રામાયણ · અધ્યાય 4.062

એતૈર્ અન્યૈશ્ ચ બહુભિર્ વાક્યૈર્ વાક્યવિશારદઃ
માં પ્રશસ્યાભ્યનુજ્ઞાપ્ય પ્રવિષ્ટઃ સ સ્વમ્ આશ્રમમ્

કન્દરાત્ તુ વિસર્પિત્વા પર્વતસ્ય શનૈઃ શનૈઃ
અહં વિન્ધ્યં સમારુહ્ય ભવતઃ પ્રતિપાલયે

અદ્ય ત્વ્ એતસ્ય કાલસ્ય સાગ્રં વર્ષશતં ગતમ્
દેશકાલપ્રતીક્ષો ઽસ્મિ હૃદિ કૃત્વા મુનેર્ વચઃ

મહાપ્રસ્થાનમ્ આસાદ્ય સ્વર્ગતે તુ નિશાકરે
માં નિર્દહતિ સંતાપો વિતર્કૈર્ બહુભિર્ વૃતમ્

ઉત્થિતાં મરણે બુદ્ધિં મુનિ વાક્યૈર્ નિવર્તયે
બુદ્ધિર્ યા તેન મે દત્તા પ્રાણસંરક્ષણાય તુ
સા મે ઽપનયતે દુઃખં દીપ્તેવાગ્નિશિખા તમઃ

બુધ્યતા ચ મયા વીર્યં રાવણસ્ય દુરાત્મનઃ
પુત્રઃ સંતર્જિતો વાગ્ભિર્ ન ત્રાતા મૈથિલી કથમ્

તસ્યા વિલપિતં શ્રુત્વા તૌ ચ સીતા વિનાકૃતૌ
ન મે દશરથસ્નેહાત્ પુત્રેણોત્પાદિતં પ્રિયમ્

તસ્ય ત્વ્ એવં બ્રુવાણસ્ય સંપાતેર્ વાનરૈઃ સહ
ઉત્પેતતુસ્ તદા પક્ષૌ સમક્ષં વનચારિણામ્

સ દૃષ્ટ્વા સ્વાં તનું પક્ષૈર્ ઉદ્ગતૈર્ અરુણચ્છદૈઃ
પ્રહર્ષમ્ અતુલં લેભે વાનરાંશ્ ચેદમ્ અબ્રવીત્

નિશાકરસ્ય મહર્ષેઃ પ્રભાવાદ્ અમિતાત્મનઃ
આદિત્યરશ્મિનિર્દગ્ધૌ પક્ષૌ મે પુનર્ ઉત્થિતૌ

યૌવને વર્તમાનસ્ય મમાસીદ્ યઃ પરાક્રમઃ
તમ્ એવાદ્યાવગચ્છામિ બલં પૌરુષમ્ એવ ચ

સર્વથા ક્રિયતાં યત્નઃ સીતામ્ અધિગમિષ્યથ
પક્ષલાભો મમાયં વઃ સિદ્ધિપ્રત્યય કારકઃ

ઇત્ય્ ઉક્ત્વા તાન્ હરીન્ સર્વાન્ સંપાતિઃ પતતાં વરઃ
ઉત્પપાત ગિરેઃ શૃઙ્ગાજ્ જિજ્ઞાસુઃ ખગમો ગતિમ્

તસ્ય તદ્ વચનં શ્રુત્વા પ્રીતિસંહૃષ્ટમાનસાઃ
બભૂવુર્ હરિશાર્દૂલા વિક્રમાભ્યુદયોન્મુખાઃ

અથ પવનસમાનવિક્રમાઃ પ્લવગવરાઃ પ્રતિલબ્ધ પૌરુષાઃ
અભિજિદભિમુખાં દિશં યયુર્ જનકસુતા પરિમાર્ગણોન્મુખાઃ