રામાયણ · અધ્યાય 4.056

શોકાદ્ ભ્રષ્ટસ્વરમ્ અપિ શ્રુત્વા તે હરિયૂથપાઃ
શ્રદ્દધુર્ નૈવ તદ્ વાક્યં કર્મણા તસ્ય શઙ્કિતાઃ

તે પ્રાયમ્ ઉપવિષ્ટાસ્ તુ દૃષ્ટ્વા ગૃધ્રં પ્લવંગમાઃ
ચક્રુર્ બુદ્ધિં તદા રૌદ્રાં સર્વાન્ નો ભક્ષયિષ્યતિ

સર્વથા પ્રાયમ્ આસીનાન્ યદિ નો ભક્ષયિષ્યતિ
કૃતકૃત્યા ભવિષ્યામઃ ક્ષિપ્રં સિદ્ધિમ્ ઇતો ગતાઃ

એતાં બુદ્ધિં તતશ્ ચક્રુઃ સર્વે તે વાનરર્ષભાઃ
અવતાર્ય ગિરેઃ શૃઙ્ગાદ્ ગૃધ્રમ્ આહાઙ્ગદસ્ તદા

બભૂવુર્ ક્ષરજો નામ વાનરેન્દ્રઃ પ્રતાપવાન્
મમાર્યઃ પાર્થિવઃ પક્ષિન્ ધાર્મિકૌ તસ્ય ચાત્મજૌ

સુગ્રીવશ્ ચૈવ વલી ચ પુત્રાવ્ ઓઘબલાવ્ ઉભૌ
લોકે વિશ્રુતકર્માભૂદ્ રાજા વાલી પિતા મમ

રાજા કૃત્સ્નસ્ય જગત ઇક્ષ્વાકૂણાં મહારથઃ
રામો દાશરથિઃ શ્રીમાન્ પ્રવિષ્ટો દણ્ડકાવનમ્

લક્ષ્મણેન સહ ભ્રાત્રા વૈદેહ્યા ચાપિ ભાર્યયા
પિતુર્ નિદેશનિરતો ધર્મ્યં પન્થાનમ્ આશ્રિતઃ
તસ્ય ભાર્યા જનસ્થાનાદ્ રાવણેન હૃતા બલાત્

રામસ્ય ચ પિતુર્ મિત્રં જટાયુર્ નામ ગૃધ્રરાટ્
દદર્શ સીતાં વૈદેહીં હ્રિયમાણાં વિહાયસા

રાવણં વિરથં કૃત્વા સ્થાપયિત્વા ચ મૈથિલીમ્
પરિશ્રાન્તશ્ ચ વૃદ્ધશ્ ચ રાવણેન હતો રણે

એવં ગૃધ્રો હતસ્ તેન રાવણેન બહીયસા
સંસ્કૃતશ્ ચાપિ રામેણ ગતશ્ ચ ગતિમ્ ઉત્તમામ્

તતો મમ પિતૃવ્યેણ સુગ્રીવેણ મહાત્મના
ચકાર રાઘવઃ સખ્યં સો ઽવધીત્ પિતરં મમ

મામ પિત્રા વિરુદ્ધો હિ સુગ્રીવઃ સચિવૈઃ સહ
નિહત્ય વાલિનં રામસ્ તતસ્ તમ્ અભિષેચયત્

સ રાજ્યે સ્થાપિતસ્ તેન સુગ્રીવો વાનરેશ્વરઃ
રાજા વાનરમુખ્યાનાં યેન પ્રસ્થાપિતા વયમ્

એવં રામપ્રયુક્તાસ્ તુ માર્ગમાણાસ્ તતસ્ તતઃ
વૈદેહીં નાધિગચ્છામો રાત્રૌ સૂર્યપ્રભામ્ ઇવ

તે વયં દણ્દકારણ્યં વિચિત્ય સુસમાહિતાઃ
અજ્ઞાનાત્ તુ પ્રવિષ્ટાઃ સ્મ ધરણ્યા વિવૃતં બિલમ્

મયસ્ય માયા વિહિતં તદ્ બિલં ચ વિચિન્વતામ્
વ્યતીતસ્ તત્ર નો માસો યો રાજ્ઞા સામયઃ કૃતઃ

તે વયં કપિરાજસ્ય સર્વે વચનકારિણઃ
કૃતાં સંસ્થામ્ અતિક્રાન્તા ભયાત્ પ્રાયમ્ ઉપાસ્મહે

ક્રુદ્ધે તસ્મિંસ્ તુ કાકુત્સ્થે સુગ્રીવે ચ સલક્ષ્મણે
ગતાનામ્ અપિ સર્વેષાં તત્ર નો નાસ્તિ જીવિતમ્