયેત પ્લવંગમાઃ
ઇમાંશ્ ચ યૂથપાન્ સર્વાન્ મોચયેત્ કો મહાભયાત્

કસ્ય પ્રસાદાદ્ દારાંશ્ ચ પુત્રાંશ્ ચૈવ ગૃહાણિ ચ
ઇતો નિવૃત્તાઃ પશ્યેમ સિદ્ધાર્થાઃ સુખિનો વયમ્

કસ્ય પ્રસાદાદ્ રામં ચ લક્ષ્મણં ચ મહાબલમ્
અભિગચ્છેમ સંહૃષ્ટાઃ સુગ્રીવં ચ મહાબલમ્

યદિ કશ્ ચિત્ સમર્થો વઃ સાગરપ્લવને હરિઃ
સ દદાત્વ્ ઇહ નઃ શીઘ્રં પુણ્યામ્ અભયદક્ષિણામ્

અઙ્ગદસ્ય વચઃ શ્રુત્વા ન કશ્ ચિત્ કિં ચિદ્ અબ્રવીત્
સ્તિમિતેવાભવત્ સર્વા સા તત્ર હરિવાહિની

પુનર્ એવાઙ્ગદઃ પ્રાહ તાન્ હરીન્ હરિસત્તમઃ
સર્વે બલવતાં શ્રેષ્ઠા ભવન્તો દૃઢવિક્રમાઃ

વ્યપદેશ્ય કુલે જાતાઃ પૂજિતાશ્ ચાપ્ય્ અભીક્ષ્ણશઃ
ન હિ વો ગમને સંગઃ કદા ચિદ્ અપિ કસ્ય ચિત્

બ્રુવધ્વં યસ્ય યા શક્તિર્ ગમને પ્લવગર્ષભાઃ