રામાયણ · અધ્યાય 4.060

તતસ્ તદ્ દારુણં કર્મ દુષ્કરં સાહસાત્ કૃતમ્
આચચક્ષે મુનેઃ સર્વં સૂર્યાનુગમનં તથા

ભગવન્ વ્રણયુક્તત્વાલ્ લજ્જયા ચાકુલેન્દ્રિયઃ
પરિશ્રાન્તો ન શક્નોમિ વચનં પરિભાષિતુમ્

અહં ચૈવ જટાયુશ્ ચ સંઘર્ષાદ્ દર્પમોહિતૌ
આકાશં પતિતૌ વીરૌ જિઘાસન્તૌ પરાક્રમમ્

કૈલાસશિખરે બદ્ધ્વા મુનીનામ્ અગ્રતઃ પણમ્
રવિઃ સ્યાદ્ અનુયાતવ્યો યાવદ્ અસ્તં મહાગિરિમ્

અથાવાં યુગપત્ પ્રાપ્તાવ્ અપશ્યાવ મહીતલે
રથચક્રપ્રમાણાનિ નગરાણિ પૃથક્ પૃથક્

ક્વ ચિદ્ વાદિત્રઘોષાંશ્ ચ બ્રહ્મઘોષાંશ્ ચ શુશ્રુવ
ગાયન્તીશ્ ચાઙ્ગના બહ્વીઃ પશ્યાવો રક્તવાસસઃ

તૂર્ણમ્ ઉત્પત્ય ચાકાશમ્ આદિત્યપથમ્ આસ્થિતૌ
આવામ્ આલોકયાવસ્ તદ્ વનં શાદ્વલસંસ્થિતમ્

ઉપલૈર્ ઇવ સંછન્ના દૃશ્યતે ભૂઃ શિલોચ્ચયૈઃ
આપગાભિશ્ ચ સંવીતા સૂત્રૈર્ ઇવ વસુંધરા

હિમવાંશ્ ચૈવ વિન્ધ્યશ્ ચ મેરુશ્ ચ સુમહાન્ નગઃ
ભૂતલે સંપ્રકાશન્તે નાગા ઇવ જલાશયે

તીવ્રસ્વેદશ્ ચ ખેદશ્ ચ ભયં ચાસીત્ તદાવયોઃ
સમાવિશત મોહશ્ ચ મોહાન્ મૂર્છા ચ દારુણા

ન દિગ્ વિજ્ઞાયતે યામ્યા નાગેન્યા ન ચ વારુણી
યુગાન્તે નિયતો લોકો હતો દગ્ધ ઇવાગ્નિના

યત્નેન મહતા ભૂયો રવિઃ સમવલોકિતઃ
તુલ્યઃ પૃથ્વીપ્રમાણેન ભાસ્કરઃ પ્રતિભાતિ નૌ

જટાયુર્ મામ્ અનાપૃચ્છ્ય નિપપાત મહીં તતઃ
તં દૃષ્ટ્વા તૂર્ણમ્ આકાશાદ્ આત્માનં મુક્તવાન્ અહમ્

પક્ષિભ્યાં ચ મયા ગુપ્તો જટાયુર્ ન પ્રદહ્યત
પ્રમાદાત્ તત્ર નિર્દગ્ધઃ પતન્ વાયુપથાદ્ અહમ્

આશઙ્કે તં નિપતિતં જનસ્થાને જટાયુષમ્
અહં તુ પતિતો વિન્ધ્યે દગ્ધપક્ષો જડીકૃતઃ

રાજ્યેન હીનો ભ્રાત્રા ચ પક્ષાભ્યાં વિક્રમેણ ચ
સર્વથા મર્તુમ્ એવેચ્છન્ પતિષ્યે શિખરાદ્ ગિરેઃ