રામાયણ · અધ્યાય 4.061

એવમ્ ઉક્ત્વા મુનિશ્રેષ્ઠમ્ અરુદં દુઃખિતો ભૃશમ્
અથ ધ્યાત્વા મુહૂર્તં તુ ભગવાન્ ઇદમ્ અબ્રવીત્

પક્ષૌ ચ તે પ્રપક્ષૌ ચ પુનર્ અન્યૌ ભવિષ્યતઃ
ચક્ષુષી ચૈવ પ્રાણાશ્ ચ વિક્રમશ્ ચ બલં ચ તે

પુરાણે સુમહત્ કાર્યં ભવિષ્યં હિ મયા શ્રુતમ્
દૃષ્ટં મે તપસા ચૈવ શ્રુત્વા ચ વિદિતં મમ

રાજા દશરથો નામ કશ્ ચિદ્ ઇક્ષ્વાકુનન્દનઃ
તસ્ય પુત્રો મહાતેજા રામો નામ ભવિષ્યતિ

અરણ્યં ચ સહ ભ્રાત્રા લક્ષ્મણેન ગમિષ્યતિ
તસ્મિન્ન્ અર્થે નિયુક્તઃ સન્ પિત્રા સત્યપરાક્રમઃ

નૈરૃતો રાવણો નામ તસ્યા ભાર્યાં હરિષ્યતિ
રાક્ષસેન્દ્રો જનસ્થાનાદ્ અવધ્યઃ સુરદાનવૈઃ

સા ચ કામૈઃ પ્રલોભ્યન્તી ભક્ષ્યૈર્ ભોજ્યૈશ્ ચ મૈથિલી
ન ભોક્ષ્યતિ મહાભાગા દુઃખમગ્ના યશસ્વિની

પરમાન્નં તુ વૈદેહ્યા જ્ઞાત્વા દાસ્યતિ વાસવઃ
યદ્ અન્નમ્ અમૃતપ્રખ્યં સુરાણામ્ અપિ દુર્લભમ્

તદ્ અન્નં મૈથિલી પ્રાપ્ય વિજ્ઞાયેન્દ્રાદ્ ઇદં ત્વ્ ઇતિ
અગ્રમ્ ઉદ્ધૃત્ય રામાય ભૂતલે નિર્વપિષ્યતિ

યદિ જીવતિ મે ભર્તા લક્ષ્મણેન સહ પ્રભુઃ
દેવત્વં ગતયોર્ વાપિ તયોર્ અન્નમ્ ઇદં ત્વ્ ઇતિ

એષ્યન્ત્ય્ અન્વેષકાસ્ તસ્યા રામદૂતાઃ પ્લવંગમાઃ
આખ્યેયા રામમહિષી ત્વયા તેભ્યો વિહંગમ

સર્વથા તુ ન ગન્તવ્યમ્ ઈદૃશઃ ક્વ ગમિષ્યસિ
દેશકાલૌ પ્રતીક્ષસ્વ પક્ષૌ ત્વં પ્રતિપત્સ્યસે

ઉત્સહેયમ્ અહં કર્તુમ્ અદ્યૈવ ત્વાં સપક્ષકમ્
ઇહસ્થસ્ ત્વં તુ લોકાનાં હિતં કાર્યં કરિષ્યસિ

ત્વયાપિ ખલુ તત્ કાર્યં તયોશ્ ચ નૃપપુત્રયોઃ
બ્રાહ્મણાનાં સુરાણાં ચ મુનીનાં વાસવસ્ય ચ

ઇચ્છામ્ય્ અહમ્ અપિ દ્રષ્ટું ભ્રાતરુ રામલક્ષ્મણૌ
નેચ્છે ચિરં ધારયિતું પ્રાણાંસ્ ત્યક્ષ્યે કલેવરમ્